1 Ta̱wa̱i zuzu a̱ɗu nɗa, yu uwwa, i polo atsuvu, a̱ɗu ama! Lyawa iɗa yu uwwa, ni ili i na i ri pe a̱tsuma̱ a̱ yi biti, uvaɗi ni ili i na yoo utusa̱ a̱tsuma̱ a̱ yi biti! 2 Adama a na A̱sulazuva a̱ ta̱ o upan na̱ nɗa suru, u ta yuwusan upan lon na̱ a̱soja e le suru. U to kototo le suru suru, u ca le ta̱ adama a mapaɗa. 3 A ta vari aza a na a paɗai, ushamu wa̱ a̱kwa̱kwa̱ e le u ta̱ 'yon. Nsasan n te yene na̱ mpasa n le. 4 Oɓolo e italyo'o ya zuva suru e te jeruwe, a̱vu eleshe suru a̱ kutsulu tsa aatagada. Italyo'o suru i ta̱ riya̱ tsa akpanli a̱ a̱vu'un a ataci, tsa̱ muwun mu ubiri n na n 'yewei o uɗanga wu ubiri. 5 Matsun me pe'eni ma̱ va̱ mo sowo ta̱ u cuwa̱n diga zuva, a̱yi ɗa nda a̱ cipa̱ adama o uge'etosu a aci a Edom, ama a na n tawai adama o ukototosu. 6 Matsun me pe'eni ma̱ A̱sulazuva ma̱ cuwa̱n ta̱ na̱ mpasa, u shiwan ta̱ na̱ mani'in, mpasa mi ikyon na̱ za vu mgbele, mani'in ma a'ilu ma̱ a̱giri'i. Adama a na A̱sulazuva a̱ ta̱ na̱ kucci na waa yuwan a Bozura, na mona ma gbain e iɗa ya Edom. 7 Ogono e inan yu una a̱ ta̱ riya̱ oɓolo ne ele, muba̱jini na̱ a̱ba̱jini a gbagbain. Iɗa i le i ta̱ re'we na̱ mpasa, a̱vu ma̱bula̱ me le mo o'wo ure'u na̱ mani'in. 8 Adama a na A̱sulazuva a̱ ta̱ nu urana u na waa tsupa, aa'wan a na waa lapula ili adama a̱ Sihiyona. 9 Ɗolu va Edom to o'wo erepu a kwalta, ma̱bula̱ ma̱ yi waru mo o'wo akina a̱ fa̱rin wuta. Iɗa ya̱ yi i to o'wo erepu a kwalta a madala! 10 Ayin nu urana wa̱a̱ kima̱ shi. Mikyon ma̱ yi n ta̱ da̱na̱ a gawusan babu ukotu. Diga mantsa a̱ tyo mantsa u to o'wo okongo, ko vuma buwa a̱ da̱shi utula̱i na̱ pe shi ko ke'en. 11 A̱pa̱mo ni ivori i ɗa yoo o'wo ni iɗa'a, a̱pa̱mo na akakan a ta yuwan ɗe nkinda. A̱sulazuva o to rito iɗa i ndolo ulobonu. U to rito yi adama u ka̱mba̱ iwa̱u nu ukotosu. 12 Azagbain a̱ yi, a buwa ni ili i na ee ɗe tsugono ɗe shi. Azagbain a̱ yi suru o to koto. 13 Awanda a ta kungwa a saa vu ucira va̱ yi, ma̱lyo ma ta shiwan e ilyuci i na i ri na̱ ɓaɓu. U to o'wo uba̱ta̱ wu nden m musa̱n mu una na azamina. 14 Inama yu una i ta ga'an na̱ nkunzu, mgbele mu una n saala a̱za̱ e le, waru ili i wuma ya ayin i ta̱ da̱nu pe, a̱vu a̱ tsura̱a̱ aciyele wivuwatan. 15 A̱a̱pa̱mo a ta yuwan ɗe nkinda a̱vu u zuwa okowo, u ta gyu'wan le a̱vu u va̱pa̱ muwun ma̱ yi e evelu a̱ yi, ɗe ɗa waru ajimba oo ɓoloto, koyan na̱ vali va̱ yi.

16 Ka̱lyuwa̱ a̱tsuma̱ a aatagada a̱ A̱sulazuva a̱vu vu ɗenuna̱. Ko za ta̱ a̱tsuma̱ e le a̱a̱ puwa̱n shi, ko za ta̱ aa lamba za va̱ yi shi. Adama a na una̱ wa̱ A̱sulazuva a ɗa a zuwai ne, waru Ruhu va̱ yi ɗa ɓoloto nle. 17 A̱sulazuva a ɗa e ne'eshen nle a̱yi, ukere wa̱ yi u ɗa u ca nle akunda ukunzuwu. O to o'woto yi za le hali hali hali. A̱ ta̱ da̱nu pe diga mantsa a̱ tyo mantsa.