1 A̱sulazuva e te ene iliyali ya Yakubu, waru u ta̱ da̱shi ɗangwisa Isra'ila a̱vu u da̱na̱to le e iɗa i le. Omocin o to ɓolo ne ele a̱vu o ɓolo nu u'wa wa Yakubu. 2 Nɗa n ta tara le a̱vu a̱ ta̱wa̱to le e iɗa i le. Reve u'wa wa Isra'ila u zuwa le o o'woo le agbashi ali na̱ a̱ma̱ci e iɗa ya̱ A̱sulazuva. E te reme aza a na a̱ shi e reme nle tsa agbashi o o'wo agbashi e le reve a yuwan tsugbain a aci a aza a na a̱ shi o ɓongi nle.

3 A mantsa ma na A̱sulazuva a ca nɗu wivuwun wa̱ a̱tsuma̱lima̱ na addama nu ulinga wu usa̱n u na a zuwaa nɗu, 4 i yuwaan mogono ma Babila udammu u nda, <<Za vi iɓongi koto ta̱! Upan wa̱ yi u koto ta̱! 5 Adama a na A̱sulazuva a kuɗa ta̱ aaɗanga a za vi iwuya, aaɗanga a za azagbain, 6 za na fabai ama nu upan oɓolo nu wulapu u babu ukotu, nu upan u ɗa u yuwain tsugbain tsa nɗa ni iɓongi babu lyawa. 7 Nɗa suru n tsura̱ ta̱ wivuwun oɓolo na̱ nden ma asuvu, a̱vu o ɓoso ni ishipa.>> 8 Ko ɗanga sapure na̱ ɗanga sida va Lebanon a yuwaan wu ta̱ ma̱za̱nga̱, a dansa, <<Ana a̱ ka̱mba̱to nuwu za̱la̱, babu ozo o mokoɗo ma ɗanga ma na mo koɗo ntsu a̱ tyo e iɗa.>> 9 Uba̱ta̱ wu nden wa̱ a̱kwa̱kwa̱ u ta̱ jinga̱ɗa u da̱na̱ ufoɓu u na waa ga'aton wu. A̱vu u 'ya̱sa̱n nan ruhu va aza a na a̱ kuwa̱i a raba wu, nan ruhu va azagbain o uvaɗi suru. A̱vu waru u 'ya̱sa̱n nan ruhu vu ngono mu uvaɗi ɗe o otogu o tsugono tse le. 10 Suru nle a̱ ta̱ usu wu a damma, <<A̱vu fo vo o'wo ta̱ babu ucira cine a̱tsu tsu ri, vo o'wo ta̱ tsa̱ tsu.>> 11 Ucira wa̱ wu na̱ tsugbain tsa̱ wu a̱ ciɗo wu ta̱ ne ele, oɓolo na̱ mesun me ikumburu ma̱ wu. Gogo tsunda azun a ɗa a̱ ri za̱la̱ va̱ wu tsa aavalu, azun a ɗa o o'woi ili i wupalu ya̱ wu. 12 Cine vu riya̱i diga zuva, a̱vu zangaɗa* a̱vu mawun mo usana! A vari wu ta̱ a̱ cipa̱ o uvaɗi, a̱vu na vu variyi nɗa e iɗa. 13 A̱vu vu damma ta̱ o okolo a̱ wu, <<N ta kumba a̱ 'ya̱wa̱ zuva, a̱vu n 'ya̱sa̱n ootogu a̱ va̱ zuva vi italyo'o ya̱ A̱sula̱, n ta̱ da̱nu o ootogu o tsugono a masasan mo uga'asusan ma̱ musula̱ alanga ugana. 14 N ta kumba ɗe zuva ve eleshe, n ka̱mba̱to aciya̱va̱ cine vu revei Mogono ma̱ A̱sula̱.>> 15 Agba a̱vu a̱ ka̱mba̱to wu uba̱ta̱ wa̱ a̱kwa̱kwa̱, za̱la̱ uba̱ta̱ u na u la'ai a̱ru'un. 16 Aza a na e ene nuwu o to o'wo a̱ a̱ka̱nla̱ a̱ wu, a̱vu a̱ ka̱ra̱ a̱ ma̱la̱la̱ ma̱ wu, <<Vuma na jinga̱ɗa̱i uvaɗi a̱vu waru u jinga̱ɗa̱ tsugono tsa ɗa nda'a shi, 17 vuma na ka̱mba̱toi uvaɗi a̱tsumona, a̱yi ɗa u rukutsa̱i ilyuci ya̱ yi shi, waru u lyawa aza a na a̱ ri o u'wa wa ali a̱ yi a̱ ka̱mba̱ o u'wa shi?>> 18 Ngono mu nɗa suru n lantsa ta̱ a tsugbain tse le, za suru a aason a̱ yi. 19 Agba a̱vu gba a lyawa ta̱ lipu va̱ wu a alanga a aason, cine vu revei eten a na a variyi a na a̱ ri nu ulinga shi. A̱vu a pala wu na̱ lipu va̱ a̱kwa̱kwa̱, a̱soja a na o unai na̱ matsun me pe'eni. Oɓolo ne ele ɗa a vari nuwu a̱ a̱a̱ka̱ri a atali, reve a dasa wu. 20 A̱a̱ ciɗo wu cine a̱ tsu ciɗo akapi o ngono shi, adama a na vu kototo ta̱ iɗa ya̱ wu, waru vu una ta̱ ama a̱ wu. A̱a̱ da̱shi cuwan na̱ muwun ma̱ wu shi. A̱a̱ da̱shi ɗe ala a̱ muwun mu za vi iwuya nda shi. 21 I foɓo uba̱ta̱ u na oo una muwun ma̱ yi adama o unusu wu nkaya n le, tsa̱ra̱ a̱ 'yon a̱ ushi agadu e iɗa yi nkaya n le ko o shiton uvaɗi ni ilyuci i le wan. 22 <<N ta̱ 'yon n yuwan uvon ne ele,>> a̱yi ɗa ili i na A̱sulazuva o oɓolo a̱ a̱soja a zuva a dammai. <<N ta tawa aala a Babila na aza a na a buwai, umatsun wa̱ yi nu ugundo wa̱ yi,>> a̱yi ɗa ili i na A̱sulazuva a dammai. 23 <<N ta̱ ka̱mba̱to yi a̱a̱rumbu uba̱ta̱ u na mkponguro ma̱a̱ da̱nusu, n ta̱ raɗa yi na̱ wizu wu ukototosu,>> a̱yi ɗa ili i na A̱sulazuva o oɓolo a̱ a̱soja a zuva ma dammai.

24 A̱sulazuva o oɓolo a̱ a̱soja a zuva a kucina ta̱, <<Cine n foɓoi ne ɗaɗa wa̱a̱ da̱na̱, cine n cigai ne ɗaɗa wee isawan. 25 N to kototo aza a Asuriya e iɗa i va̱, n ta dasa le a nsasan n va̱. A ta tawa ama a̱ va̱ a̱a̱gba̱la̱ e iɓongi, reve a̱ cipa̱to le itana a̱ nlyungu n le.>> 26 A̱yi nda a̱yi ɗa ifoɓi i na n yuwain adama o uvaɗi ma̱ɓula̱, a̱yi ɗa waru ucira wu ukere u na n cananai a aci a nɗa suru. 27 Ana wo o'woi A̱sulazuva o oɓolo a̱ a̱soja a zuva o foɓo ta̱, zane ɗa aa gura vadala yi? U canana ta̱ ukere wa̱ yi, zane ɗa aa gura ka̱mba̱to yi a̱ca̱pa?

28 A aa'wan a na mogono Ahaz kuwa̱i ikaka i nda i ta̱wa̱ ta̱: 29 She i yuwan ma̱za̱nga̱ wan suru nɗu aza a Filistiya adama a na aaɗanga a na a faɓa nɗu a kuɗai, adama a na diga o ookowo o yo'o a̱ ta̱ uta̱ na̱ ruku, waru umatsun wa̱ yi u ta̱ da̱na̱ tsu yo tsukuno tsa tsu'yan. 30 Umatsun wu ufaru wa̱ a̱za̱ o ulambu cacau a̱ ta̱ tsura̱ uba̱ta̱ wa alyuna waru a̱za̱ e izami yi ikambi o to von gbaga. Amma n ta lungusa̱ ikyun ya̱ wu na ambulu, reve wu paɗa aza a na a buwai. 31 Yoo oruwo a̱ɗu na̱ntsu! I shon a̱ɗu ilyuci i gbagbain! Yi jeruwe a̱tsuma̱ o wovon, a̱ɗu aza a Filistiya suru! Mikyon mu uta̱ ta̱ diga ugana, waru babu za na aa lyawa a̱ca̱pa̱ a̱tsuma̱ e le. 32 Cine tsa ɗa vuma a̱a̱ usu nlingata ma Filistiya ? <<A̱sulazuva a̱ shuwa̱ ta̱ Sihiyona, waru a̱tsuma̱ a̱ yi ama a̱ yi a na o sowuso a̱tsuma̱lima̱ a̱ ta̱ tsura̱ upa'atan.>>