1 Lyawa n canaa icigi i va̱ ishipa adama o uɗuma̱ u ina̱bi wa̱ yi. Icigi i va̱ i shi ta̱ nu uɗuma̱ u ina̱bi wu umuli a̱ nge'en ma aagaɗi. 2 U ka̱pa̱ yi ta̱ reve wu tawa atali, a̱vu wu shuwa̱ ataci a ina̱bi a sa'ani. Reve u suwa pe aburu e ipiri, a̱vu waru u ka̱pa̱ uba̱ta̱ u mapisha ma̱ ina̱bi. Reve u zuwa okolo u tsura̱ ina̱bi sa'ani, agba a̱vu u matsan ina̱bi vu una. 3 <<Gogo nda a̱ɗu aza a na a̱ ri nden Urishelima na ama a Yahuda, ge'eto numu nu uɗuma̱ u ina̱bi u va̱. 4 Ili i ro i ta̱ lo i na n shi a yuwaan uɗuma̱ u ina̱bi u va̱ i na i la'ai i na n yuwaan niyi? Ana n zuwai okolo n tsura̱ ina̱bi sa'ani, nye i zuwai u matsain ina̱bi vu una? 5 Gogo n ta damma ɗu ili i na maa yuwan nu uɗuma̱ u ina̱bi u va̱. N ta tawa yi ugeshete wa̱ yi, a̱vu gba a̱ rukutsa̱ yi. N to polo uɓaɓu wa̱ yi, a̱vu gba a dadasa yi. 6 N to o'woto yi ili ye pere, oo koɗo ko aa cimba yi shi, reve ma̱lyo na awanda a shiwan pe. A̱vu n zuwa eleshe a̱ kuɗa̱ o ro'o pe.>> 7 Adama a na uɗuma̱ wa̱ ina̱bi wa̱ A̱sulazuva o oɓolo a̱ a̱soja a zuva iɗa ya Isra'ila i ɗa, ama a Yahuda waru ele ɗa a̱sha̱ a na u shuwa̱i na waa uwwusa uyo'o u le. U zuwa ta̱ okolo we ene umatsun wa amayun, o una̱ u ndolo she wocosu wu mpasa, u zuwa ta̱ okolo we ene a̱ɓula̱, o una̱ u ndolo she mesun ma̱ a̱tsuma̱lima̱.

8 A̱tsuma̱lima̱ a ta cina aza a na a̱a̱ da̱shishi aciyele 'wa a̱ tyo a 'wa ni iɗa a̱ tyo e iɗa hali ko ure u buwa adama a nanza shi, she a̱ɗu goon a̱tsuma̱ e iɗa'a.

9 A̱sulazuva o oɓolo a̱ a̱soja a zuva a kucina ta̱ a atsuvu a̱ va̱, <<Amayun 'wa na̱ a̱bunda̱ o to o'wo ofoli, 'wa gbagbain sa'ani sa'ani babu za na a̱a̱ da̱nu pe. 10 Uɗuma̱ u ina̱bi wu uritowu kupa u ta matsan bat ta̱li goon. Waru nkundatsu kupa mi icu'un n ta matsan makundatsu ma̱ ta̱ goon.>> 11 A̱tsuma̱lima̱ a ta cina aza a na a̱a̱ 'yosun na̱ wasasa e izami i ma̱ra̱, aza a na ayin a tsu ɓatsa hali she na̱ ma̱ra̱ ma̱ tsura̱ le. 12 Aza a na a̱ ri ni ikumburu i le ni igaraya ni iwakacau, ni igbala na̱ ma̱ra̱ uba̱ta̱ wa̱ a̱buki. Agba a tara ili i na A̱sulazuva a yuwain ili i ro shi, waru a ca yi tsugbain a̱tsuma̱ e ili i na aa yuwusan shi ko ee ene ulinga we ekere a̱ yi shi. 13 Adama o ndolo a̱ ta̱ pura̱ ama a̱ va̱ nu uvon adama o ulambu wu urevu u ndolo. Azagbain e le a̱ ta̱ kuwa̱ na ambulu, akapi a ama waru na akuli. 14 Adama o ndolo ukwisa̱ u da̱shi ta̱ maluwa a̱vu u kpa̱tu'wa̱ una̱ wa̱ yi babu a̱tyo, azagbain a̱ Urishelima na akapi a ama a̱ ta̱ cipa̱ a̱ tyo pe, oɓolo na̱ a̱za̱ e elemu pe. 15 Ne ɗa a̱a̱ ka̱ɗa̱to vaɗilima̱ suru, aza a aciyogbamu waru o sowo wono. 16 Agba A̱sulazuva o oɓolo a̱ a̱soja a zuva a̱ ta̱ tsura̱ tsugbain adama a amayun a̱ yi. A̱sula̱ a akiza o to roco a̱yi za va akiza ɗa o ulinga wa̱ a̱ɓula̱ a̱ yi. 17 Reve mukyokyon n yuwan alyuna pe tsu uba̱ta̱ wa alyuna u le, omocin waru a ta lyuwa ilyalya o okongo a̱ a̱za̱ o utsuru. 18 A̱tsuma̱lima̱ a ta cina aza a na oo ronuso unusu na ala e epen, she damma na amunga e keke vi ido, 19 aza a na aa dansa, <<Lyawa A̱sula̱ a̱ jika̱, lyawa u jika̱ ulinga wa̱ yi adama tse ene yi. Lyawa ifoɓi ya Akiza a Isra'ila i rawa adama tsu reve yi.>> 20 A̱tsuma̱lima̱ a ta cina aza a na ee ɗesu iwuya isa'ani, isa'ani waru iwuya. Waru i ta̱ ka̱mbuwusa̱ irumbu ekan, ekan waru irumbu. Aza a na waru a̱a̱ ka̱mbuwusa̱ okono peme, peme waru okono. 21 A̱tsuma̱lima̱ a ta cina aza a na aa tarasa e esu e le a̱ ta̱ nu ugbozu nu urevu a̱ yindi i le. 22 A̱tsuma̱lima̱ a ta cina ngono mo oso m ma̱ra̱, na̱ ngono moɓolo m ma̱ra̱, 23 aza a na aa lyawusa a̱za̱ o unusu nu u'ushishi wu utosu wu una̱, a̱vu a putsa aza a na a̱ ri nu unusu shi mejege me le. 24 Adama o ndolo cine elentsu a akina o tsu soɗu tsi'yuwa̱ cine waru ogozo o u'yewu a̱ tsu puwa̱n a̱tsuma̱ a akina, ne ɗa aralu e le aa shama, reve yipa̱lu i le yi 'yawan tsa̱ ma̱buta̱, adama a na a 'yuwain wila̱ wa̱ A̱sulazuva o oɓolo a̱ a̱soja a zuva waru a tara adanshi a Za va Akiza a Isra'ila ili i ro shi. 25 Adama o ndolo upan wa̱ A̱sulazuva u puna̱ ta̱ a aci a ama a̱ yi, waru u 'ya̱sa̱n ta̱ ukere wa̱ yi a̱vu u ga̱la̱ le. A̱vu nsasan n jinga̱ɗa̱, reve lipu va̱ a̱kwa̱kwa̱ o o'wo tse everi e memere me re. Suru ni ili i nda upan wa̱ yi u koto shi, ukere wa̱ yi u buwa ta̱ wuba̱ruwu. 26 U ta̱ 'ya̱sa̱sa̱n atuta adama a nɗa ma alanga, reve wi ivula̱a̱ aza a na a̱ ri o ukosu wu uvaɗi, ka̱lyuwa̱ gba a̱ ta̱ ta̱wa̱ ni ilaɗi lon. 27 Ko za a̱tsuma̱ e le a̱a̱ kuna̱ ko u ta̱ɗa̱tsa̱ shi, ko za ta̱ a̱a̱ gba̱ɗi ko u lantsa shi. Waru ko gbakala a̱a̱ ba̱ɗa̱ shi ko sheru va atan aa taɓa shi. 28 Aya e le a̱ ta̱ ucembeɗu, tan le unyu'un, okotsu e ido i le tsi irumu, a̱ga̱nda̱mu e ikeke yi ido i le tsa̱ lipa̱. 29 Yorori i le tsa kamu, o tso oruwo ta̱ tsa̱ muwun mi ikamu, a̱ tsu gugwa̱ ta̱ reve e reme ili reve a tanu, agba ko za aa gura wawa le shi. 30 O urana u ndolo a̱ ta̱ gugwa̱ a aci a̱ Urishelima tsu uɗyo u mala. Waru na̱ vuma ka̱lyuwa̱ iɗa, u ta̱ gba e ene irumbu na̱ a̱tsuma̱lima̱, waru eleshe a ta zuwa ekan o o'wo irumbu.