1 Apa nda ili i na A̱sulazuva a dammai, <<I guza̱ ili i na i ri mejege, a̱vu i yuwan amayun, adama a na aa jima shi iwawi i va̱ i ta rawa waru aa jima shi ili ya̱ a̱ɓula̱ i na n yuwain a̱ to uta̱a̱ yi eteshe. 2 Za va aba'un a ɗa vuma na aa yuwusan ili i nda, za na guza̱ niyi ugbamu, za na a̱a̱ kurusu urana wa Ashibi waru wa̱a̱ lungususa̱ yi shi. Za na aa putsusa ekere a̱ yi na̱ mayan me iwuya.>> 3 She mocin n na ɓoloi aciya̱yi na̱ A̱sulazuva u damma, <<Amayun A̱sulazuva a ta ɓatsuwa mu na ama a̱ yi wan.>> Waru she vali na tsu matsan shi u damma, <<A̱mu ukpori u ɗa wan.>>

4 Adama a na apa ili i na A̱sulazuva a dammai, <<Ali a na a tsu matsan shi aza a na a̱ guza̱i Ashibi a̱ va̱, aza a na a ɗangwai ili i na n cigai, a̱vu a̱ guza̱ akucunu a̱ va̱ ulobonu, 5 n ta ca le ili yu ucuwusan a̱tsuma̱ o u'wa u va̱ ala a na aa la'a olobo ne esheli. N ta ca le ala a na a̱ ri nu ukosu shi za na a̱a̱ puwa̱n shi. 6 Waru omocin a na o ɓoloi aciyele na̱ A̱sulazuva na aa yuwaan yi a̱ga̱nda̱, a ciga ala a̱ A̱sulazuva. Waru oo o'wo agbashi a̱ yi, aza a na a̱a̱ guzusa̱ Ashibi agba a̱ lungusa̱ yi shi, reve waru a̱ kuru akucunu a̱ va̱ ulobonu. 7 Ele ɗa ma̱a̱ ta̱wa̱to a masasan ma akiza ma̱ va̱, a̱vu n ca le ma̱za̱nga̱ o u'wa u va̱ wa avasa. Kucci vu ukula̱tosu le nu ucasu u le o to o'wo ili yu ususu a masa'a ma̱ va̱, adama a na e te ɗe u'wa u va̱ u'wa wa avasa wu nɗa suru.>> 8 A̱sulazuva Zagbain a̱yi na u ɓolotoi aza a Isra'ila a na a̱ pura̱i, a damma ta̱, <<M buwa ta̱ a̱ da̱shi ɓoloto ozo o ro na aza a na m ɓolotoi ɗe.>>

9 A̱ɗu inama yu una suru, a̱ɗu inama ya̱ a̱rumbu suru ta̱wa̱i! Ta̱wa̱i i soɗu ama a̱ va̱! 10 A̱za̱ e ipiri a Isra'ila nrumba̱ n ɗa, suru nle a̱ ri nu urevu shi. Suru nle musa̱n m kpaku n ɗa, aza a na a tsu gura ɓara shi. A̱ tsu da̱na̱ ta̱ nven a yuwusan alavu, a ciga ta̱ nlavu lon. 11 Ele musa̱n mu utsa̱n n ɗa, a̱ tsu cuwa̱n shi. Aza a aguɓa a ɗa a na a̱ ri nu urevu shi. Suru nle a vadala ta̱ koyan ɗa reme ure wa̱ yi, za suru a zama ili i na wa̱a̱ tsura̱a̱ aciya̱yi. 12 Za suru a dansa <<Ta̱wa̱i, lyawa n tsura̱ masayan! Lyawai tsu sowoi hali tso o'woi usowu na̱ ma̱ra̱! Nfa'an waru to o'wo tsa ana'an, hali gba u la'a ne.>>