1 A̱vu A̱sulazuva a damma mu, <<Tara aakpata e iɗana a gbain, a̱vu vu yuwan ɗe iɗana na̱ maɗanutsu ma ndana, Za va Maha-Shalal-Hash-Baz.* 2 Waru n te ɗe Uriya ganu na̱ Zakariya ulobo wa Jeberekiya aza a na maa gura zuwaa ucira o o'wo mu esu.>>

3 Reve n von na̱ ka va̱, vumava̱sula̱, a̱vu u yuwan a̱a̱tsuma̱ ɗaɗa u matsain ulobo. A̱vu A̱sulazuva a damma mu, <<Ca yi aala Maha-Shalal-Hash-Baz. 4 Kafu ulobo'o u reve cine waa damma <Dada va̱> ko <Mma va̱,> mogono ma Asuriya ma̱ ta̱ pura̱ utsuru wa Dimaska na̱ za va Samariya.>>

5 A̱vu A̱sulazuva a yuwisan adanshi na̱ a̱mu, 6 <<Adama a na ama a nda a 'yuwain mini ma̱ Shilowa ma na mee yeneshe ben, a̱vu a yuwan ma̱za̱nga̱ na̱ Rezin nu ulobo wa Remaliya waru, 7 adama o ndolo a̱yi ɗa nda, a̱mu Zagbain n ta̱ ta̱wa̱a̱ le na̱ mini ma gbain mo ucira mo Uɗolu wa̱ Yufireti, mogono ma Asuriya oɓolo nu ucira u tsugbain tsa̱ yi suru. U to shiton uba̱ta̱ suru hali u pasa nge'en ma̱ yi suru, 8 reve u yene a uwa a̱tsuma̱ a Yahuda, u ta shiwan o utula̱i pe hali u rawa a̱ yinlu. Evelu a̱ wuba̱ruwu a̱ yi a ta pala a̱tyo e iɗa ya̱ wu, Imanuwe!>> 9 Ɓolotoi a̱ɗu ama a nɗa n ro a̱vu o una ɗu! Poloi atsuvu a̱ɗu nɗa ma alanga. Foɓoi uvon, agba o to kototo ɗu! Foɓoi uvon, a̱vu o una ɗu! 10 Sa̱la̱la̱i agba u to o'wo pere, yuwain adanshi, agba wee isawan shi, adama a na A̱sula̱ a̱ ta̱ oɓolo na̱ a̱tsu.

11 A̱sulazuva a yuwan ta̱ adanshi na̱ a̱mu nu ukere wu ucira wa̱ yi oɓolo na̱ a̱mu a ɓarasa mu she n kuru ure wa ama a nda wan. U damma ta̱, 12 <<She vu usu vu ɗe ili i na suru ama a nda ee ɗesu nsata, nsata wan. She vu uwwa wovon wi ili i na ama a nda aa uwwusa wovon wan waru she vu suma yi wan. 13 A̱mu A̱sulazuva o oɓolo a̱ a̱soja a zuva a̱yi ɗa za va akiza, a̱yi ɗa vaa uwwa wovon, a̱yi ɗa za na vaa suma. 14 U to o'wo a̱a̱'isa̱, agba e ekere a 'wa re va Isra'ila u to o'wo le aatali o uta̱ɗa̱tsa̱sa̱ na aatali a na a̱ tsu ta̱wa̱a̱ na̱ a̱risa̱. Uba̱ta̱ wa̱ a̱za̱ a̱ Urishelima u to o'wo le maza na̱ yakuru. 15 Ama na̱ a̱bunda̱ a̱ ta̱ ta̱ɗa̱tsa̱, a̱ ta̱ riya̱ a̱vu a kuɗa, a ta azu le a̱vu e reme le.>> 16 Guza̱i adanshi a̱ va̱ a̱vu i ca ojoro a̱ va̱ uritosu u va̱. 17 N to puro A̱sulazuva, za na oo sokosu u'wa wa Yakubu urewesu wa̱ yi. N ta zuwa ucira u va̱ ya̱'a̱ yi.

18 A̱mu ɗa nda na̱ muwun n na A̱sulazuva a ca numu. Tso o'wo ta̱ iroci no oroci a tsuɓari a̱tsuma̱ a Isra'ila diga uba̱ta̱ wa̱ A̱sulazuva o oɓolo a̱ a̱soja a zuva, za na ri nden a Masasan ma̱ Sihiyona.

19 Reve na ama a damma ɗu i 'ya̱wa̱ uba̱ta̱ wo oboci na̱ a̱kwisa̱kwisa̱ aza a na a tsu yuwan adanshi tsa̱ ididi na̱ yemenu, ama a̱a̱ bungi e ekere a̱ A̱sula̱ e le shi? Adama a̱ nye a̱ bungishi e ekere a̱ a̱kwa̱kwa̱ o una̱ wa aza a wuma? 20 A̱ bungi uritosu na adanshi a̱ A̱sula̱! Na aa yuwan adanshi adama a adanshi a nda shi, a̱a̱ tsura̱ ekan a wuma u le shi. 21 A̱ ta̱ da̱na̱ a agara a̱tsuma̱ e iɗa'a a̱tsuma̱ a̱ a̱tsuma̱lima̱ na ambulu. Reve no o sowo ambulu, a ta yuwan upan lon a̱vu a yuwan adanshi a vama e ekere o mogono me le na̱ A̱sula̱ e le. A̱ ta̱ 'ya̱sa̱n urewesu u le a̱ ka̱lyuwa̱ zuva. 22 Reve a̱ ka̱lyuwa̱ iɗa, reve e ene a̱tsuma̱lima̱ can ni irumbu, mɓa̱la̱ n wovon lon, a̱vu a̱ ca̱co le a̱tsuma̱ e irumbu pici.