1 Jiwan, jiwan, a̱vu Sihiyona, vu pupala aciya̱wu nu ucira. Vo oto itana i sa'ani ya̱ wu, a̱vu Urishelima lyuci gbain va akiza. Aza a na koto a paɗai uryumbu shi na̱ a̱za̱ e idaba a̱a̱ da̱shi uwa a̱ na̱ntsu va̱ wu shi. 2 Ka̱pa̱tsa̱ aciya̱wu ma̱buta̱, reve vu 'yon mishin. Vu da̱nu o ootogu o tsugono, a̱vu Urishelima. Ba̱ɗa̱ akani a̱ yinlu ya̱ wu, a̱vu Sihiyona na e remei.

3 Adama a na apa ili i na A̱sulazuva a dammai: <<A wina ɗu ta̱ pere ko ili shi, ne ɗa waru aa tsupaa ɗu ni ikebe shi.>>

4 Adama a na A̱sulazuva Zagbain a damma ta̱, <<Nu ufaru ama a̱ va̱ a̱ zura̱ ta̱ a̱ tyo Masar adama a yuwan ɗe nden n tsumocin. Na̱ a̱ca̱pa̱ reve aza a Asuriya o ɓongi le.

5 <<Waru gogo nye i ɗa maa yuwusan pa?>> A̱sulazuva a ɗa a dammai, <<Adama a na a̱ ta̱ purusa̱ ama a̱ va̱ pere, waru aza a na a̱ ri o tsugono tse le a ta yuwusaan le yorori ya afalu*,>> A̱sulazuva a ɗa a dammai ne, <<Waru usana suru a tara ala a̱ va̱ ili i ro shi. 6 Adama o ndolo ama a̱ va̱ e te reve ala a̱ va̱, a̱vu o urana u ndolo ee reve a na a̱mu ɗa n yuwain adanshi. Amayun a̱mu ɗaɗa.>> 7 Ili i ma̱za̱nga̱ i ɗa lon na̱ za na a̱a̱ ta̱wusa̱ na alabari a sa'ani a̱ ri a mmalu zuva masasan, za na ta̱wa̱i na̱ nden ma asuvu, na alabari a sa'ani a̱ ma̱za̱nga̱, za na ta̱wa̱i ni iwawi. Za na tsu dansaa Sihiyona, <<A̱sula̱ a̱ wu a ɗa a̱ ri o tsugono!>> 8 Zuwai atsuvu, a̱za̱ e ipiri a̱ ɗu a̱ ta̱ 'ya̱susa̱n ɗyo le, a ta canasa ishipa i ma̱za̱nga̱ oɓolo, adama a na ne esu e le a ɗa ee ene uka̱mbu wa̱ A̱sulazuva Sihiyona. 9 Ɓosoi ni ishipa i ma̱za̱nga̱ oɓolo, a̱ɗu pasu va̱ Urishelima na a̱ lungusa̱i, adama a na A̱sulazuva a ca ta̱ ama a̱ yi adanshi, u tsupaa ta̱ Urishelima. 10 A̱sulazuva a ta canana ukere wa akiza wa̱ yi o urewesu wa ama suru, waru ukosu wu uvaɗi suru e te ene iwawi ya̱ A̱sula̱ a̱ tsu. 11 Uta̱i, uta̱i, uta̱i ɗe! She i ju'wa̱n ili yi idaba wan. Uta̱i e memere ma̱ yi, i ka̱mba̱to aciya̱ɗu cece, a̱ɗu aza a na yaa tanusu itana ya̱ A̱sulazuva. 12 Amma ya̱a̱ jika̱ o uta̱ shi, waru yoo uta̱ ni ilaɗi shi, adama a na A̱sulazuva a ta uwa elime a̱ ɗu, A̱sula̱ a aza a Isra'ila o to o'wo za vi ipiri a̱ca̱pa̱ a̱ ɗu.

13 Uwwai nda, aagbashi a̱ va̱ a ta yuwan ili nu ugbozu.* A ta cuwa yi, a tara yi na̱ tsugbain waru a ta ca yi tsugbain lon. 14 Ama na̱ a̱bunda̱ a da'wan ta̱ adama a̱ yi, cine a̱ lyungusa̱i lipu va̱ yi hali wo o'wo tso oroci a vuma shi. 15 Ne ɗa woo kyo'onu nɗa na̱ a̱bunda̱, ngono n te keɗe na̱ le adama a̱ yi. Adama a na e te ene ili i na koto a damma nle shi, waru e te reve ili i na koto a uwwai shi.