1 Apa nda ili i na A̱sulazuva a dammai: <<Te ɗa aatagada a wukasu u lolo wa mma va̱ wu za na m gba̱ra̱a̱ niyi? Ko zane oo tono mu utan u ɗa n winaa niyi a̱ɗu? Adama o unusu u ɗa a wina nɗu, waru adama e iwuya i ɗu i ɗa a̱ gba̱ra̱i mma ɗu. 2 Adama a̱ nye a mantsa ma na n ta̱wa̱i ko za shi lo shi? A mantsa ma na n ɗeyi, nye i zuwai ko za shi lo na wa̱a̱ usu shi? Ukere u va̱ u ta̱ mokoɗi na maa gura tsupa shi ko n ri nu ucira u na maa gura wawa shi? Uwwai nda, na̱ tsuɓari tsa̱ va̱ tsa ɗa mu ukwatoin mala, n ka̱mba̱to ta̱ ɗolu a̱tsumona, mugula n le n shama ta̱ o ulambu u mini reve a̱ kuwa̱ na akuli. 3 N yuwaan ta̱ zuva amuna ni irumbu a̱vu n ka̱mbuwa̱ akashamuna aapalutsu a̱ yi.>> 4 A̱sulazuva Zagbain ca mu ta̱ eelentsu a aza a na o ritoi, adama n reve idanshi i na maa gbamato aza a na a̱ ri ukunu. U tsu 'ya̱sa̱n mu ta̱ usana biti, u tsu 'ya̱sa̱n ta̱ atsuvu a̱ va̱ adama mu uwwa tso oojoro. 5 A̱sulazuva Zagbain u kpa̱tu'wa̱ ta̱ atsuvu a̱ va̱, agba n yuwaan yi aciyogbamu shi, waru n rono na̱ a̱ca̱pa̱ shi. 6 N ca ta̱ aza a na a̱a̱ ru'wusa̱ mu ucina̱, agbaguzu a̱ va̱ waru aza a na oo ronuso ntsuka̱ n va̱. N sokowo wisulusa na̱ a̱za̱ o ucuwusa̱n u ma̱tsa̱n urewesu u va̱ shi. 7 Adama a na A̱sulazuva Zagbain ta kambusa mu, a ca mu wono shi. A̱yi ɗa i zuwai n zuwai urewesu u va̱ tsa aatali o ucira, agba n reve ta̱ maa uwwa wono shi. 8 A̱yi za na a dansa n ri nu unusu shi u ta̱ zuzu. Zane ɗa gba aa gura ta̱wa̱ na adanshi a aci a̱ va̱? Lyawa tsi isawan tsu ka̱lyuwula̱i! Zane ɗa za mawasan na̱ a̱mu? Lyawa u rawa zuzu na̱ a̱mu! 9 Uwwai nda, A̱sulazuva Zagbain u ta kambusa mu. Zane ɗa aa damma n ta̱ nu unusu? Suru nle o to kporo she damma utugu, azun a ɗa aa tama le. 10 Zane ɗa a̱tsuma̱ a̱ ɗu aa uwwusa wovon wa̱ A̱sulazuva waru waa yuwusan tsutoni na adanshi a aagbashi a̱ yi? Lyawa a̱yi za na ri a mmalu a̱tsuma̱ e irumbu u ri ne ekan shi, u zuwaa ala a̱ A̱sulazuva ucira a̱vu u zuwaa A̱sula̱ a̱ yi okolo. 11 Agba a̱ɗu na yaa daɓusa akina, yaa foɓusoo aciya̱ɗu ekan a akata, walai a̱tsuma̱ e ekan a akina a̱ ɗu na̱ za va akata a na i daɓai. Apa nda ili i na ya̱a̱ tsura̱ uba̱ta̱ u va̱, i to von a̱tsuma̱ a̱ a̱tsuma̱lima̱.