1 <<Mpa nda aagbashi a̱ va̱, za na n guza̱i, za na n ɗangulai, za na okolo a̱ va̱ a uwwusa uyo'o wa̱ yi. N zuwaa yi ta̱ Ruhu va̱, a̱yi ɗa wa̱a̱ ta̱wa̱ nu uge'etosu u mejege uba̱ta̱ a nɗa. 2 Woo oruwo ko u 'ya̱sa̱n uɗyo shi, ko u yuwan adanshi nu ucira e re shi. 3 Aapumpu a na a̱ ri yi ugbamu shi woo koso kuɗa yi shi, waru woo koso kimusa̱ fitila na cigai ma̱kima̱a̱ shi. A̱tsuma̱ e mejege a ɗa wa̱a̱ ta̱wa̱a̱ na amayun. 4 Woo uta̱a̱ asuvu shi ko u kuɗa okolo shi hali she nu u ta̱wa̱ na amayun o uvaɗi. A̱tsuma̱ a̱ wila̱ wa̱ yi a ɗa nɗa m memere ma̱ mini maa zuwa okolo.>> 5 Nda ili i na A̱sula̱, A̱sulazuva a dammai, za na yuwain zuva, reve wu ba̱ruwa̱ le, za na valai uvaɗi ni ili i na yoo utusa̱ a̱tsuma̱ a̱ yi suru. A̱yi ɗa za na aa casu ama o uvaɗi wivuwun na̱ wuma uba̱ta̱ wa aza a na a̱ ri a mmalu zuva va̱ yi, 6 <<A̱mu A̱sulazuva, n ɗe wu ta̱ a̱tsuma̱ a̱ a̱ɓula̱, n ta̱ guza̱ wu nu ukere reve n soko wu. Waru n ta zuwa wu vo o'wo tsa akucunu uba̱ta̱ wa ama, waru vo o'wo ekan uba̱ta̱ wu nɗa, 7 adama vu kpa̱tu'wa̱ esu a̱ nrumba̱, adama o uta̱a̱ aza a na a̱ ri o u'wa wa ali diga a̱ a̱ka̱ri o uta̱a̱ aza a na a̱ ri nden e irumbu a̱tsuma̱ o u'wa wa ali.>> 8 <<A̱mu ɗa A̱sulazuva, a̱yi ɗa ala a̱ va̱! Maa ca za ro tsugbain tsa̱ va̱ shi, ko n lyawa a̱ma̱li a̱ tsura̱ ica i va̱ shi. 9 Uwwai nda, ili i na n damma nɗu nu ufaru i shiwan ta̱, gogo n ta dansa ɗu ili i sa'avu kafu a fara, kafu a fara n damma ɗu ta̱ ele.>>

10 Canayi A̱sulazuva ishipa i sa'avu. Canaa niyi ica waru diga o ukosu wu uvaɗi. Canayi a̱ɗu aza a na a̱ ri a mmalu a mala, ni ili i na i ri suru a̱tsuma̱ a̱ yi. Canayi a̱ɗu nɗa m memere ma̱ mini, na aza a na a̱ ri nden suru a̱tsuma̱ e le. 11 Lyawa a̱tsumona ni ilyuci ya̱ yi i 'ya̱sa̱n ɗyo le. Lyawa aza a na a̱ ri na̱ nden a̱ mɓa̱nga̱ ma Keda, na ama a Sela a cana ishipa i ma̱za̱nga̱. Lyawa le o oruwo diga zuva vu nsasan. 12 Lyawa le a ca A̱sulazuva tsugbain, e revetyo ica ya̱ yi a nɗa m memere ma̱ mini. 13 A̱sulazuva a̱ to uta̱ tsa vuma vu ucira, tsa vuma vu uvon, u ta̱ 'ya̱sa̱n upan wa̱ yi. U yuwan ta̱ ɗesu yorori vu uvon va̱ yi, reve u roco aciya̱yi za vu ucira ɗa uba̱ta̱ a n'yuwatan ma̱ yi. 14 A̱sulazuva a damma ta̱, <<N jima ta̱ kpen, agba n yuwan adanshi shi waru n kaɓa ta̱ asuvu. Amma gogo n ta saala na̱ ma̱nga̱ tsu mɓa̱la̱ mu ka limatan. N te ivuwan fe'eku fe'eku babu uyo'o. 15 N ta̱ lungusa̱ nsasan na agaɗi, reve n 'yeweto itana yi ca̱'a̱n le suru. N ta zuwa ɗolu le 'yewe a̱ka̱mba̱ iɗa i memere ma̱ mini, reve waru n 'yeweto oko'o e le. 16 Waru n to rono nrumba̱ aɗanga o ure u na e revei shi, e re na e revei shi ɗa ma̱a̱ kuru ne ele. N ta̱ ka̱mbuwa̱ irumbu yo o'wo ekan a̱ ma̱ka̱ka̱n me le, ba̱ta̱ na ri ulobonu shi o o'wo pete. Ele ɗa ili i na maa yuwan, maa vari le shi. 17 Amma aza a na a zuwayi a̱ma̱li a na e she'ein ucira, aza a na aa dansaa a̱ma̱li a na a̱ zuɗa̱i, <A̱ɗu ɗa musula̱ n tsu,> a ta zuwa le o uwwa wono suru suru.

18 <<Poloi atsuvu a̱ɗu agulani waru a̱ɗu nrumba̱ i ka̱lyuwa̱ adama yee ene. 19 Zane ɗa buwai irumba̱ agba aagbashi a̱ va̱ a ɗa ko zane ɗa buwai aagulani tsa malingata ma̱ va̱ za na n lyunguyi? Zane ɗa irumba̱ tsa vuma na cayi aciya̱yi ya̱'a va̱ ko irumba̱ tsa aagbashi a̱ A̱sulazuva? 20 U tse ene ta̱ ili na̱ a̱bunda̱, agba u tsu ka̱mbuwa̱ ugbozu shi. Atsuvu a̱ yi a̱ tu ukpa̱tu'u, agba u tsu uwwa shi.>> 21 Adama a̱ a̱ɓula̱ a̱ A̱sulazuva u yo'ono yi ta̱ u ca wila̱ wa̱ yi ucira na̱ tsugbain. 22 Amma ama a nda aza a na a̱ pura̱i waru a usa nle ili i ɗa, suru nle a̱tsuma̱ a̱ a̱ka̱ri a ɗa e geshe nle, reve o soko le o u'wa wa ali. O o'wo ta̱ itana i na a pura̱i uba̱ta̱ o uvon za na babu za na aa wawa le, tse itana i na usai i na babu za na a̱a̱ ka̱mbuwa̱ le o u'wa. 23 Zane ɗa a̱tsuma̱ a̱ ɗu woo polo atsuvu ko u ka̱mbuwa̱ ugbozu a mantsa ma na ma̱a̱ ta̱wa̱ elime? 24 Zane ɗa cayi Yakubu uba̱ta̱ wu za va a'usa ndolo, aza a Isra'ila uba̱ta̱ wa aza a usa o ndolo? A̱sulazuva a ɗa na aciya̱yi, uba̱ta̱ wu za na tsu yuwain unusu. Adama a na a̱yi ɗa za na a̱ kuɗa̱i a̱ kuru ure wa̱ yi, waru a yuwan tsutoni na̱ wila̱ wa̱ yi shi. 25 Adama o ndolo u tsuwa̱n le ta̱ usuɗuwu wu upan wa̱ yi, nu ucira wu uvon. U ka̱nda̱ruwa̱ le ta̱ na akina, amma suru na̱ ne e reve shi, u kula̱to le ta̱ amma a̱ ka̱mbuwa̱ ugbozu shi.