1 A rana ndolo Hezekiya banakan ta̱ hali u shi u ciga ma̱kuwa̱. A̱vu Ishaya vumava̱sula̱ ulobo wa Amoz u ta̱wa̱ uba̱ta̱ wa̱ yi, reve u damma yi, <<Apa ili i na A̱sulazuva a dammai: Vu foɓo u'wa wa̱ wu, adama a na vu ta̱ kuwa̱, va̱a̱ ka̱mba̱ gbaga shi.>>

2 Ɗaɗa Hezekiya vadalai urewesu wa̱ yi a̱ tyo o uɓaɓu a̱vu u yuwan avasa a̱ tyo uba̱ta̱ wa̱ A̱sulazuva, 3 a̱vu u damma, <<Yuwan ankuri, A̱sulazuva, cuwan cine n yuwain wuma a̱ ma̱ka̱ka̱n ma̱ wu a̱tsuma̱ a̱ a̱ɓula̱ no okolo a̱ ta̱, waru n yuwan ta̱ ili i na i ri ulobonu e esu a̱ wu.>> A̱vu Hezekiya shon lon.

4 Reve adanshi a̱ A̱sulazuva a̱ ta̱wa̱ ya Ishaya: 5 <<Ka̱mba̱ vu damma Hezekiya, <Apa ili i na A̱sulazuva, A̱sula̱ a̱ Da̱wuda dada va̱ wu a dammai: Mu uwwa ta̱ avasa a̱ wu waru me ene ta̱ aɓara a̱ wu. Uwwai nda, n ta̱ da̱shi wu a'wan gendu a wuma wa̱ wu. 6 N ta wawa wu oɓolo na̱ lyuci nda e ekere o mogono ma Asiriya. N te geshe lyuci nda.

7 << <A̱yi nda u to o'wo iroci ya̱'a̱ wu diga uba̱ta̱ wa̱ A̱sulazuva, a na u ta yuwan ili i nda i na u yuwain nzuwulai: 8 Uwwai nda, n ta zuwa ululu wu urana u ka̱mba̱ a̱ca̱pa̱ ana kupa, e ili i na o tsu rito mmalu mu urana za va Ahaz.> >> Ɗaɗa urana u ka̱mba̱i a̱ca̱pa̱ e ili i na o tsu rito mmalu mu urana ana kupa.

9 Iɗana i na Hezekiya mogono ma Yahuda ma yuwain, a na u ka̱mba̱i gbaga diga o ubanakun u na u shi. 10 N damma ta̱, <<A̱tsuma̱ a rana vu ucira va̱ n ciga n 'yuwan n kuwa̱, a tara mu ta̱ a̱ 'ya̱wa̱ o una̱ntsu wu ukwa̱ wa akapi wa a'wan a̱ va̱.>> 11 N damma ta̱, <<Ma̱a̱ da̱shi ene A̱sulazuva shi, A̱sulazuva e iɗa ya aza a wuma. Ma̱a̱ da̱shi ka̱lyuwa̱ vuma waru a̱tsuma̱ a aza a na a̱ ri o uvaɗi shi. 12 Uva̱la̱ta̱ u va̱ u mula̱ ta̱ reve a tawa yi e ekere a̱ va̱ cine oogodo a za va aguɓa ri. Tsu za maɗava n kutsulu ta̱ wuma u va̱, u koɗo mu ta̱ diga a magita mo uɗava. Diga usana a̱ tyo a ayin vu ta̱wa̱to numu o ukosu. 13 N da̱nu ta̱ na ankuri hali usana u tawa, agba cine vu revei kamu wu kuɗa ta̱ etele a̱ va̱ suru. Diga usana a̱ tyo ayin vu ta̱wa̱to numu o ukosu. 14 Uɗyo u va̱ u ka̱mba̱ ta̱ ke'en tsa manunu, reve n shon tsa̱ mesun ma muɗa ma̱ a̱tsumola̱ngu. Esu a̱ va̱ a̱ kuna̱ ta̱ adama a̱ a̱ka̱nla̱ zuva. N ta̱ a̱tsuma̱ a addama, Zagbain. Kamba mu! 15 Ili i ne i ɗa maa damma? Adama a na u yuwan ta̱ adanshi na̱ a̱mu, a̱yi na aciya̱yi a ɗa u yuwan niyi. N ta wala ben suru a'wan a̱ va̱ adama a̱ a̱tsumola̱ngu a̱ va̱. 16 Zagbain, ni ili i nda i ɗa ama a̱ ri wuma, waru e ili i nda i ɗa wuma u va̱ u ri. Ka̱mbuwa̱ mu gbaga a̱vu vu zuwa n yuwan wuma. 17 Uwwai nda, adama a wuma u va̱ u ɗa n da̱na̱i a̱tsuma̱ a̱tsumola̱ngu, agba a̱tsuma̱ e icigi vu wawa ta̱ wuma u va̱ a̱tsuma̱ a̱ a̱ka̱ri o ukototosu, adama a na vu lyawa ta̱ unusu u va̱ o ucina̱ wa̱ wu. 18 Adama a na ama a na a̱ ri a aason oo godyowo wu shi, a̱kwa̱kwa̱ aa cuwa wu shi. Aza a na a̱ ri za̱la̱ va̱ a̱a̱ka̱ri a̱ ri nu uzuwu wo okolo wa̱ a̱ɓula̱ a̱ wu shi. 19 Aza a wuma, aza a wuma, o tsu godyowo wu ta̱, cine maa yuwusan ana'an. Dada tsu lyawa ta̱ muwun n reve a̱ɓula̱ a̱ wu. 20 A̱sulazuva a ta wawa mu, reve tsu cana ishipa oɓolo na̱ kumburu rana wuma tsu suru, ɗe o u'wa wa̱ A̱sulazuva.>>

21 Ishaya damma ta̱ ɗe, <<Lyawa le a tara a̱a̱kutsu o ubiri reve a sukuma yi a aamici'in, tsa̱ra̱ u ka̱mba̱ gbaga.>>

22 Hezekiya damma ta̱ ɗe fo, <<Nye i ɗa iroci i na ma̱a̱ 'ya̱wa̱ zuva o u'wa wa̱ A̱sulazuva?>>