1 Ikaka adama a Dimaska, <<Uwwai nda, Dimaska buwa o o'wo a̱ba̱jini a̱ lyuci shi amma u to o'wo aganga o ulungusu. 2 Ilyuci ya Arowa o to o'wo babu vuma a̱vu a lyawaa oɓolo e iliyamunga, wo o'wo le uba̱ta̱ wu nven, babu za na a zuwa le a uwwa wovon. 3 Ilyuci yi ɓaɓu vu ucira a̱ ta̱ puwa̱n diga Ifiramu, oɓolo na̱ tsugono diga Dimaska. Tsugbain tsa akapi a Aram tsa̱ ta̱ ka̱ra̱ tsa tsugbain tsa aza a Isra'ila,>> ili i na A̱sulazuva o oɓolo a̱ a̱soja a zuva a dammai ɗa nda. 4 <<O urana u ndolo tsugbain tsa Yakubu tso to koto, mgbain n lipu va̱ yi n ta ramba. 5 Isra'ila to o'wo tso uɗuma̱ u na a gasai tso uɗuma̱ u na 'yanlai hali wo o'wo she damma ili yi pe shi. Tso Uka̱ri wa̱ Refaya. 6 Na̱ ne suru u'yanlu u ta buwa, cine u tso o'wo nu uɗanga u zetun u na a̱ za̱ka̱tsa̱i. A̱vu u buwa ɗe zuva ejere ko aza a ta'atsu e eten o mogogolo, a̱za̱ a̱ na̱shi ko ozo o ton eten a na a̱ ri na̱ muwun.>> Ne ɗa A̱sulazuva, A̱sula̱ a aza a Isra'ila a dammai. 7 O urana u ndolo ama a ta zuwaa Za na yuwan nle esu, a zuwaa Za va Akiza a Isra'ila esu. 8 Waa zuwaa masa'a, ulinga we ekere wa̱ yi esu shi, waru waa zuwaa ili i na akatsu a̱ yi a yuwain esu shi, ko a̱shuwutsu a Ashera ko masa'a ma̱ a̱tsuka̱ a̱ ma̱guru.

9 O urana u ndolo ilyuci yu ucira i le a na suma a lyawai adama aza a Isra'ila, o to o'wo ofoli cine vu revei ba̱ta̱ na o o'woi okongo cine vu revei a̱rumbu a na a̱ ri ugbagbalu. Suru o to o'wo ofoli. 10 Adama a na yi icina ta̱ na̱ A̱sula̱ Zamawawa ɗu, i cuwan na Aatali'i upa'atan wu ucira u ɗu shi. Adama o ndolo, ko na i cu'wa̱in icu'un i sa'ani waru i cu'wa̱n mocin va ataci, 11 ko ni i shi a zuwa le a kungwa o urana u na i cu'wa̱n nle gan, reve i zuwa le a ɓatsa yipa̱lu nu usana u na i cu'wa̱in nle, na̱ ne suru ugasa u ɗu u to o'wo pere o urana u mesun na̱ mɓa̱la̱ n na ma̱a̱ tsura̱ a̱guma̱ shi. 12 Uwwai, elemu a nɗa na̱ a̱bunda̱, a̱ ta̱ elemu cine vu revei mala ma̱ ri a̱ ma̱gugwa̱! Uwwai, ma̱gugwa̱ ma ama, a̱ ta̱ a̱ ma̱gugwa̱ cine vu revei a̱ba̱jini a̱ mini a na a̱ ri a̱ ma̱gugwa̱! 13 Ko na wo o'woi ama a̱ ta̱ a̱ ma̱gugwa̱ cine vu revei a̱ba̱jini a̱ mini, agba A̱sula̱ a ta ɓara le, reve gba a suma alanga. O to lo le cine vu revei owopo a nsasan a̱tsuma̱ o upepu na̱ lipa̱ a̱tsuma̱ a̱ wunla̱. 14 Nu ulivu a̱vu ucasu u wovon u ta̱wa̱ babu usa̱n, agba kafu usana, a̱vu u bete'we! A̱yi ɗa akunda a aza a na a usa ntsu ili, akunda a aza a na a pura̱ ntsu ili i na tsu ri na̱ a̱yi.