1 Woo yo'ono wu shi, a̱vu okokolo o ososowi a aciyogbamu a Ifiramu, na̱ yipa̱lu i na i tsu kpanla tsugbain tso ulobonu tsa̱ yi, za na ri zuva vu uka̱ri wu umuli wa aza a na ma̱ra̱ ma lyuwai aci e le. 2 Uwwai nda, Zagbain ta̱ na̱ vuma gbain vu ucira, cine vu revei wunla̱ wa atayan, nu upepu wu ulungusu u tsu ta̱wa̱ na̱ mini ma zuva, u tsu ro'o yi ta̱ nu ucira e iɗa. 3 Ookokolo a aciyogbamu o ososowi a Ifiramu a ta dadasa le za̱la̱ va ana. 4 Waru yipa̱lu i na yoo oco yu ulobonu lon ya̱ yi za na ri a zuva vu uka̱ri vu umuli u to o'wo tsu umatsun wu ufaru wu ubiri a mantsa mo ulili, za na diga na̱ za ro e ene yi u to lyuwushi niyi a̱yi a uwa o ukere wa̱ yi. 5 O urana u ndolo A̱sulazuva o oɓolo a̱ a̱soja a zuva o to o'wo ookokolo a tsugbain, ookokolo a sa'ani adama a akapi a ama a̱ yi. 6 U to ca ruhu va amayun uba̱ta̱ wu za vu uge'etosu, nu ucira uba̱ta̱ wa aza a na a vadalai uvon a̱ ka̱mba̱ o una̱ntsu. 7 Ama̱sula̱ na̱ nan ganu fo a takalyusa ta̱ adama o usowu wu ucira. A̱ da̱na̱ ta̱ o uta̱ɗa̱tsa̱sa̱ adama a masayan, a̱ da̱na̱ o togɓolyuso adama a̱ a̱bunda̱ a masayan. Waru e te inda irumbu irumbu a̱tsuma̱ alavu alavu e le. Reve o o'wo a yuwusan unusu uba̱ta̱ o uge'etosu. 8 A̱ shiton ta̱ apada suru na̱ tsushaamu, babu uba̱ta̱ u na u ri cece. 9 <<Zane ɗa u cigai u rito urevu? Waru nan zane ɗa waa cuɗuwa ikaka ya̱ yi? Uba̱ta̱ u muwun n na a kasai maani, ko uba̱ta̱ wa aza a na a kasai maani gogo? 10 Ili i na tsaa uwwusa a̱yi ɗa, yuwain yuwain, yuwain yuwain, wila̱ a aci a̱ wila̱, wila̱ a aci a̱ wila̱, nda wa'a ndeɗe wa'a.>> 11 Amayun nu una̱ u na i revei shi ne elentsu a na a̱ ri ko'o A̱sulazuva a ta yuwan adanshi na ama a nda, 12 e ekere a za na u dammai, <<Nda uba̱ta̱ u wivuwun kpaku, lyawa aza a na a̱ ri ukunu e ivuwan,>> waru, <<Nda ɗa uba̱ta̱ a̱ nden ma asuvu>> agba i 'yuwan ta̱ a uwwa. 13 Waru ne ɗa adanshi a̱ A̱sulazuva oo o'wo uba̱ta̱ u le, yuwain yuwain, yuwain yuwain, wila̱ a aci a̱ wila̱, wila̱ a aci a̱ wila̱, nda wa'a ndeɗe wa'a. Ele a̱ ka̱ra̱, a̱vu a̱ riya̱ melene, a̱vu a kuɗa, a̱vu a azu le a̱vu e reme le. 14 Adama o ndolo, yu uwwa adanshi a̱ A̱sulazuva, a̱ɗu a̱za̱ o ulamu a na aa yuwusan tsugono tsa a ama nda a̱tsuma̱ a̱ Urishelima. 15 Adama a na i ta dansa, <<Tsu yuwan ta̱ akucunu nu ukwa̱, waru na aason tsu yuwan ta̱ nzuwulai. Mantsa ma na a̱tsuma̱lima̱ a̱ a̱bunda̱ o ndolo o utula̱i, wa̱a̱ ju'wa̱n tsu shi, adama a na tsu ka̱mbuwa̱ ta̱ epen ukafata u tsu, na̱ wulumu uba̱ta̱ o upa'atan u tsu.>>

16 Adama o ndolo nda ili i na Zagbain A̱sulazuva a dammai, <<Uwwai nda, n ta̱ shuwa̱ aatali a̱tsuma̱ a̱ Sihiyona, aatali a na a̱ lyungwa̱i, aatali a sa'ani e ikyun yu usaa adama a mavara mo usaa wa amayun: Suru za na cayi amayun uba̱ta̱ wa̱ yi, waa uwwa wovon* shi. 17 N ta̱ ka̱mbuwa̱ amayun wo o'wo amunga o uritosu wu usaa, a̱ɓula̱ waru u to o'wo ili yu uritosu wu usaa. Atayan waru e te iza̱ upa'atan u ɗu we epen, mini ma̱ a̱bunda̱ waru ma̱ te iza̱ uba̱ta̱ o upa'atan u ɗu. 18 Akucunu a̱ ɗu nu ukwa̱ a̱ to una le, waru nzuwulai n ɗu na aason ee isawan shi. Mantsa ma na a̱tsuma̱lima̱'a̱ o utula̱i, o to polo ɗu na̱ a̱yi. 19 Suru mantsa ma na woo utula̱i, u ta̱ pura̱ ɗu, usana suru, nu urana ko na ayin u te iza̱ o utula̱i.>> Urevu wi ikaka i nda u ta̱ ta̱wa̱ na̱ tsuda'un. 20 A̱ga̱da̱'a̱ o to o'wo mokoɗi ma na za aa gura buba̱ruwa̱ ɗe shi, a̱a̱ba̱ra̱gu waru wa̱a̱ da̱na̱ washin u na za aa gura pupala na̱ a̱yi shi. 21 Adama a na A̱sulazuva a̱ ta̱ 'yon nu usuɗuwu cine u yuwain a Masasan ma Perazim, u ta̱ 'yon e meje'en u yuwan ulinga wa̱ yi, cine u yuwain o Uka̱ri wa Gibiyon, ulinga wa asalama u yuwan ulinga wa̱ yi, ulinga u sa'avu. 22 Adama o ndolo i lyawa a yuwusan ulamu, na̱ ne ɗa shi, akani a̱ ɗu a̱ ta̱ da̱shi ugbamu. Adama a na mu uwwa ta̱ diga uba̱ta̱ u Zagbain A̱sulazuva o oɓolo a̱ a̱soja a zuva, adama o ukototosu wi iɗa'a ma̱ɓula̱. 23 Poloi atsuvu, a̱vu yu uwwa adanshi a̱ va̱, i ka̱mbuwa̱ ugbozu yu uwwa ili i na maa dansa. 24 Na̱ cimbi yuwan iluma adama a̱ ca̱'a̱n u tsu lyuwa ta̱ elime ni iluma kuci? Ko u tsu ɓatsasa ta̱ iɗa kuci? 25 Nu u lapula uɗuma̱ u koto, u tsu yuwan ca̱'a̱n shi? N damma u tsu zazanu ta̱ icu'un i na a̱ tsu ɗe ɗaɗoya* na̱ kumin? U tsu cu'wa̱n yitabo a̱ guzu le shi oroci a yitabo waru na̱ guzu le shi? A̱ nge'en ma̱ a̱ɗuma̱ waru u tsu cu'wa̱n ishina shi? 26 Adama a na A̱sula̱ a̱ yi o to rocosu yi, waru u to rocosu yi ili i mejege. 27 U tsu faba isu'wan i uri na aaɗanga a faba vi ishina, ko o rono keke vi inan e isu'wan i uri shi, amma na̱ maɗanga ma ɗa u tsu fabusa le ben. 28 A tsu ira ta̱ ishina adama a yuwan opopofu, a tsu faba a fabisa le shi. Agba ko ana a tsu dadasa le ni ikeke yi ina i na ido yoo ronuso, a tsu ɓatsa le shi. 29 Suru ili i nda diga uba̱ta̱ wa̱ A̱sulazuva o oɓolo a̱ a̱soja a zuva suru ɗa, za va̱ a̱sa̱la̱ a sa'ani waru na̱ tapu nu ugbozu.