1 A̱tsuma̱ a aa'wan a kupa na̱ a̱za̱ a̱ na̱shi o tsugono tso mogono Hezekiya, Senakerib mogono ma Asuriya ma̱ ta̱wa̱ ta̱ adama u yuwan uvon ni ilyuci i gbagbain ya Yahuda reve u reme le. 2 A̱vu mogono ma Asuriya ma̱ lyungu yali ya̱ a̱soja a̱ yi no oɓolo a̱ a̱bunda̱ a̱ a̱soja diga Lakish a̱ tyo uba̱ta̱ u mogono Hezekiya ɗe Urishelima. Reve yali'i wi isawan o uka̱ri u Mala mo Gon, o ure a̱ tyo Uba̱ta̱ wa̱ A̱za̱ a̱ Wuza̱'u. 3 Reve Eliyakim ulobo wa Hilikiya, za na da̱na̱i zagbain vu ukobu u mogono, na̱ Shebena za vi iɗana, oɓolo na̱ Jowa ulobo wa Asa za na tsu ɗanasa ili i na i farai o uta̱ a cina yi.

4 Reve yali ya̱ a̱soja'a u damma le, Damma Hezekiya, << <Apa ili i na mogono ma gbain, mogono ma Asiriya, ma dammai: E ili i ne i ɗa vaa zuwusa ucira wa̱ wu u nda'a? 5 A̱vu vu ta yuwusan majiyan adanshi o una̱ a ɗa ifoɓi nu ucira wu uvon? Zane ɗa vaa zuwusaa ucira gogo a na va̱a̱ 'ya̱susa̱a̱n mu aci? 6 Uwwai nda, vu ta zuwusa ucira wa̱ wu e ekere a Masar, za na ri tsa aaɗanga a na a̱ ri ukuɗu, za na tsu paɗa ukere u vuma reve wu uwwato yi usa̱n nu ugbasato ya̱'a̱ yi! Ne ɗa Firi'awuna mogono ma Masar ma̱ ri e ekere a aza a na a zuwaa niyi ucira. 7 Agba na̱ vu damma mu, <<Tsu zuwa ta̱ ucira u tsu e ekere a̱ A̱sulazuva A̱sula̱ a̱ tsu,>> a̱yi ɗaɗa za na agaɗi a̱ yi na̱ musa'a Hezekiya mumurai shi, a dansaa Yahuda na̱ Urishelima, <<I ta yuwan a̱ga̱nda̱ a̱ ma̱ka̱ka̱n ma masa'a ma nda?>>

8 << <Ta̱wa̱ gogo, vu yuwan uciniki na̱ zagbain a̱ va̱, mogono ma Asiriya. N ta ca wu ido ukpakukupa ure (2,000), na̱ vaa gura zuwa akumbi zuva le! 9 Cine vaa gura lyuwa aci a yali a̱tsuma̱ a aza a na a la'ai uka̱la̱mu a̱tsuma̱ a agbashi a zagbain va̱, ko na vaa zuwusaa Masar ucira adama e ido ya̱ yi oɓolo na akumbi e le? 10 Babu na̱ a̱yi, n ta̱wa̱ ta̱ n riya̱a̱ iɗa i nda a̱vu n kototo yi agba A̱sulazuva a damma shi? A̱sulazuva na aciya̱yi a ɗa u damma numu n wala a̱ 'ya̱wa̱ n riya̱a̱ iɗa'a nu uvon reve n kototo yi.> >>

11 A̱vu Eliyakim na̱ Shebena oɓolo na̱ Jowa a damma yali yu uvo'on, <<Yuwan ankuri vu yuwaan aagbashi a̱ wu adanshi ne elentsu a Tsu'arama, adama a na tsu uwwa yi ta̱. She vu yuwaan tsu elentsu a aza a Yahuda a atsuvu a ama a na a̱ ri lo o uɓaɓu wan.>>

12 Amma zagbai'in u usu ta̱, <<Zagbain va̱ lyungu mu ta̱ n yuwan adanshi e idanshi i nda uba̱ta̱ wu zagbain ɗu oɓolo na̱ a̱ɗu goon, agba na ama a na a̱ ri nden o uɓaɓu'u, aza a na a̱ ri tsa̱ a̱ɗu aza a na aa lyuwa a̱ya̱n e le a̱vu o sowo mazara me le shi?>>

13 A̱vu zagbai'in u 'yon mishin a̱vu u yuwan adanshi ne elentsu a aza a Yahuda: <<Uwwai adanshi o mogono ma gbain, mogono ma Asiriya! 14 Apa ili i na mogono'o ma dammai, <She i lyawa Hezekiya luluma̱ ɗu wan, adama a na a̱yi waa gura wawa ɗu shi! 15 She i lyawa Hezekiya zuwa ɗu i zuwa okolo e ekere a̱ A̱sulazuva a na, A̱sulazuva a ta wawa tsu na amayun, lyuci gbain nda aa ca yi e ekere o mogono ma Asuriya shi.>

16 <<She i zuwaa Hezekiya atsuvu wan. Apa ili i na mogono ma Asuriya ma dammai, <I yuwan nden n lafiya na̱ a̱mu a̱vu i ta̱wa̱ ya̱'a̱ va̱. A̱vu vuma suru a̱tsuma̱ a̱ ɗu u lyuwa umatsun wa ataci a̱ yi nu uɗanga wu ubiri a̱vu u sowo mini mo ooko'o a̱ yi, 17 she na̱ n ta̱wa̱ n tara ɗu a̱ tyo e iɗa tsu za ɗu, iɗa yi ishina oɓolo na̱ masayan ma sa'avu, iɗa i na i ri no opopofu na̱ a̱ɗuma̱ a̱ ina̱bi.>

18 <<She i lyawa Hezekiya luluma̱ ɗu wan nu u damma, <A̱sulazuva a ta wawa tsu.> Ma̱sula̱ me iɗa mo ro ma wawa ta̱ ɗe iɗa ya̱ yi e ekere o mogono ma Asiriya? 19 Te ɗa musula̱ ma Haman na̱ Afa? Te ɗa musula̱ ma Sefarwayim? Musula̱ ma Samariya a gura ta̱ wawa le e ekere a̱ va̱? 20 A̱tsuma̱ a̱ musula̱ mi nɗa nda suru zane ɗa gura wawa nle e ekere a̱ va̱, to cine tsa ɗa A̱sulazuva aa wawa Urishelima o ukere u va̱?>>

21 Agba ele a̱ rungwa̱ ta̱ waru a̱ usu yi ili shi, adama a na mogono ma̱ shi ta̱ ma zuwa, <<She i usu yi wan.>>

22 A̱vu Eliyakim ulobo wa Hilikiya zagbain vu ukobu u mogono, Shebena za vi iɗana, na̱ Jowa ulobo wa Asa, za na tsu ɗanasa ili i na i farai, a̱ 'ya̱wa̱ uba̱ta̱ wa Hezekiya, ni itana i le wukaru. Reve a damma yi ili i na yali'i u dammai.