1 O urana u ndolo a ta cana ishipa i nda a̱tsuma̱ e iɗa ya Yahuda, <<Tsu ta̱ na̱ lyuci vu ucira, A̱sula̱ a yuwan ta̱ iwawi wo o'wo isula nu uɓaɓu wa̱ yi. 2 Kpa̱tu'wa̱i na̱ntsu na iɗa ya̱ a̱ɓula̱ yaa uwa, iɗa i na i ri na̱ a̱ɓula̱. 3 Vu tsu ca ta̱ nden ma asuvu ma amayun suru suru, aza a na okolo e le a̱ ri mishin ugbamu, adama a na a zuwai ucira u le ya̱'a̱ wu. 4 Zuwai ucira uba̱ta̱ wa̱ A̱sulazuva hali hali, adama a na A̱sulazuva, A̱sulazuva a ɗa upa'atan u babu ukotu. 5 U ka̱ɗa̱to ta̱ aza a na a̱ ri a̱ nden uba̱ta̱ wa zuva, u cipa̱to ta̱ lyuci na ri zuva e iɗa. Wo oco yi ta̱ hali a̱ tyo e iɗa a̱vu wo oco yi a̱ ma̱buta̱. 6 A ta dasa yi na ana a aza a na o ɓongiyi, ana a̱ a̱za̱ o ulambu. 7 Ure va̱ a̱za̱ a̱ɓula̱ u ka̱ra̱ ta̱ mejege, a̱vu Za va̱ A̱ɓula̱. Vu yuwan ta̱ ure wa̱ a̱za̱ a̱ a̱ɓula̱ pete. 8 A̱tsu a̱tsuma̱ o ure wu uge'etosu wa̱ wu, A̱sulazuva tsu puro wu ta̱. Ala a̱ wu nu ucuwusan wa̱ wu a̱yi ɗa majiyan mo okolo a̱ tsu. 9 Okolo a̱ va̱ a ta majiyan ma̱ wu na ayin, nu usana ruhu va̱ te e ibingi ya̱ wu na amayun. Adama a na na̱ vu ge'eto uvaɗi ama o uvaɗi o to rito mayan ma̱ a̱ɓula̱. 10 Ko no o roco ta̱ za vi iwuya isa'ani, woo rito mayan ma̱ a̱ɓula̱ shi, ko pa nda e iɗa ya̱ a̱za̱ a̱ a̱ɓula̱ a lyuwa ta̱ elime na̱ mayan me iwuya, waru e ene tsugbain tsa̱ A̱sulazuva shi. 11 A̱sulazuva, vu 'ya̱sa̱n ta̱ ukere wa̱ wu zuva, agba e ene yi shi. Lyawa le e ene ukadu wa̱ wu uba̱ta̱ wa ama a̱ wu, waru a uwwa wono. Lyawa akina a na o foɓoyi n'yuwatan ma̱ wu a lyuwa le. 12 A̱sulazuva, vu ta zuwaa tsu nden ma asuvu, ili i na tsu yuwain suru a̱vu ɗa vu kamba ntsu. 13 A̱sulazuva A̱sula̱ a̱ tsu, babu na̱ a̱vu ozo o ro a yuwan ta̱ tsugono tsa̱ tsu, amma ala a̱ wu ɗa goon tsaa cuwusan. 14 Gogo a̱ kuwa̱ ta̱, waru a̱a̱ da̱shi yuwan wuma shi, lulu le va̱a̱ 'yon shi. Vu ca le ta̱ a̱tsuma̱lima̱ a̱vu vu kototo le, babu za na a̱a̱ da̱shi cuwan ne ele. 15 Amma vu da̱shi ta̱ a̱bunda̱ a ama'a, A̱sulazuva, vu da̱shi ta̱ a̱bunda̱ a ama'a. Vu tsura̱a̱ ta̱ aciya̱wu tsugbain, vu da̱shi ta̱ kpa̱tu'wa̱ suru kosu vi iɗa. 16 A̱sulazuva a̱tsuma̱ a̱tsuma̱lima̱ a zami wu ta̱. Ana vu ca nle a̱tsuma̱lima̱ a gura uta̱a̱ uɗyo a yuwan avasa shi. 17 Cine ka va̱ a̱tsuma̱ tsu da̱nu teri e imingiru e mesun adama a̱ mɓa̱la̱, ne ɗa tso o'woi a̱ ma̱ka̱ka̱n ma̱ wu A̱sulazuva. 18 Tsu yuwan ta̱ a̱tsuma̱, reve tsu reme imingiru, agba babu ili i na tsu matsain she upepu. Tsu ta̱wa̱ ni iwawi o uvaɗi shi, waru tsu matsan ama o uvaɗi shi. 19 Ama a̱ ɗu a na a̱ kuwa̱i a̱ ta̱ tsura̱ wuma, lipu le ta̱ 'yon. A̱ɗu aza a na a̱ ri nden a̱ ma̱bula̱, 'yoyin i cana ishipa i ma̱za̱nga̱. Adama a na a'iza a̱ wu a'iza e ekan a ɗa, waru iɗa i to uta̱a̱ aza a na a̱ kuwa̱i. 20 Ka̱ra̱i a̱ɗu ama a̱ va̱, i uwa a asula a̱ ɗu, a̱vu i ɓa̱ru na̱ntsu ɗu. I pa'aton aciya̱ɗu hali ma mantsa wa'a hali she nu upa'an u ka̱ra̱. 21 Uwwai nda, A̱sulazuva a̱ ta̱ ta̱wa̱ diga uba̱ta̱ u na u ri nden u ca ama o uvaɗi a̱tsuma̱lima̱ adama o unusu u le. Iɗa i ta̱ kpa̱tu'wa̱ mpasa n na o ocoi zuva va̱ yi, waru wa̱a̱ da̱shi soko aza a na o unai shi.>>