1 Zane ɗa usuyi ikaka i tsu? Waru zane ɗa o rocoi ukere wa̱ A̱sulazuva? 2 U kungwa ta̱ a̱ ma̱ka̱ka̱n ma̱ yi tso ototopi, tsa aaralu a na o uta̱i e iɗa yu u'yewu. U ri nu uruma ko ulobonu u na tsa̱a̱ ka̱lyuwa̱ yi shi, u ri no oroci a maluwa ma na tsaa ciga yi shi. 3 A tara yi ili i ro shi waru ama a 'yuwan yi ta̱, vuma na ri tapu na̱ a̱tsumola̱ngu, waru a̱tsuma̱lima̱ o o'wo niyi lipu. Tsa vuma na ama a tawai esu e le a tara yi ili i ro shi, a̱tsu waru tsu ka̱mbuwa̱ yi ili i ro shi. 4 Suru na̱ ne u tara ta̱ banakun tsu, reve waru u tanu a̱tsumola̱ngu a̱ tsu, reve tsu jiyan a̱tsuma̱lima̱ a̱ yi uge'etosu u ɗa, waru a̱tsuma̱lima̱ a̱ yi uba̱ta̱ wa̱ A̱sula̱ a ɗa wu uta̱i. 5 Amma a sapa yi ta̱ adama o unusu u tsu, a amaton yi ta̱ adama e iwuya i tsu. A̱tsuma̱lima̱ a na a̱ ta̱wa̱a̱ ntsu na̱ nden ma asuvu u ta a aci a̱ yi, waru adama o usa̱n wa̱ yi u ɗa tsu ka̱mba̱i gbaga. 6 Suru ntsu tsu tsi ikyon i na i puwa̱yin, koyan reme ta̱ ure wa̱ yi, a̱vu A̱sulazuva a̱ tanu yi unusu u tsu suru. 7 Reve o ɓongi yi waru a ca yi a̱tsuma̱lima̱, suru na̱ ne u damma ili i ro shi. O rono yi ta̱ tso mokyokyon a̱ tyo uba̱ta̱ u mapaɗa, waru tsu kyon na ri a̱ ma̱ka̱ka̱n ma za na oo koɗuso yi eleme ri kpaku, ne ɗa ko una̱ wa̱ yi u kpa̱tu'wa̱ shi. 8 Adama e iɓongishi nu ulambu wu uge'etosu wa amayun ɗaɗa a̱ ka̱ra̱i na̱ a̱yi. Waru zane ɗa aa yuwan adanshi adama o ugundo wa̱ yi? Adama a na o koɗoi wuma wa̱ yi a̱tsuma̱ o uva̱ɗi, a̱ ga̱la̱ yi ta̱ adama o unusu wa ama a̱ va̱. 9 A yuwaan yi ta̱ aason oɓolo na̱ a̱za̱ e iwuya, waru na̱ za vu utsuru ɗa u ri pe o ukwa̱ wa̱ yi, ko na wo o'woi u 'ya̱sa̱n ugbozu wu za shi, waru wu luma̱ za shi. 10 Suru na̱ ne ucigu wa̱ A̱sulazuva a ɗa a amaton yi, waru u zuwa yi ta̱ u sowo a̱tsuma̱lima̱, adama ko na wuma wa̱ yi wo o'woi kucci vu unusu, u te ene gundo va̱ yi. Waru u ta̱ da̱shi rana va̱ yi, a̱vu ucigu wa̱ A̱sulazuva u shiwan e ekere a̱ yi. 11 Mantsa ma na a̱tsuma̱lima̱ a̱ yi o kotoi, u ta̱ da̱shi ene ekan a̱vu u rawa yi, nu urevu wa̱ yi aagbashi a̱ a̱ɓula̱ a̱ va̱ a̱ ta̱ ka̱mbuwa̱ ama na̱ a̱bunda̱ a̱za̱ a̱ a̱ɓula̱, waru u ta tara unusu u le. 12 Adama o ndolo n ta ca yi akunda a̱ yi oɓolo na azagbain. Waru u te ne'eshen itana yu uvon i na a̱ pura̱i oɓolo na̱ a̱za̱ o ucira, adama a na u ca ta̱ wuma wa̱ yi u kuwa̱, e kece yi ta̱ a̱tsuma̱ a̱ a̱za̱ o unusu. Adama a na u tara ta̱ unusu wa ama a̱ a̱bunda̱, reve u yuwan ipati adama a̱ a̱za̱ o unusu.