1 Uwwai nda, ukere wa̱ A̱sulazuva u ri mokoɗi shi na wa̱a̱ kuɗa̱ wawa, ko atsuvu a̱ yi u'ulu na waa uwwa shi. 2 Agba iwuya i ɗu i ɗa yi kasa nɗu na̱ A̱sula̱ a̱ ɗu. Reve unusu u ɗu u sokoo ɗu urewesu wa̱ yi, adama wu uwwa wan. 3 Adama a na ekere a̱ ɗu a̱ shinda̱la̱ ta̱ na̱ mpasa, akatsu a̱ ɗu waru ni iwuya. Na̱ ɗu yuwan ta̱ epen, elentsu a̱ ɗu waru a ta a dansa iwuya. 4 Ko za a zama uge'etosu u mejege shi, ko za a̱a̱ kurusu amayun uba̱ta̱ wu uge'etosu shi. A zuwa ta̱ ucira u le e ili ye pere a yuwusan adanshi e epen. A tsu yuwan ta̱ a̱tsuma̱ e iwuya a̱vu a matsan unusu. 5 A tsu gyu'wan ta̱ okowo a apili, a̱vu a ɗava u'wa wu natan. Za na suru tamai okowo e le u ta̱ kuwa̱, waru no o ɓoso za ta̱ reve a gyu'wan aapili. 6 Uɗava wu natan le waa gura o'wo a̱tugu shi. Aa gura pala aciyele ni ili i na a yuwain shi. Linga le linga vi iwuya i ɗa, linga vu u'ya̱susa̱n wu ugbozu ta̱ e ekere e le. 7 Ana e le a̱ tsu suma ta̱ a̱ 'ya̱wa̱ a yuwan iwuya. A̱ tsu jika̱ ta̱ adama o oco mpasa mu za na ri nu unusu shi. Majiyan me le majiyan me iwuya ma ɗa, ulungusu nu ukotosu u shiton ta̱ re le. 8 E reve ure wu nden wa asuvu nden shi, uge'etosu wa amayun u ri e re le shi. A ka̱mba̱to ta̱ re le vo o'wo ugondoru. Za na a̱a̱ kuru le ri na asuvu nden shi. 9 Adama o ndolo uge'etosu wa amayun u yuwan ta̱ alanga na̱ a̱tsu, a̱ɓula̱ waru a rawa tsu shi. Tsu ta zamishi ekan, agba a̱yi ɗa nda irumbu i ɗa suru. Tsu ta zama hawun reve tso o'wo a mmalu a̱tsuma̱ o ululu da̱n. 10 Tsu ta papurusa uɓaɓu tse irumba̱, a zamishi ure tsa ama a na a̱ ri ne esu shi. Tsu ta̱ ta̱ɗa̱tsa̱ nu urana a aci she damma ayin uɓatsu. E memere ma̱ a̱za̱ o ucira tso o'wo ta̱ tsa̱ a̱kwa̱kwa̱. 11 Suru ntsu tsu ta sali she damma biya, tsu te mesun ma̱ a̱tsumola̱ngu she damma muɗa. Tsu te izami yu uge'etosu wa amayun, agba tsu tsura̱ shi, e izami yi iwawi, agba u ta alanga na̱ a̱tsu. 12 Adama a na nusu tsu ta̱ a̱bunda̱ a̱ ma̱ka̱ka̱n ma̱ wu, waru nusu tsu ta yuwusan adanshi a aci a̱ tsu. Nusu tsu to oɓolo na̱ a̱tsu, waru tsu ta̱ nu urevu na̱ nusu tsu, 13 na aciyogbamu na̱ mawasan ma̱ A̱sulazuva. Tsu vadalaa ta̱ A̱sula̱ a̱ tsu ucina̱. Tsu to foɓuso iɓongi nu u'ya̱susa̱n wu ugbozu, nu udansa we epen a na okolo a̱ tsu o foɓoi. 14 Mayan me mejege a̱tsuma̱ o uge'etosu a̱ ca̱co yi ta̱ a̱ nge'en, a̱ɓula̱ waru a̱ ta̱ mishin alanga. Amayun a̱ ta̱ɗa̱tsa̱ e re, waru mayan me mejege ma gura uwa shi. 15 Amayun a̱ puwa̱n ta̱, waru za na suru 'yuwain iwuya wo o'wo ta̱ ilyalya. A̱sulazuva a̱ ka̱lyuwa̱ ta̱ agba wu uwwa uyo'o shi a na babu uge'etosu wa amayun. 16 We ene ta̱ ko za lo shi, a̱vu a̱tsuma̱ a̱ la̱nga̱ yi a na ko za lo aa kamba shi. Ɗaɗa ukere wa̱ yi u ta̱wa̱a̱ niyi ni iwawi, reve a̱ɓula̱ a̱ yi a ɓana niyi. 17 Wo oto ta̱ a̱ɓula̱ tsa̱ utugu wu rumu, na̱ melezu ma̱ rumu me iwawi a aaci a̱ yi, wo oto ta̱ a̱tugu a atsupu. Reve u katala aciya̱yi nu ukadu tso umuna. 18 Cine linga na a yuwain ri, ne ɗa waa tsupa n'yuwatan ma̱ yi nu upan. U ta tsupa nɗa m memere ma̱ mini ili i na yi ntsaa nle. 19 Ama a̱ mɓa̱nga̱ ma̱ a̱livu a ta uwwa wovon wa ala a̱ A̱sulazuva waru diga asana a ta uwwa wovon u tsugbain tsa̱ yi. Adama a na u ta̱ ta̱wa̱ tsu uɗolu wi ilaɗi lon, za na upepu wa̱ A̱sulazuva woo losu. 20 <<Za va Atsupu ta̱ ta̱wa̱ Sihiyona, uba̱ta̱ wa aza a Yakubu a na a vadalai a̱ nusu le,>> A̱sulazuva a ɗa a dammai.

21 <<Ya̱'a̱ va̱ gba, a̱yi nda a̱yi ɗa akucunu a̱ va̱ ne ele,>> A̱sulazuva a ɗa a dammai. <<Ruhu va̱ na ri oɓolo na̱ a̱ɗu na adanshi a̱ va̱ a na n zuwai o una̱ u ɗu waa kasa nu una̱ u ɗu shi, ko na̱ muwun n ɗu shi ko a̱ na̱ m muwun mu gundo le shi diga a mantsa ma nda a̱ 'ya̱wa̱ waru hali hali hali,>> A̱sulazuva a ɗa a dammai.