1 A aa'wan a na Mogono Uziya kuwa̱i, me ene ta̱ Zagbain nden o ootogu o tsugono na̱ tsugbain lon, a̱vu elentsu a̱ a̱tugu a̱ yi o shiton a̱a̱'isa̱. 2 Reve nan serafin* e isawan zuva va̱ yi koyan ɗa ne evelu a̱ ta̱li, ne evelu e re a ɗa a palai urewesu u le, ne ejere a ɗa waru a palai ana e le, ne ejere a ɗa waru a tsu 'yawaan. 3 Reve e reme nɗelei, <<Akiza, akiza, akiza, A̱sulazuva o oɓolo a̱ a̱soja a zuva! Uvaɗi suru u shiwan ta̱ na̱ tsugbain tsa̱ yi.>> 4 Reve adama o ucira u mesun wu ɗyo le a̱vu akpata a̱ na̱ntsu a̱ jinga̱ɗa, a̱vu a̱a̱'isa̱'a̱ a shiwan na̱ mikyon.

5 Reve n sala, <<A̱tsuma̱lima̱ a cina mu ta̱! Aɗa a̱ va̱ o koto ta̱! Adama a na a̱mu vuma ɗa na ri nu una̱ wi idaba, waru n ta̱ nden e memere ma ama a na na̱ le ri idaba, adama a na esu a̱ va̱ e ene ta̱ Mogono, A̱sulazuva o oɓolo a̱ a̱soja a zuva.>>

6 Reve za ta̱ a̱tsuma̱ a nan serafin wu 'yawan a̱ ta̱wa̱ ya̱'a̱ va̱ na akinkina a na a̱ ri na akina o ukere wa̱ yi, za na u tarai a masa'a na akana. 7 A̱vu u ju'wa̱n una̱ u va̱ na̱ a̱yi reve u damma, << A̱yi ɗa nda, ili i nda i ju'wa̱in una̱ wa̱ wu, a tawa ta̱ unusu wa̱ wu, waru a tara ta̱ ume wu unusu wa̱ wu.>>

8 Reve mu uwwa uɗyo wu Zagbain a dansa, <<Zane ma̱a̱ lyungu? Zane ɗa a̱a̱ 'ya̱wa̱ adama a̱ tsu?>> Reve n damma, <<A̱mu ɗa nda. Lyungu mu.>>

9 Reve u damma, <<'Ya̱wa̱ vu damma ama a nda: <Yu uwwusa, agba babu tsura̱ urevu. Ye eneshe, agba babu reve.> 10 Zuwa okolo a ama a nda a̱ da̱mba̱lya̱, atsuvu e le waru ume, esu e le waru a̱ rumba̱na̱. A̱vu a̱ ta̱wa̱ e ene ne esu e le, a uwwa na atsuvu e le, e reve no okolo e le, reve a vadala a̱vu a̱ ka̱mba̱to le gbaga wan.>>

11 Reve me ece, <<Hali a̱ tyo mantsa ma̱ ne Zagbain?>> A̱vu u usu, <<Hali she ni ilyuci yo o'wo ofoli babu za na a̱a̱ da̱nu pe, hali she na̱ 'wa vo o'wo babu ko vuma, iɗa waru yo o'wo ofoli, 12 hali she na̱ A̱sulazuva a̱ gba̱ra̱ koyan ɗa alanga, reve a lyawa iɗa'a suru suru. 13 Ko na̱ shi za ta̱ a̱tsuma̱ a kupa a ɗa buwai pe, a̱ ta̱ da̱shi kula̱to yi. Amma u to o'wo tsu ɗanga oku aza a na nkyun n le n tsu pasa ko na̱ shi o koɗo le, ne ɗa ugundo wa akiza woo o'wo ikyun e iɗa'a.>>