1 A̱tsuma̱lima̱ a ta cina iɗa i na i ri e elemu e evelu, iɗa i na i ri mavada mo ɗolu va̱ Kush, 2 aza a na a̱a̱ lyungusu a̱za̱ e ikaka o ure u mala a̱tsuma̱ a wantsun wa apumpu zuva mini. 'Ya̱wa̱i a̱ɗu nlingata mi ilaɗi, e iɗa i na i ri na ama o uga'an. Aza a na lipu le ri pete, uba̱ta̱ wa ama a na a uwwusa wovon u le pa zuzu na alanga, iɗa i na i ri nu ucira u na waa lyuwusa aci, iɗa i na waru ɗolu vu kasai. 3 A̱ɗu ama o uvaɗi suru, aza a na a̱ ri na̱ nden a̱tsuma̱ o uvaɗi, na̱ a̱ 'ya̱sa̱a̱n ɗu atuta ɗe a nsasan, i te ene. Nna̱ e ivula̱ aavana, i ta uwwa yi. 4 Apa ili i na A̱sulazuva a damma numu: <<Diga ɗe uba̱ta̱ wu nden n va̱ zuva, n ta̱ da̱na̱ ɗe kpaku n ka̱lyuwa̱ uvaɗi, cine vu revei usuɗuwu wu urana nu urana u rawa a aci, ko agba cine vu revei a'iza a mantsa mo usuɗuwu u wandari wu ugasa.>> 5 Adama a na kafu ugasa u rawa, a mantsa ma na yipa̱lu i tso oco, reve yipa̱lu yo o'wo muwun ma ataci n na mi inai, u to koɗo ototopi na̱ matsun mo wukoɗu. U to polo le e iɗa a̱vu u tara eten a na a̱ ri a mmalu a̱ ka̱ra̱. 6 A ta lyawa le suru e ekere a asala a nsasan oɓolo ni inama yu una, asala a̱ ta̱ ka̱ɗa̱ le hali ukosu u lyushi, inama yu una waru a tama le a mantsa mo uta̱nu.

7 A mantsa mo ndolo a̱ ta̱ ta̱wa̱a̱ A̱sulazuva o oɓolo a̱ a̱soja a zuva na̱ ne'e diga ama o uga'an aza a na lipu le ri pete, aza a na a uwwusa wovon u le zuzu na alanga, iɗa i na i ri nu ucira i na yaa lyuwusa aci, iɗa i na ɗolu vu kasai. A̱ ta̱ ta̱wa̱a̱ na̱ ne'e a Masasan ma̱ Sihiyona, uba̱ta̱ wa ala a̱ A̱sulazuva o oɓolo a̱ a̱soja a zuva.