1 Ikaka i nda i ta̱wa̱ mu ta̱ adama a̱ Mowa. A ayin a̱ ta̱ a ɗa a̱ lungusa̱i lyuci va Ar, reve iɗa ya̱ Mowa yo o'wo kpaku. A̱tsuma̱ a ayin a̱ ta̱ a ɗa a̱ lungusa̱i lyuci va̱ Kir, reve iɗa ya Mowa yo o'wo kpaku. 2 U kumba ta̱ a gawan a̱ a̱a̱'isa̱. Ama a Dibon a kumba ta̱ a̱ a̱a̱'isa̱, reve waru a kumba ɗe a agaɗi adama a̱ shon. Mowa shon ta̱ adama a Nebo na adama a̱ Medeba. Suru nle a puna ta̱ a̱nji* waru suru nle a puna ta̱ ntsa̱ka̱. 3 O oto ta̱ akashamuna a mmalu o ure, a̱vu za suru oruwo zuva vu kwa̱'a̱* na̱ a̱tsuma̱ e memere me eden, no o voyin na̱ a̱ shoyin. 4 Heshibon oɓolo na̱ Eliyale a̱ shon ta̱, a uwwa ta̱ ɗyo le hali Jaza. Adama o ndolo a̱vu a̱soja a na a̱ ri ufoɓu a̱ Mowa a saala, a̱vu gba okolo e le e je'ein. 5 Okolo a̱ va̱ a̱ showen ta̱ Mowa, a̱vu ama a̱ yi a na a̱ ri e ilaɗi a suma a̱ tyo Zowa na̱ ɗe Eglat Shelishiya. Reve a̱ ka̱ra̱ a gawan Luhi e mesun ele a̱tsuma̱ a mmalu, ele o ure wa Horonayim, a̱ shon ta̱ adama o ukototosu u le. 6 Mini ma Nimrim me 'yewe reve anlya a kpanla, anlya o uta̱nu o koto ta̱ babu waru anlya a na a buwai. 7 Adama o ndolo utsuru u na a̱ tsura̱i reve a zuwa a tara le a̱ ka̱ra̱ upasu u Moɗolu mo wolilo. 8 Adama a na uba̱ta̱ suru e iɗa ya̱ Mowa a ta uwwusa mesun. Mesun mo ndolo ma rawa ta̱ a̱ lyuci va̱ Eglayim, hali u rawa a̱ lyuci va̱ Beye Elim. 9 Mini ma̱ Dimon* ma̱ da̱na̱ ta̱ tapu na̱ mpasa, agba na̱ ne suru n ta̱ da̱shi ta̱wa̱ na̱ kamu a aci a̱ Dimon na̱ a̱za̱ a̱ Mowa a na a la'ai a na a buwai e iɗa'a.