1 Uwwai nda, Zagbain, A̱sulazuva o oɓolo a̱ a̱soja a zuva, a̱ ta̱ pura̱ diga Urishelima na̱ Yahuda ili i na aa zuwusaa ucira suru, ni ilyalya na̱ mini suru, 2 na̱ nan yali na̱ a̱soja na̱ a̱za̱ o uge'etosu na ama̱sula̱, no oboci na̱ mbara, 3 na̱ nan yali a̱ a̱soja a kupoton na aza a tsugbain, na̱ a̱za̱ a̱ a̱sa̱la̱ na aza a na a gurai ulinga wu ukere na aza a avasa a̱ a̱ma̱li. 4 Reve n zuwa olobo o o'wo azagbain e le, muwun n kekeꞌen n ɗa moo o'wo azagbain e le. 5 Ama o to ɓongiloi, vuma na̱ vuma, vuma na̱ moron ma̱ nden ma̱ yi. Muwun n ta yuwaan mbara adanshi na aciyogbamu, za na ri ili i ro shi u ta tara zagbain ili ye pere. 6 Vuma te reme mawun ma̱ a̱na̱wun ma̱ yi, a̱vu u damma, <<A na vu ri nu utugu u gbain, voo o'wo zagbain tsu. Vu yuwan tsugbain tso oɓolo a na a̱ riya̱i nda!>> 7 Agba o urana u ndolo u ta saala u damma, <<N ri na̱ a̱guma̱ shi. N ri ni ilyalya ko utugu u gbain o u'wa u va̱ shi. She i zuwa mu zagbain va ama wan!>> 8 Urishelima ta̱ɗa̱tsa̱ ta̱, Yahuda riya̱ ta̱. Adama a na adanshi e le nu ulinga u le u ta̱ nla̱ngi na̱ A̱sulazuva, a tara tsugbain tsa̱ yi ili shi e esu a̱ yi. 9 Adama a na urewesu u le u ge'eto le ta̱. A ta yuwusan unusu u le a alanga eteshe tso Sodom, oo sokosu shi. A̱tsuma̱lima̱ a ta cina le! O ronoo ta̱ aciyele iwuya. 10 Dammai a̱za̱ a̱ a̱ɓula̱ u ta̱ da̱na̱ lafiya ne ele, adama a na a ta lyuwa atsupu e melen me le. 11 A̱tsuma̱lima̱ a ta cina za vi iwuya! Iwuya i ta cina le! Ili i na ekere e le a yuwain a̱yi ɗa aa yuwaan le. 12 Ama a̱ va̱, muwun n ɗa moo ɓongishi le, a̱ma̱ci a ɗa waru aa yuwusan tsugbain tse le. Ayya ama a̱ va̱, aza a na oo ronuso ɗu aɗanga a̱ ta̱ pusa̱sun ɗu, a ta zuwusa ɗu a ɓatsasa ure. 13 A̱sulazuva a̱ 'ya̱wa̱ ta̱ na adanshi a̱ ɗu uba̱ta̱ wu uge'etosu, a̱yi ɗa wee ge'eto nɗa. 14 A̱sulazuva a̱ ta̱wa̱ ta̱ na adanshi a nda a aci a mbara na azagbain a ama a̱ yi: <<A̱ɗu ɗa i lungusa̱i uɗuma̱ u ina̱bi, itana i na i usai a 'wa va alambi a̱ ta̱ a 'wa ɗu. 15 Nye i zuwai yaa minjirisa ama a̱ va̱ yaa gburusa̱ urewesu wa alambi?>> Zagbain ɗa dammai, A̱sulazuva o oɓolo a̱ a̱soja a zuva. 16 A̱sulazuva a damma ta̱, << A̱ma̱ci a̱ Sihiyona a̱ ta̱ na aciyogbamu, a yuwusan mmalu na̱ yinlu mishin, a̱ a̱ka̱nla̱ ne esu a̱ wulumusa̱ a dasasa ana u ta̱ ta̱ na̱ nshingi a yuwusan ilama a ana e le. 17 Adama o ndolo A̱sulazuva a̱ ta̱ ta̱wa̱a̱ na apinyo a aci a̱ a̱ma̱ci a Sihiyona, A̱sulazuva a̱ ta̱ ka̱mba̱to aci e le ogbondo.>>

18 O urana u ndolo A̱sulazuva a ta kasa a̱ma̱ci a̱ Urishelima nu ulobonu u le, nshingi ma ana n le ni ili i tsusheli ya aci e le ni iliyinlu oroci o woto. 19 Ni iliyatsuvu na̱ nshingi na apalutsu, 20 no okokolo na akani a ana ni igbakala ni ikuluba ya aturare ni ilawo i le, 21 na̱ nkawani mu urotsu ma akatsu na̱ nkawani n vunu, 22 na̱ a̱tugu a sa'ani e le na̱ a̱tugu o uga'an e le na apalutsu ni itsa̱n, 23 na amuna e lelele na̱ a̱tugu o okoro ni igele ni i showe.

24 O una̱ u ma̱guru she ushamu u ɗa wa̱a̱ da̱na̱ lo, o una̱ u gbakala she amunga, o una̱ wa̱ a̱nji a maɗava ma sa'ani she ogbondo, waru o una̱ wa̱ a̱tugu e ikebe she akashi, o una̱ wu ulobonu she urotsu. 25 Ali a̱ wu a̱ ta̱ kuwa̱ na̱ matsun me pe'eni, a̱za̱ o uvon a̱ wu waru a̱tsuma̱ o uvon. 26 Na̱ntsu va̱ yi ta yuwan mesun na̱ a̱tsumola̱ngu. Wa̱wa̱wa̱ ɗa wa̱a̱ da̱nu e iɗa.