1 I lyungu na̱ uneꞌe u mokyokyon a̱ tyo uba̱ta̱ wu zagbain vi iɗa, diga Sela, o ure wa̱ a̱tsumona, a masasan mo Usheli ma̱ Sihiyona. 2 Cine vu revei nnunu n tsu'yan n na o loyi a yikinda i le, ne ɗa a̱ma̱ci a̱ Mowa a̱ ri a mapasa mo Uɗolu wa Anon. 3 <<Vu ca tsu a̱sa̱la̱, yi isawan mejege. Vu zuwa ululu u geshe tsu nu usuɗuwu wu urana wa̱ a̱bunda̱. I soko aza a na a̱ ri e ilaɗi, she i pa̱lu'wa̱ le wan. 4 I lyawa aza a na a̱ ri e ilaɗi a̱za̱ a̱ Mowa a̱ da̱na̱ na̱ a̱ɗu, yoo o'wo uba̱ta̱ o upa'atan u le e ekere a aza a na oo unusa le.>> A mantsa ma na za vi iɓongi rawai ukosu, ukototosu fo wi isawain, a̱yi waru za na aa dasasa u puwa̱in e iɗa'a. 5 A mantsa'a a ta zuwa ootogu o tsugono a̱tsuma̱ e icigi. Otogu o tsugono o ugundo wa̱ Da̱wuda. Mogono'o u ta yuwan tsugbain a̱tsuma̱ e mejege waru u ta yuwan ge'etosu a̱tsuma̱ a̱ a̱ɓula̱, waru nu ukadu u ta yuwan ili i na i ri mejege. 6 Tsu uwwa ta̱ cu'un vu uvaɗu wa̱ Mowa, nu u'ya̱susa̱n wa aci u le, tsu uwwa ta̱ waru cine a tsu tara ama ili shi, nu ulambu wu ugbozu u le, agba malapa ma̱ ma̱ka̱ka̱n me le suru pere ɗa. 7 Adama o ndolo ama e iɗa ya̱ Mowa a ta saala, a ta saala suru adama a̱ Mowa. A̱ ta̱ shon a̱vu a yuwan a̱tsumola̱ngu adama a akala o u'yewu a̱ ina̱bi a Kir Hareset. 8 A̱ɗuma̱ a Heshibon a kpanla ta̱, a̱ɗuma̱ a̱ ina̱bi va Sibima a̱ 'yewe ta̱. Azagbain a nɗa a kuɗa ta̱ Mowa ataci o ulobonu u ndolo, za na shi valai a̱ tyo ugana a rawa lyuci va Jaza reve u vala a̱ tyo asana a̱tsumona. Ototopi e le a canana ta̱ hali a̱ tyo a̱livu a pasalai a mala. 9 Reve n shon, cine Jaza a̱a̱ shosun, adama a ataci a Sibima. A̱vu Heshibon, a̱vu Eliyale, n to oco aɓara a̱ va̱ a aci a̱ ɗu! Yisaali i ma̱za̱nga̱ i buwa shi adama a̱ muwun mu ɗanga n na a tsu ta'an a mantsa mo uta'an. 10 Mere na̱ ma̱za̱nga̱ a tawa le a atsusa o umili. Babu waru vuma na a canasa ishipa ko a yuwusan ma̱za̱nga̱ o uɗuma̱ u ina̱bi. Babu waru vuma na tsu kpoko masayan uba̱ta̱ u mokpoko, n zuwa ta̱ utyo u ma̱za̱nga̱. 11 Adama o ndolo okolo a̱ va̱ a̱ shon ta̱ cine vu revei kumburu adama a̱ Mowa, ne ɗa waru okolo a̱ va̱ a̱ la̱nga̱i adama a̱ Kir Here. 12 Mantsa ma na Mowa 'ya̱wa̱toyi aciya̱yi a aagaɗi, aciya̱yi a ɗa wa̱a̱ kuna̱tosu goon. Mantsa ma na u ri a yuwusan avasa, ulinga we pere u ɗa waa yuwusan.

13 A̱yi nda a̱yi ɗa adanshi a na A̱sulazuva a yuwain ɗe a aci a̱ Mowa. 14 Waru gogo A̱sulazuva a damma ta̱, <<A̱tsuma̱ a a'wan a ta'atsu, cine vu revei za zamalinga tsu kece a'wan, tsugbain tsa̱ Mowa tsu to o'wo ili ye pere, ko cine tsa ɗa a̱ ri a̱bunda̱, aza a na a buwai o to o'wo ke'en lon waru babu ucira.>>