1 <<N roco ta̱ aciya̱va̱ a̱ tyo uba̱ta̱ wa aza a na e ece numu shi, aza a na a zami numu shi a̱ tsura̱ mu ta̱. A̱ tyo e iɗa i na i ɗeyi a ala a̱ va̱ shi, n damma ta̱, <Apa mu, apa mu.> 2 Urana ma̱ɓula̱ n canana ta̱ ekere a̱ va̱ a̱ tyo uba̱ta̱ wa ama a na a̱ 'ya̱susa̱n ugbozu, aza a na a walai o ure u na u ri ulobonu shi, o tonishi majiyan me ele. 3 Ama a na a tsu zuwa mu upan a̱ ma̱ka̱ka̱n ma̱ va̱ mantsa suru, a casu kucci a aruma va̱ a̱ma̱li e le. Waru a̱a̱ kula̱tosu a̱tsuka̱ a̱ ma̱guru e iponu, 4 aza a na a̱ tsu da̱nu a ason reve a asa uba̱ta̱ wu usokowu ayin ma̱ɓula̱. Aza a na a tamusa inama yu ngurusumu, na̱ pondo na ri na̱ mayan vi inama yi idaba. 5 Aza a na a dammai, <Yi isawan alanga. She i ta̱wa̱ zuzu na̱ a̱mu wan, adama a na n ta̱ na akiza lon a̱ tyo e ekere a̱ ɗu!> Icu'un ya ama a nda mikyon n ɗa a̱ vunu va̱, akina a na a̱ tsu kima̱ shi hali usana. >> 6 Uwwai nda, u tu uɗanu e ekere a̱ va̱, <<Ma̱a̱ rungwa̱ shi, amma n ta tsupa, n ta tsupa le na amayun, 7 nusu ɗu na̱ nusu vu nkaya n ɗu,>> ne ɗa A̱sulazuva a dammai. <<Adama a na a̱ kula̱toi kucci a nsasan a̱vu o rono mu e iɗa a agaɗi, n ta tsupa le na amayun a akuci a linga le.>>

8 Apa ili i na A̱sulazuva a dammai, <<Cine a̱ tsu tsura̱ masayan ma sa'avu a̱ a̱kutsu a̱ ina̱bi, a̱vu a damma, <She i lungusa̱ yi wan, aba'un a̱ ta̱ pe a̱tsuma̱ a̱ yi,> >> tsundolo tsa ɗa maa yuwaan yi o una̱ wa agbashi a̱ va̱. Moo kototo le suru shi. 9 N ta̱ 'ya̱sa̱n ugundo diga ya Yakubu, waru diga ya Yahuza za na aa tara agadu a nsasan n va̱. Aza a na n ɗangwai o to o'wo ne ele, a̱vu agbashi a̱ va̱ a̱ da̱nu ɗe. 10 Sharon to o'wo uba̱ta̱ wa aguɓa wi ikyun, waru uka̱ri wa Ako uba̱ta̱ u na oɓolo e ikyon o von, adama a ama a̱ va̱ a na a zami numu. 11 <<Amma a̱ɗu na i wasain A̱sulazuva, aza a na e icinai na̱ masasan ma akiza ma̱ va̱, za na foɓoi aapada adama a̱ ma̱sula̱ mo Utsuru a̱vu u shiton mokoto ma na a̱ ja̱mba̱ra̱i na̱ masayan me Ili i na yaa Cina Vuma. 12 Ili i na yaa Cina ɗu n na maa zuwa ɗu a̱yi ɗa ukwa̱ u matsun me pe'eni. Reve suru nɗu i ka̱ɗa̱to uba̱ta̱ u na aa paɗa ɗu, adama a na mantsa ma na n ɗeyi, i usu shi, ana n yuwain adanshi, i zuwa atsuvu shi. Amma reve i yuwan ili yu uwuyanu e esu a̱ va̱, reve i ɗangwa ili i babu ulobonu i na n cigai shi.>>

13 Adama o ndolo apa ili i na A̱sulazuva Zagbain dammai, <<Uwwai nda, agbashi a̱ va̱ a ta lyuwa, amma a̱ɗu i ta̱ da̱na̱ na ambulu. Uwwai nda, agbashi a̱ va̱ o to sowo, amma a̱ɗu i ta̱ da̱na̱ na akuli. Uwwai nda, agbashi a̱ va̱ a ta yuwan ma̱za̱nga̱, amma a̱ɗu i to sowo wono. 14 Uwwai nda, agbashi a̱ va̱ a ta cana adama a̱ ma̱za̱nga̱ mo okolo, amma a̱ɗu i ta̱ shon adama a̱ mɓa̱la̱ mo okolo a̱vu i yuwan a̱tsumola̱ngu adama o ukuɗu u ruhu. 15 I ta lyawa ala a̱ ɗu a̱ tyo uba̱ta̱ wa aza a na n ɗangwai tsu una̱. Reve A̱sulazuva Zagbain o una ɗu, agba agbashi a̱ yi u ta̱ ɗe le na aala o ro. 16 Adama za na suru patiyi aba'un e iɗa'a u ta zuwaa aciya̱yi aba'un e ekere a̱ A̱sula̱ a amayun. Reve za na yuwain akucunu e iɗa'a u ta yuwan akucunu na̱ A̱sula̱ a amayun, adama a na e icina ta̱ akuci a addama waru o soko le ta̱ e esu a̱ va̱.>>

17 <<Uwwai nda, n ta yuwan zuva sa'avu nu uvaɗi u sa'avu, waru ko za a̱a̱ da̱shi cuwan na akuci e ili ko a cuwan ne ele shi. 18 Amma i yuwan ma̱za̱nga̱ i yuwan mere hali hali e ili i na maa yuwan. Uwwai nda, n ta yuwan Urishelima wo o'wo ili i ma̱za̱nga̱, ama a̱ yi waru o to o'wo a̱za̱ a̱ ma̱za̱nga̱. 19 N ta yuwan ma̱za̱nga̱ a aci a̱ Urishelima reve n yuwan mere na ama a̱ va̱. A̱a̱ da̱shi uwwa yisaali i mesun ko mesun ma̱ a̱tsuma̱lima̱ shi. 20 A̱a̱ da̱shi tsura̱ mereɓu ma na maa yuwan wuma rana meketeci goon shi, ko aabara a na o shitoyin rana va̱ yi shi. Za na yuwain a'wan ukpaku (100) a ta tara yi u buwa ta̱ mawun. Reve za na kuwa̱i a̱yi na a'wan ukpaku a damma una̱ u ɗa u reme niyi. 21 Ama ta̱ a̱ da̱nu a 'wa na a suwai. A̱ ta̱ cu'wa̱n a̱ɗuma̱ a ataci reve a lyuwa umatsun u le. 22 A̱a̱ da̱shi suwa a̱vu ozo o ro a̱ da̱nu pe shi, a̱a̱ da̱shi cu'wa̱n reve ozo o ro a lyuwa shi. Cine vu revei rana vu ɗanga ri ne ɗa rana va ama a̱ va̱ a̱a̱ da̱na̱. Ama a̱ va̱ a na n ɗangwai a ta jima a uwwusa uyo'o wu ulinga we ekere e le. 23 Aa yuwan ulinga we pere ko a matsan muwun n na ee ene a̱a̱ kuwusa̱ shi. Adama a na o to o'wo muwun ma aba'un ma̱ A̱sulazuva, oɓolo na̱ gundo le. 24 Kafu e ɗe n ta̱ usu. Ele ubuwu a adanshi n ta uwwa le. 25 Mekerenkesu na̱ mokyokyon a ta lyuna oɓolo, kamu ta tama anlya tsa nan, ma̱buta̱ mo to o'wo ilyalya yi yo. A uwwa usa̱n ko o kototo le a masasan ma akiza ma̱ va̱ suru shi,>> ne ɗa A̱sulazuva a dammai.