1 A̱za̱ a̱ a̱ɓula̱ a̱ ta̱ tsukwa̱, agba ko za dama shi. A̱ pura̱ ta̱ ama a na a cayi aciyele, agba ko za reve a na a tarai za va̱ a̱ɓula̱ adama a wawa le e iwuya i na i ri a̱ ta̱wa̱ ɗa shi. 2 Aza a na a̱ ri a mmalu mejege a uwa a̱tsuma̱ a̱ nden ma asuvu e ivuwusan a̱tsuma̱ o ukwisa̱. 3 Agba a̱ɗu, rawai zuzu, a̱ɗu muwun mu za yindi, a̱ɗu umatsun wu za tsipere na aashakala! 4 Zane yaa yuwusaan ulamu? Zane ya̱a̱ kpa̱tu'wusa̱ una̱ yo utusa̱a̱ elentsu a tarasa yi ili ye pere? A̱ɗu muwun ma aza a aciyogbamu a ɗa shi, umatsun wa̱ a̱za̱ e epen shi? 5 I ta̱ ni icigi i tsipere e memere ma ɗanga oku na a ɗanga na ri upa̱mu, aza a na aa paɗasa muwun n le a̱tsuma̱ a̱ ka̱ri, na a pa'atan va atali. 6 A̱tsuma̱ a atali e shembu shembu o uka̱ri ɗe ɗa akunda a̱ wu a̱ ri, ele ɗa akunda a̱ wu. Ele ɗa vu tsuwa̱yin kucci vo oso na̱ kucci vi ishina. Adama e ili i nda n ta̱ bula̱ ili i na n cigai n yuwan? 7 Vu yuwan ta̱ a̱a̱ga̱da̱ a̱ wu a masasan mo uga'an zuva, ɗe ɗa vu gawain vu ca kucci va̱ wu. 8 O ucina̱ wu na̱ntsu va̱ wu na a akpata a̱ na̱ntsu va̱ wu vu zuwa ta̱ iroci ya̱ a̱za̱ a̱ a̱ma̱li. Vu vari mu, vu palu'wa ta̱ a̱a̱ga̱da̱ a̱ wu, vu kumba yi ta̱ a̱vu vu kpa̱tu'wa̱ yi washin. Reve vu taraa aciya̱wu akucunu ne ele, vu ciga ta̱ a̱ga̱da̱ e le, a̱vu ve ene ataɓu e le. 9 Vu 'ya̱wa̱ ta̱ uba̱ta̱ u Molek na̱ mani'in ma̱ zetun a̱vu vu da̱shi aturare a̱ wu a̱bunda̱. Vu lyungu ta̱ ajiya a̱ wu alanga. Hali vu cipa̱ a̱ tyo uba̱ta̱ wa̱ a̱kwa̱kwa̱. 10 Ko na vu kuna̱i na̱ a̱bunda̱ a mmalu, agba vu damma, <<Ili ye pere i ɗa shi.>> Vu tsura̱ ta̱ ucira u sa'avu, adama o ndolo vu ta̱ka̱lyuwa̱ shi. 11 <<Zane vaa uwwusa wovon na̱ ma̱riya̱ mo okolo hali na vaa yuwusaan mu epen. A̱vu vu kuɗa̱ a cuwan na̱ a̱mu ko vu yuwan majiyan ma̱ va̱ o okolo a̱ wu? Adama a na n jimai n yuwain adanshi ɗa shi, ɗaɗa vu kuɗa̱i a uwwa wovon u va̱ shi? 12 N ta̱ pa̱lu'wa̱ a̱ɓula̱ a̱ wu na̱ linga va̱ wu, waru aa kamba wu shi. 13 Na̱ vu saala izami yi ikambi, lyawa musula̱ n na vu ɓolotoi a wawa wu! Upepu u ta̱ pura̱ le suru, wivuwun u ta tawa le. Vuma na gba tara numu upa'atan wa̱ yi u to o'wo ni iɗa'a a̱vu waru u ka̱mba̱to masasan ma akiza ma̱ va̱ za va̱ yi.>>

14 Reve gba a damma: <<Suwai, suwai, foɓoi ure! Tawai ili i na yee gesheshe ure wa ama a̱ va̱.>> 15 Adama a na apa ili i na Za va zuva za tsugbain dammai, a̱yi za na ri wuma babu ukotu, za na ala a̱ yi a̱ ri akiza, <<N ta̱ nden zuva nu uba̱ta̱ wa akiza. Oɓolo na̱ a̱yi za na ri no okolo o uvadalasa no okolo a na a tarai aciya̱yi ili i ro shi, adama u jisan ruhu vu za na tarai aciya̱yi ili shi. Waru u jisan okolo a za vu udalasa. 16 Maa lyuwa elime na̱ nla̱ngi shi, ko n da̱na̱ o upan kuci shi. Na̱ ne ɗa shi ruhu vu vaɗilima̱ to uta̱a̱ okolo uba̱ta̱ u va̱, wivuwun u vuma na n yuwain. 17 Adama e iwuya yu utsa̱n i le i ɗa n shi n yuwain upan. N ca le ta̱ a̱tsuma̱lima̱, a̱vu n soko urewesu u va̱ a̱tsuma̱ o upan, suru na̱ ne a̱vu a lyuwa elime ni ili i na a cigai a̱ ka̱mba̱sa̱ a̱ca̱pa̱. 18 N ka̱lyuwa̱ ta̱ re le, agba n ta̱ ka̱mba̱to le gbaga. N to rono le aɗanga a̱vu n ka̱mbuwa̱a̱ le na asuvu nden aza a na a̱ ri a̱ nden ma̱ a̱tsumola̱ngu oɓolo ne ele. 19 N ta̱ ta̱wa̱a̱ ni ica a̱ na̱ le. Lyawa aza a na a̱ ri alanga na aza a na a̱ ri zuzu a̱ tsura̱ asuvu nden lon,>> A̱sulazuva a ɗa a dammai. <<Waru n ta̱ ka̱mba̱to le gbaga.>> 20 Amma a̱za̱ e iwuya a̱ ta̱ tsa mala mo ujaaru, za na tsi ivuwan shi, za na ikeɗu ikeɗu ya̱ yi i tsu ta̱ɓa̱luwusa̱ a̱shinda̱ na̱ yiyanɓa zuva. 21 <<A̱za̱ e iwuya a̱a̱ tsura̱ asuvu nden shi,>> A̱sulazuva a ɗa a dammai.