1 <<Reve A̱sulazuva a damma, a̱tsuma̱lima̱ a ta cina ɗu muwun ma aciyogbamu aza a na a tsu yuwan ifoɓi i na i ri za va̱ shi, aza a na aa yuwusan ifoɓi i na i ri za va̱, amma na̱ ruhu va̱ shi, aa yuwusan unusu a aci o unusu. 2 Aza a na a lapai a̱ tyo Masar agba a zami a̱sa̱la̱ a̱ va̱ shi, aza a na aa zamishi ikambishi uba̱ta̱ wa Firi'awuna waru aa zamishi upa'atan o ululu wa Masar. 3 Amma ugeshu u na Firi'awuna ee geshe ɗu u to zuwa ɗu yo o'wo ɗu ili i wono, waru upa'atan wa Masar u ta zuwa ɗu yo o'wo ili yi izo'oshi. 4 Ko na wo o'woi azagbain a̱ yi a rawa ta̱ ɗe Zowan waru nlingata ma̱ yi n rawa ta̱ a̱tsuma̱ a Hanes, 5 za suru u ta uwwa wono diga uba̱ta̱ wa ama a na a̱a̱ ta̱wa̱a̱ le ni ikambishi shi, aza a na a̱ tsu ta̱wa̱ ni ikambishi ko ulyuwu we elime shi, amma she ili i wono ni izo'oshi.>>

6 Ikaka adama e inama ya Nege. O uta̱la̱i e iɗa ya addama na̱ a̱tsuma̱lima̱, iɗa yi ikamu na̱ a̱ma̱ci e ikamu na agbaji ni iruku, utanuwu nu utsuru u le o nloli. Waru itana yi izuwa i le utanuwu o oboto a arakumi a̱ tyo e iɗa i na i ri nu ikambishi shi. 7 Ikambi i na Masar aa yuwan pere ɗa. Adama o ndolo a ɗa n ɗe niyi Rahab na tsu da̱nu babu yuwan ili. 8 Waru gogo she vu 'ya̱wa̱ vu ɗana idanshi i nda a aɓaci a atali waru vu ɗana le a̱tsuma̱ a atagada o ukutsuluwu, adama wo o'wo le urotsu hali hali a mantsa ma na ma̱a̱ ta̱wa̱. 9 Ele nda ele ɗa ama a aciyogbamu, muwun me epen, muwun n na n tsu ciga mu uwwa adanshi a̱ A̱sulazuva shi. 10 A damma ta̱ a̱za̱ a̱ yindi, <<She i da̱shi ene alavu alavu!>> Adansa ama̱sula̱, <<She i da̱shi damma tsu alavu alavu e ili ya amayun wan! I damma tsu ili yu uyo'o, damma ntsu epen. 11 Buwaa ntsu ure, i takatsuwa tsu lo ure na adanshi a Za va Akiza va Isra'ila o ndolo.>>

12 Adama o ndolo mpa ili i na Za va Akiza a Isra'ila a dammai, <<Adama a na i 'yuwan ta̱ ikaka i nda, reve i zuwa ucira uba̱ta̱ e iɓongi na̱ a̱lumu, 13 adama o ndolo unusu u nda u to o'wo ɗu tsu uɓatsu wu uɓaɓu wu uga'an, uɓaɓu u na u ri mishin babu ucira. A̱risa̱ a̱ yi o to o'wo babu urevu. 14 U to ɓuɓoso miri miri tsu upondo u ci'in, za na mumurai suru suru hali a na a̱a̱ tsura̱ ayimba a na aa gura kene akinkina e elele shi ko o ko'o mini na̱ a̱yi diga o ura'atsu shi.>>

15 Mpa nda ili i na A̱sulazuva Zagbain Za va Akiza a Isra'ila a dammai, <<Ni i ka̱mba̱ a̱vu i vadala i ta̱ tsura̱ iwawi, a̱tsuma̱ o uvotowun wu ugbozu nu ucawu wo okolo ya̱'a̱ va̱ i ta̱ tsura̱ ucira. Agba reve i 'yuwan. 16 Reve i damma, <O'o, tsu ta suma zuva vi ido.> Adama o ndolo i ta suma! Reve i damma waru, <Tsu ta kumba ido i na i ri ni ilaɗi lon.> Adama o ndolo aza a na aa saɓa ɗu a ta la'a ɗu ilaɗi. 17 A̱soja a̱ ɗu ukpakukupa kupa a ta suma ne e ene vuma ta̱ a̱tsuma̱ a aza a na aa yuwusan nla̱ngi na̱ a̱ɗu. Na̱ ye yene ama o ton a̱tsuma̱ a aza a na aa yuwusan nla̱ngi na̱ a̱ɗu suru nɗu i ta suma. Babu ili i na yaa buwa a̱tsuma̱ o oɓolo a̱ a̱soja a̱ ɗu she aaɗanga a atuta a̱ ɗu goon zuva masasan, tsa atuta a aagaɗi. 18 Suru na̱ ne A̱sulazuva a ta pura u yuwaan ɗu isa'ani, u tu ufoɓu na woo roco ɗu isa'ani. Adama a na A̱sulazuva A̱sula̱ a̱ a̱ɓula̱ a ɗa, za va aba'un a ɗa suru za na puro niyi.>>

19 Amayun ama a̱ Sihiyona, aza a na ri a̱tsuma̱ a̱ Urishelima, ya̱a̱ da̱shi shon shi. Na amayun u ta yuwaan ɗu isa'ani a mantsa ma na i 'ya̱wa̱i na̱ mesun ma̱ ɗu uba̱ta̱ wa̱ yi. A̱yi a uwwa ɗu u ta̱ usushi nɗu. 20 Ko na wo o'woi Zagbain ca ɗu ta̱ a̱tsuma̱lima̱ tsa tsuwa na̱ mɓa̱la̱ tsa̱ mini mo oso, suru na̱ ne manlu ma̱ ɗu ma̱a̱ da̱shi da̱nu upa'awun shi, ne esu a̱ ɗu a ɗa yee ene yi. 21 Waru atsuvu a̱ ɗu a ta uwwa adanshi a̱ca̱pa̱ a̱ɗu, adansa, <<Nda ɗa ure'e, kuru niyi,>> mantsa ma na i vadaluwai usa'ani ko ugula̱. 22 I ta̱ lungusa̱ a̱ma̱li a̱ ɗu aza a na a surai na̱ azurufa, na̱ ma'an ɗu na a palai na̱ zinariya. I ta vari le tsa akashi a̱ a̱shinda̱ a ka. Reve i damma le, <<Walai!>>

23 Waru u ta̱ lyunguwa̱ ɗu ni iro'i adama e icu'un i na i cu'wa̱in e iɗa, waru ilyalya i na ya̱a̱ tsura̱ e iɗa'a u ta̱ da̱na̱ ulobonu na̱ a̱bunda̱. O urana u ndolo iliyamunga i ɗu waru a̱ ta̱ tsura̱ uba̱ta̱ wa alyuna pere. 24 Inan na̱ nloli n na maa yuwusan ulinga o uɗuma̱ a ta lyuwa ilyalya i na i la'ai ulobonu i na a lapulaa nle na̱ sheburu na̱ sheburu va akatsu. 25 Waru a masasan mo uga'an suru na aagaɗi o uga'an suru muɗolu n te yene na̱ mini, o urana u na aa yuwan mona a̱bunda̱ a mantsa ma na atsura a̱a̱ riya̱. 26 Waru, ekan o woto e te ikana tse ekan o urana. Ekan o urana waru u ta̱ da̱shi toto ucindere tse ekan tsa̱ rana cindere, a mantsa ma na A̱sulazuva a̱ nla̱sa̱ ama a̱ yi a na a kukuɗai reve waru u ka̱mba̱to le gbaga a antsu a na u ta̱wa̱a̱ nle.

27 Uwwai nda, alanga a ɗa ala a̱ A̱sulazuva oo utusa̱, a̱ ma̱kula̱ nu upan, na̱ mikyon n na ma̱a̱ 'yosun da̱n. Adanshi o una̱ wa̱ yi a̱ ta̱ tapu nu upan, elentsu a̱ yi waru tsa akina o ukula̱tosu a ɗa. 28 Wivuwun wa̱ yi waru tsa̱ mini ma̱ a̱bunda̱ mo uɗolu ma ɗa za na shiwain hali a rawa a̱ yinlu. U ta̱ sa̱ka̱ɗa̱ nɗa na̱ a̱a̱susu o ukototsu. U ta zuwa alinzamu a̱ na̱ le adama u zuwa le a ɓatsa ure. 29 Waru i ta yuwan ishipa tsa ayin a̱ a̱buki a akiza a na a zuwai. Waru okolo a̱ ɗu a ta yuwan ma̱za̱nga̱ cine ama a tsu lapa a gawan ni igbala a̱ wivulu a̱ tyo a masasan ma̱ A̱sulazuva, aatali a Isra'ila. 30 A̱sulazuva a ta zuwa a uwwa uɗyo wa̱ yi u tsugbain. Waru u ta zuwa e ene ucipu wu ukere wa̱ yi za vu upan ne elentsu a akina za vu ukula̱tosu na̱ mini me eleshe, nu wunla̱ na atayan. 31 Uɗyo wa̱ A̱sulazuva a ta da'waton aza a Asiriya. Na aaɗanga a tsugbain tsa̱ yi tsa ɗa waa faba le hali she e iɗa. 32 A mantsa ma na suru A̱sulazuva aa fabusa le na aaɗanga o ucasu wa̱ a̱tsuma̱lima̱ a̱ yi a̱ ta̱ da̱na̱ a tsuwe'e tsa aganga ni igaraya, a̱yi a̱ 'ya̱susa̱n ukere wa̱ yi a yuwusan nla̱ngi ne ele a̱tsuma̱ o uvon. 33 Adama a na o foɓo ta̱ uba̱ta̱ o ukula̱tosu nu ujumu, amayun o foɓo yi ta̱ adama o mogono'o. A yuwan ta̱ a̱ka̱ri a washin na̱ a̱ru'un, o shiton yi ta̱ na akina na̱ ɗanga va̱ a̱bunda̱. Wivuwun wa̱ A̱sulazuva a ɗa waa kaɓato akina'a, tsu uɗolu u farinwuta.