1 <<Suru za na a uwwusa akuli u ta̱wa̱, mpa nda mini. A̱ɗu waru a na i ri ni ikebe shi i ta̱wa̱, i tsula adama i lyuwa. Ta̱wa̱i i tsula masayan na̱ maani babu ikebe waru babu udeyi. 2 Nye i zuwai yoo unusa ikebe e ili i na i ri ilyalya shi. Waru nye i zuwai yaa yuwusan ulinga adama e ili i na ya̱a̱ cuwa̱ton ɗu shi? Poloo numu atsuvu a̱ ɗu ulobono, waru i lyuwa ili i na i ri ulobonu, waru yu uwwa uyo'o wo okolo a̱ ɗu ni ilyalya i sa'ani. 3 Poloi atsuvu i ta̱wa̱ uba̱ta̱ u va̱, yu uwwa. Okolo a̱ ɗu a̱ ta̱ tsura̱ wuma. Waru n ta yuwaan ɗu akucunu a babu ukotu, n ta ca ɗu icigi ya amayun i na n yuwayin Da̱wuda. 4 Uwwai nda, n zuwa yi ta̱ wo o'wo lyusu uba̱ta̱ wa ama, zagbain na̱ yali uba̱ta̱ wa ama. 5 Uwwa nda, vu ta̱ ɗe nɗa n na vu revei shi. Nɗa n na waru n reve nuwu shi a ta suma a̱ ta̱wa̱ uba̱ta̱ wa̱ wu, adama a̱ A̱sulazuva A̱sula̱ a̱ wu, Za va Akiza va Isra'ila. Adama a na u ca wu ta̱ tsugbain.>> 6 Zamiyi A̱sulazuva a mantsa ma na a̱a̱ tsura̱ yi, ɗe niyi a̱yi zuzu. 7 Lyawa za vi iwuya lyawa ure wa̱ yi, za vu ulambu wa̱ a̱ɓula̱ waru u lyawa majiyan ma̱ yi. Lyawa u ka̱mba̱ uba̱ta̱ wa̱ A̱sulazuva, a̱yi waru u ta yuwaan yi gafura. Lyawa u ka̱mba̱ uba̱ta̱ wa̱ A̱sula̱ a̱ tsu, adama a na u tsu yuwan ta̱ gafura pere. 8 <<Majiyan ma̱ va̱ ma̱ ri una̱ta̱ na̱ za ɗu shi, re va̱ waru ta̱ ko'o na̱ a̱za̱ a̱ ɗu,>> A̱sulazuva a ɗa a dammai ne. 9 <<Cine zuva ri alanga ni iɗa, ne ɗa re va̱ ri alanga na̱ re ɗu waru majiyan ma̱ va̱ ko'o na̱ za ɗu. 10 Adanshi a̱ va̱ tsa atayan ni iro'i i na i tsu cipa̱ diga zuva u re'weto uvaɗi. A tsu zuwa ta̱ icu'un yu uta̱, reve a ca icu'un yi ca̱'a̱n ni ilyalya adama a alya. 11 Ne ɗa adanshi a na o uta̱i o una̱ u va̱ a̱ ri. Wa̱a̱ ka̱mba̱ uba̱ta̱ u va̱ pere shi, amma u ta shiton ili i na maa jiyasan waru u to shiton ili i na n lyungu niyi u yuwan. 12 I to uta̱ na̱ ma̱za̱nga̱ waru a̱ ta̱ kuru na̱ a̱ɗu a̱tsuma̱ a̱ nden ma asuvu. Nsasan na agaɗi o to ɓoso ni ishipa elime a̱ ɗu, suru ɗanga va atsusa a ta ɓasa ekere. 13 O una̱ wa awanda ɗanga na a̱ tsu ɗe sida to topo, waru o una̱ u ma̱lyo murtil ta kungwa. Ele nda o to o'wo iroci yu ulinga u na a̱mu A̱sulazuva n yuwain, iroci i na yoo koto ɗa shi.>>