1 Ana Mogono Hezekiya uwwai, wu kara ta̱ itana ya̱ yi reve wo oto aakashi a̱ a̱tsumola̱ngu reve u ka̱ra̱ a̱ tyo o u'wa wa̱ A̱sulazuva. 2 A̱vu u lyungu Eliyakim, za na da̱na̱i zagbain vu ukobu u mogono, na̱ Shebena za vi iɗana, na̱ ganu gbain, a̱ tyo uba̱ta̱ u vumava̱sula̱ Ishaya ulobo wa Amoz. Suru nle wotowu na aakashi a̱ a̱tsumola̱ngu. 3 A damma yi ta̱, <<Apa ili i na Hezekiya dammai, <Urana u nda urana wa̱ a̱tsumola̱ngu a ɗa, nu urana u maɓara oɓolo nu urana wi ili i wono. Cine muwun n tsu rawa limatan, agba babu ucira u na aa gura matsan le. 4 U ta yuwan A̱sulazuva A̱sula̱ a̱ wu a ta uwwa idanshi ya yali, za na zagbain va̱ yi, mogono ma Asiriya, u lyunguyi wi isula A̱sula̱ a wuma. A̱vu waru A̱sulazuva A̱sula̱ a̱ wu a̱ ɓara yi adama e idanshi i na wu uwwai. Adama o ndolo vu yuwan avasa adama a aza a na a buwai wuma.> >>

5 Ana azagbain o Mogono Hezekiya a̱ ta̱wa̱i ya Ishaya, 6 Ishaya damma le ta̱, <<I damma zagbain ɗu, <Apa ili i na A̱sulazuva a dammai, She yu uwwa wovon wi ili i na yu uwwai, ili i na olobo o mogono ma Asuriya a yuwaan numu ulamu wan. 7 Zuwai atsuvu! N ta zuwa ruhu a̱tsuma̱ a̱ yi adama na̱ wu uwwa adanshi o ro, u ta̱ ka̱mba̱ e iɗa ya̱ yi. Ɗe ɗa maa zuwa o una yi na̱ matsun me pe'eni.> >>

8 Ana yali'i wu uwwai a na mogono ma Asuriya ma lyawa ta̱ Lakish, wu uta̱ ta̱ a̱vu u cina mogono a̱ nla̱ngi na̱ Libina.

9 Gogo mogono'o ma uwwa ta̱ adama a Tirhaka mogono ma̱ Kush, wu uta̱ ta̱ adama u yuwan uvon na̱ a̱yi. Ana wu uwwai ne, a̱vu u lyungu nlingata a̱ tyo ya Hezekiya, ni idanshi i nda, 10 <<Vu damma Hezekiya mogono ma Yahuda: She vu lyawa ma̱sula̱ ma na vaa zuwusaa ucira wu luma̱ wu wan ana u dammai, <Aa ca Urishelima e ekere o mogono ma Asuriya shi.> 11 Amayun wu uwwa ta̱ ili i na ngono ma Asuriya n yuwain na̱ nɗa'a suru, u kototo le ta̱ suru suru. A̱vu gba a ta wawa wu? 12 Musula̱ mu nɗa n na nkaya n va̱ n kototoi, a wawa le ta̱, musula̱ ma̱ Goza na̱ Haran oɓolo na̱ Reze na ama a Adini aza a na a̱ da̱na̱i a̱tsuma̱ a̱ Telasa? 13 Te ɗa ngono ma Haman na̱ mogono ma Afa, mogono ma̱ lyuci va Sefarwayim, ko mogono ma̱ Hena ko Iva?>>

14 Hezekiya ushi ta̱ mepepelime e ekere a nlingata'a, reve u ɗe yi nu una̱. Ɗaɗa u ka̱ra̱i a̱ tyo o u'wa wa̱ A̱sulazuva, a̱vu wu ba̱ruwa̱ yi a̱ ma̱ka̱ka̱n ma̱ A̱sulazuva. 15 A̱vu Hezekiya yuwan avasa a̱ tyo uba̱ta̱ wa̱ A̱sulazuva: 16 <<A̱sulazuva o oɓolo a̱ a̱soja a zuva, A̱sula̱ a Isra'ila, za na ri nden zuva kerobobi, a̱vu a̱ nde'en a̱vu ɗa A̱sula̱ a aci o tsugono tsu uvaɗi. A̱vu ɗa vu yuwain zuva ni iɗa. 17 Vu zuwaa mu atsuvu, A̱sulazuva, a̱vu vu uwwa mu. Kpa̱tu'wa̱ esu a̱ wu, A̱sulazuva, reve ve ene. A̱vu vu uwwa idanshi ya Senakerib suru, i na u lyunguyi adama u lamaa A̱sula̱ a wuma.

18 <<Amayun a ɗa, A̱sulazuva, ngono ma Asuriya o kototo ta̱ ama na̱ nɗa n le, 19 a̱vu a vari musula̱ n le a̱tsuma̱ a akina. Adama a na a̱ da̱na̱ musula̱ shi, amma ulinga wu ukere u vuma, ɗanga na atali. Adama o ndolo a̱vu o kototo le. 20 Gogo, A̱sulazuva A̱sula̱ a̱ tsu, wawa tsu e ekere a̱ yi, tsa̱ra̱ tsugono tsu uvaɗi suru ee reve a na a̱vu a̱ nde'en ɗa A̱sulazuva.>>

21 Reve Ishaya mawun ma Amoz ma̱ lyunguwa̱ Hezekiya, a dansa, <<Apa ili i na A̱sulazuva a dammai, A̱sula̱ a Isra'ila, adama a na vu yuwain avasa a̱ tyo e ekere a̱ va̱ adama a Senakerib mogono ma Asiriya,>> 22 apa adanshi a na A̱sulazuva a dammai adama a̱ yi, <<A̱yi Usheli Sihiyona u tara wu ili shi u ta yuwusaan wu ulamu. Usheli Urishelima u ta̱ ga̱ɗishi aaci a̱ yi nu ulamu a̱vu e ilaɗi. 23 Zane ɗa vaa yuwusaan ulamu nu ugbawu? Zane ɗa va̱a̱ kpa̱tu'usa̱a̱ una̱ waru zane ɗa waru va̱a̱ 'ya̱susa̱a̱n esu o ugbaruwu? A aci a Za va Akiza a Isra'ila! 24 Na agbashi a̱ wu a ɗa vu yuwayin A̱sulazuva ulamu, reve vu damma, <Ni ikeke yi ido ya̱ a̱bunda̱ i va̱ ɗa n kumbai zuva masasan, a̱ tyo a̱ ncilecile ma̱ Lebanon, n koɗo ɗanga na la'ai uga'an va sida, na̱ ɗanga na la'ai ulobonu u sapure. N rawa ta̱ ncilecile mu nsasan ma̱ yi, n uwa ta̱ pe pe a̱tsuma̱ a̱ a̱rumbu a na a la'ai umili. 25 N ka̱pa̱ ta̱ oko'o reve n sowo mini, tsa̱ra̱ n 'yeweto ɗolu va Masar na ana a̱ va̱.> >> 26 <<Koto vu uwwa shi? Nu ujimu u ɗa n foɓo niyi. Ɗe nu ujumu ɗa n foɓo niyi, gogo n zuwa yi ta̱ u fara, a na vu ka̱mba̱toi iɗa yu ɓaɓu vu ucira oɓolo a atali. 27 Ama e le, a lamba ta̱ ucira, e te je'en lipu a̱vu a uwwa wono. Reve o o'wo tsu muvu'un ma aatsusa no ototopi, tsa anlya a na a̱ tsu da̱na̱ zuva vu ukwa̱'a̱*, u tsu 'yewe ta̱ kafu u kungwa.>> 28 <<N reve ta̱ nden ma̱ wu na̱ mota̱a̱ ma̱ wu na̱ ma'uwaa ma̱ wu, nu usuɗuwu wa̱ wu a aci a̱ va̱. 29 Adama a na vu yuwain upan wu usuɗuwu a aci a̱ va̱, waru aciyogbamu a̱ wu a rawa ta̱ a atsuvu a̱ va̱. N ta zuwa gon va̱ a̱ vunu va̱ wu, aamunga o una̱ wa̱ wu, reve n vadala wu a̱ ka̱mba̱ o ure u na vu uta̱i.>>

30 A̱yi nda u to o'wo wu iroci e ekere a̱ wu, <<Lala vu ta lyuwa ili i na yu uta̱i na aciya̱yi, aa'wan e ire ili i na yu uta̱i a aciya̱yi. Amma a aa'wan a ta'atsu vu cu'wa̱n a̱vu vu gasa, vu cu'wa̱n uɗuma̱ u ina̱bi a̱vu vu lyuwa umatsun u le. 31 A̱vu aza a na a buwai wuma o ugundo wa Yahuda a̱ da̱shi yuwusan aralu e iɗa a matsan muwun zuva. 32 Adama a na a̱tsuma̱ a̱ Urishelima a̱ ta̱ tsura̱ aza a na a buwai, waru a̱tsuma̱ a Masasan ma̱ Sihiyona oɓolo a aza a na a buwai wuma. Uzuwu wo okolo a̱ A̱sulazuva o oɓolo a̱ a̱soja a zuva a ɗa aa yuwan ili i nda.>>

33 <<Adama o ndolo apa ili i na A̱sulazuva a dammai adama o mogono ma Asiriya, <Waa uwa a̱tsuma̱ a̱ lyuci nda shi ko u tewin aya pa shi. Waa rawa uba̱ta̱ wa̱ yi na̱ a̱a̱ra̱ga̱ shi ko u suwaa yi uɓaɓu shi. 34 Nu ure u na u ta̱wa̱yi u ɗa wa̱a̱ ka̱mba̱, waa uwa a̱tsuma̱ a̱ lyuci nda shi,> >> ne ɗa A̱sulazuva a dammai. 35 <<N ta̱ piri lyuci nda a̱vu n wawa yi, adama a aciya̱va̱ na adama a aagbashi a̱ va̱ Da̱wuda!>>

36 Reve malingata ma̱ A̱sulazuva mo uta̱ a̱vu wu ga̱la̱ a̱soja a Asuriya ukpakukupa nu ukpakukunla̱ nu ukpakuton (185,000) o uva̱la̱ta̱ wa aza a Asiriya. Reve ana ama a̱ 'yoyin na̱ wasasa a̱yi ɗa gba a̱kwa̱kwa̱ a ɗa uba̱ta̱ suru! 37 A̱vu Senakerib mogono ma Asuriya ma̱ 'yon u ka̱mba̱ o u'wa reve u da̱nu Niniva.

38 A̱yi a yuwusan a̱ga̱nda̱ o u'wa wa̱ Nisiro ma̱sula̱ ma̱ yi, reve Adaramalek oɓolo na̱ Shareza, olobo a̱ yi o una yi na̱ matsun me pe'eni. Reve a suma a̱ tyo e iɗa ya Arara, ɗaɗa Esahadon ulobo wa̱ yi u yuwain tsugono o una̱ wa̱ yi.