1 O urana u ndolo, A̱sulazuva a ta tara matsun me pe'eni ma̱ yi za vu ucira, za vu ugbamu u ca Leviyatan yo vi ilaɗi ndolo oforo, Leviyatan✝ yo ndolo za na tsu walasa ugondoru. Waru u to una ididi i na i ri pe a mala. 2 O urana u ndolo, <<Canai ishipa adama o uɗuma̱ u sa'ani u ina̱bi i damma, 3 A̱mu, A̱sulazuva, a̱mu ɗa za na a̱ pirishi yi, mantsa suru n tsu tsun yi ta̱ mini. N tsu piri yi ta̱ urana na ayin, adama ta̱wa̱ za ro lungusa̱ yi wan. 4 N yuwan upan shi. A̱ shi a damma awanda na̱ ma̱lyo ma ɗa mo uta̱i a yuwan nla̱ngi na̱ a̱mu, n shi ta̱ a̱ riya̱a̱ le uvon, n kula̱to le na akina. 5 Ko gba na̱ ne ɗa shi lyawa le a̱ ta̱wa̱ uba̱ta̱ u va̱ adama n pa'aton le, lyawa le a zami nden ma asuvu na̱ a̱mu, lyawa le a zami nden ma asuvu na̱ a̱mu.>> 6 A rana na va̱a̱ ta̱wa̱ Yakubu ta̱ tsura̱ ikyun, aza a Isra'ila o to topo a yuwan yipa̱lu, waru muwun n na a matsain o to shiton uvaɗi. 7 A̱sulazuva a faba yi ta̱ cine u fabai aza a na a faba niyi? Ko o una yi ta̱ cine o unai aza a na o una niyi? 8 A̱sulazuva a ca ta̱ ama a̱ yi a̱tsuma̱lima̱ ana u tyowetyo nle e iɗa i tsugbashi, nu upepu wa asana wu ucira u ɗa waru wu uta̱a̱ nle. 9 Ne tsunda tsa ɗa aa tara ume wu unusu wa Yakubu, a̱yi nda a̱yi ɗa ili i na matawa mo unusu wa̱ yi ma̱ ta̱wa̱yi. A mantsa ma na u minjirai atali a musa'a suru a̱ ka̱mbuwa̱ nle uruku wa atali o uminjuru muɓaci muɓaci, babu a̱shuwutsu a Ashera ko musa'a ma̱ a̱tsuka̱ a̱ ma̱guru a na aa lyawa mishin. 10 Adama a na lyuci gbain na ri nu ukari wo o'wo ta̱ okongo, a lyawa yi ta̱ tsa̱ a̱tsumona a na a̱ ri na̱ za shi. Wo o'wo ta̱ uba̱ta̱ wa alyuna a̱ mudindim, pe ɗa o von a tama eten a̱ yi. 11 Ana eten a̱ yi e 'yewei reve a kuɗa, a̱vu a̱ma̱ci a̱ ta̱wa̱ a̱ pura̱ adama a zuwaa akina ne ele. Adama a na ele ama a ɗa a na a̱ ri nu urevu shi, a̱yi za na yuwan le wee ene iliyali i le shi, a̱yi za na yuwan le woo roco le isa'ani shi.

12 O urana u ndolo diga o uɗolu wa̱ Yufireti a̱ tyo o Uɗolu wa Masar, A̱sulazuva o to ɓoloto ɗu tsi ishina. U to ɓoloto ɗu a̱za̱ a̱ ta̱ ta̱, a̱ɗu ama a Isra'ila. 13 Waru o urana u ndolo a̱ te ivula̱ a̱ba̱jini a aabulu, waru aza a na a̱ puwa̱in a̱tsuma̱ e iɗa ya Asuriya na aza a na a̱ gba̱ra̱i a̱ tyo e iɗa ya Masar a̱ ta̱ ta̱wa̱ a yuwaan A̱sulazuva a̱ga̱nda̱ a masasan ma akiza ma̱ Urishelima.