1 <<Amma gogo she vu polo atsuvu, a̱vu Yakubu aagbashi a̱ va̱, Isra'ila za na n ɗangwai. 2 Mpa ili i na A̱sulazuva a dammai, a̱yi za na yuwan nuwu, za na ruma nuwu diga a̱ a̱a̱tsuma̱, za na aa kambusa wu. She vu uwwa wovon wan, a̱vu Yakubu aagbashi a̱ va̱, Jeshurun za na n ɗangwai. 3 Adama a na n ta̱ tsun mini e iɗa i na i ri na akuli, ɗolu waru e iɗa yu u'yewu. N ta̱ tsun ruhu va̱ a aci a̱ muwun n ɗu, waru aba'un a̱ va̱ o gundo ɗu. 4 O to topo waru a̱tsuma̱ a anlya, tsu ɗanga vu nkyun mu ɗolu na ri e meyene. 5 Za ro ta damma, <A̱mu za va̱ A̱sulazuva ɗa,> za ro waru te ɗe aciya̱yi na aala a Yakubu. Waru za ro ta ɗana o ukere wa̱ yi, <Za va̱ A̱sulazuva,> u ca aciya̱yi na aala a Isra'ila.>>

6 <<Mpa nda ili i na A̱sulazuva a dammai, mogono ma Isra'ila na̱ za na tsupaa niyi, A̱sulazuva o oɓolo a̱ a̱soja a zuva. A̱mu ɗa ufaru, a̱mu ɗa ukosu. A̱ca̱pa̱ a̱ va̱ A̱sula̱ o ro o lo shi. 7 Zane ɗa ri lo tsa̱ va̱? Lyawa wu uta̱ u damma. Waru lyawa u damma a̱vu u pa̱lu'wa̱ a̱ ma̱ka̱ka̱n ma̱ va̱ ili i na i farai diga a mantsa ma na n yuwain ama ɗe o ufaru a̱ va̱ ni ili i na koto i farai shi. Lyawa u damma ili i na ya̱a̱ ta̱wa̱ na̱ a̱ca̱pa̱. 8 She yi da'wan ko yu uwwa wovon wan. Koto n damma wu hali n cuɗuwa wu ɗe nu ujumu shi? Waru a̱ɗu ɗa esu a̱ va̱. Ma̱sula̱ mo ro ta̱ lo a̱ca̱pa̱ a̱ va̱? Babu Aatali o ro, n reve ko za ta̱ shi.>> 9 Suru aza a na aa yuwusan a̱ma̱li pere ɗa, waru itana aa yuwusan ma̱za̱nga̱ ne ele a̱ ri nu urana shi. Aza a na aa yuwan adanshi o una̱ u le nrumba̱ n ɗa, waru a̱za̱ o ulambu wu urevu wi ili ɗa, a ta uwwa wono. 10 Zane ɗa ee she'en ma̱sula̱ mo ro ko u zuɗa a̱ma̱li, za na a̱a̱ da̱shi yi ili i ro shi? 11 Uwwai, a̱yi na ama a̱ yi a ta uwwa wono, a̱za̱ o ulinga wu ukere, ama a ɗa goon. Lyawa suru nle o ɓoloto uba̱ta̱ u ta̱ reve e isawan mishin, a̱ ta̱ gba uwwa wovon na̱ wono. 12 Maruma ma tsu tara ta̱ rumu a̱vu u yuwan ulinga na̱ a̱yi a akinkina, u tsu ruma ta̱ a̱ma̱li na̱ ma̱ka̱ta̱, u tsu lapusa yi ta̱ nu ucira wu ukere wa̱ yi. U tsu uwwa ta̱ ambulu hali u lamba ucira wa̱ yi, waru u tsu sowo mini shi hali u ta̱ka̱lyuwa̱. 13 Za vu ulinga wa akpata tsu rito ta̱ akpata, u tsu rono ta̱ iɗana ɗe na agita e iɗana, reve u she'en yi ni itana yu ulinga ya̱ yi. Reve u yuwan yi oroci a vuma ulobonu, adama a̱ shuwa̱ yi uba̱ta̱ wa̱ a̱ga̱nda̱. 14 U tsu koɗo ta̱ uɗanga u sida ko u ɗangula uɗanga u fir ko za oku waru u tsu lyawa ta̱ uɗanga u kungwa ugbamu a̱tsuma̱ a ɗanga va̱ a̱rumbu. U tsu shuwa̱ ta̱ uɗanga u sida waru iro'i i ɗa i tsu kungwato yi. 15 Vuma tsu daɓa yi ta̱ akina, upasu u ro adama u lyasuwa, upasu u ro waru u tsu kangala ta̱ opopofu. Waru u tsu yuwan ta̱ ma̱sula̱ reve u yuwaan yi a̱ga̱nda̱, u tsu yuwan ta̱ a̱ma̱li na̱ a̱yi reve u kingyo a̱ ma̱ka̱ka̱n ma̱ yi. 16 U tsu kula̱to ta̱ uɓatsulai wa̱ yi, zuva vu uɓatsulai u nda'a u tsu zun ta̱ ɗe inama a̱vu u tama hali u cuwa̱n. Waru u tsu lyasuwa ta̱ hali u damma, <<Ehee mu uwwa ta̱ sheshen, mu uwwa ta̱ uyo'o wa akina!>> 17 Nu uɓatsulai wa̱ yi u ɗa u tsu yuwan ma̱sula̱ a̱ma̱li a̱ yi, u tsu kingyowa̱ yi ta̱ u yuwaan yi a̱ga̱nda̱. U tsu yuwan ta̱ avasa a̱ tyo ya̱'a̱ yi u damma, <<Wawa mu, adama a na a̱vu ɗa ma̱sula̱ ma̱ va̱!>> 18 E reve ili i ro shi, ko a̱ tsura̱ urevu wi ili i ro shi. A̱ ɓa̱ru ta̱ esu e le tsa̱ra̱ e ene wan, waru a̱ ɓa̱ru ta̱ okolo e le tsa̱ra̱ e reve wan. 19 Babu za na yuwain majiyan a asuvu a̱ yi, ko u ri nu ugbozu ko urevu u na waa damma, <<N kula̱to ta̱ uɓatsulai u ta̱ wu uɗanga u nda, waru n kangala ta̱ opopofu zuva va akinkina a̱ yi, n zun ta̱ inama reve n tama. N ta yuwan ili yi idaba na akapi a na a buwai? N ta̱ kingyowa̱ a̱a̱gba̱la̱ o uɗanga?>> 20 Okomo a ɗa waa lyuwusa, majiyan ma̱ wulumu ma̱ yi ma̱ pusa̱n yi ta̱, waru waa gura wawa aciya̱yi shi ko we ece, <<Ashe epen ɗa a̱ ri o ukere u sa'ani u va̱ shi?>> 21 <<Vu cuwan ni ili i nda, a̱vu Yakubu adama a na a̱vu aagbashi a̱ va̱ a ɗa a̱vu Isra'ila. N yuwan wu ta̱, a̱vu ɗa aagbashi a̱ va̱ a̱vu Isra'ila, me icina na̱ a̱vu shi. 22 Mi iza̱ ta̱ unusu wa̱ wu tse eleshe waru tsa̱ megeve mo usana. She vu ka̱mba̱ uba̱ta̱ u va̱ adama a na n tsupaa wu ta̱ ɗe. 23 Yuwain ishipa i ma̱za̱nga̱, a̱ɗu zuva, adama a na A̱sulazuva a ɗa a yuwain ili i nda! Oruwoi lon a̱ɗu iɗa ya̱ a̱ru'un! Ɓosoi ni ishipa, a̱ɗu nsasan, a̱ɗu a̱rumbu, na̱ ɗanga na ri pe suru, adama a na A̱sulazuva a tsupaa ta̱ Yakubu, waru u ta̱ tsura̱ tsugbain pe Isra'ila.>>

24 Mpa ili i na A̱sulazuva a dammai, za na Tsupaa nɗu, za na yuwan nɗu diga a̱ a̱a̱tsuma̱, <<A̱mu ɗa A̱sulazuva za na yuwain ili suru, za na a̱yi ɗa goon wu ba̱ruwa̱i zuva, a̱mu ɗa goon n valai uvaɗi na aciya̱va̱.>> 25 Za na tsu kacara iroci ya ama̱sula̱ e epen, za na tsu ka̱mba̱to a̱za̱ a̱ yindi olo. Za na tsu vadala urevu wa̱ a̱za̱ o urevu, reve u ka̱mba̱to urevu u le tsulo. 26 Za na tsu shiton adanshi a agbashi a̱ yi waru u shiton ili i na nlingata n va̱ n dammai. Za na dammai adama a̱ Urishelima, << <U ta̱ da̱na̱ na̱ a̱za̱ a̱ nden pe,> waru e ilyuci ya Yahuda, <A ta suwisa le,> waru, <N ta̱ 'ya̱sa̱n okongo e le,> 27 za na dammai a̱ru'un a mala, <Vu 'yewe! Waru n ta̱ 'yeweto ɗolu va̱ wu,> 28 za na dammai Sayiru, <A̱yi ɗa za va aguɓa a̱ va̱ waru u to shiton ifoɓi i va̱ suru,> u ta damma adama a̱ Urishelima, <Lyawa a suwisa yi,> >> na adama a̱ A̱a̱'isa̱, <<Lyawa a̱ shuwa̱ ikyun ya̱ yi.>>