1 A̱tsuma̱lima̱ a ta cina wu, Ariye, Ariye, lyuci gbain va̱ Da̱wuda na u da̱nuyi. A'wan a'wan waru lyawa a lyuwa elime na̱ a̱buki a'wan a'wan cine a tsu yuwusan. 2 Suru na̱ ne n ta ca Ariye a̱tsuma̱lima̱, waru ɗe ɗa waa yuwan mesun na̱ magaga ma anga ma̱ a̱tsumola̱ngu, waru u to o'wo ya̱'a̱ va̱ tsa Ariye*. 3 N ta̱ ka̱nda̱ruwa̱ wu Ariye nu uvon, waru n ta̱ riya̱a̱ wu nu uvon, reve n 'ya̱sa̱n itana yu uvon a aaci a̱ wu. 4 Waru a̱ ta̱ ka̱ɗa̱to wu hali she e iɗa, diga e iɗa vaa yuwan adanshi, waru diga a̱ ma̱buta̱ vaa yuwan adanshi babu ucira. Uɗyo wa̱ wu u to uta̱ diga e iɗa tsu uɗyo wa̱ a̱kwisa̱kwisa̱, waru diga a̱ ma̱buta̱ ma ɗa uɗyo wa̱ wu waa yuwan yemenu. 5 Amma n'yuwatan ma̱ wu na̱ a̱bunda̱ o to o'wo tsa̱ ma̱buta̱. Oɓolo a̱ a̱soja e le aza a na e tse ene iliyali yi za shi, a ta tawa le tso owopo. Babu urevu, 6 A̱sulazuva o oɓolo a̱ a̱soja a zuva a̱ ta̱ ta̱wa̱ adama a̱ ɗu na̱ tsata nu ura̱ma̱su wi iɗa ne elemu a̱ a̱bunda̱, na̱ wunla̱ wu upepu na̱ lipa̱ ne elentsu a akina za vu ukula̱tosu. 7 Reve suru oɓolo a nɗa a na a yuwain uvon na̱ Ariye, suru aza a na a yuwain uvon na̱ a̱yi nu uba̱ta̱ wu ucira wa̱ yi, na aza a na a̱ ka̱nda̱ruwa̱ niyi nu uvon o o'wo tsa alavu, na alavu alavu a ayin. 8 Cine vuma na a uwwusa ambulu tsu yuwan alavu a na waa lyuwusa ilyalya, a̱vu gba nu u jiwan a̱vu u da̱na̱ na ambulu a̱ yi babu cuwa̱n, ko cine za va akuli tsu yuwan alavu o sowuso mini, a̱vu gba nu u jiwan a̱vu u da̱na̱ na akuli, akuli a̱ yi o koto shi. Ne ɗa oɓolo a nɗa n na n yuwusain uvon na̱ masasan ma̱ Sihiyona suru oo o'wo. 9 Da̱da'watoyin aciya̱ɗu yo o'wo wuda'un to, yo o'wo nrumba̱. I da̱na̱ usowu, agba na̱ masayan ma ɗa shi, a takalyusa agba usowu wa̱ a̱bunda̱ u ɗa shi. 10 Adama a na A̱sulazuva a̱ tsuwa̱n ɗu ta̱ ruhu vu nlavu va̱ a̱ru'un. Waru u ɓa̱ru ta̱ esu a̱ ɗu (ama̱sula̱), waru A̱sulazuva a̱ ɓa̱ru ta̱ urevu u ɗu (a̱za̱ a̱ yeni).

11 Waru suru alavu alavu a nda a̱ ta̱wa̱ ɗu ta̱ tsa adanshi a aatagada o usuru. Na a ca vuma na gurai ɗesununa̱ a̱vu a damma yi, <<Ɗe nda'a nu una̱,>> u ta damma, <<Maa gura shi adama a na u tu usuru.>> 12 Waru na a ca za na tsu gura ɗenuna̱ shi aatagada, a̱vu a damma yi, <<Ɗe nda'a nu una̱,>> u ta̱ usu, <<Maa gura shi adama a na n reve cine a̱ tsu ɗenuna̱ shi.>>

13 Reve Zagbain damma, <<Ama a nda a̱ ta̱wa̱ ta̱ zuzu na̱ a̱mu waru nu una̱ goon ɗa aa casu mu tsugbain, amma okolo e le a yuwan ta̱ alanga na̱ a̱mu. A̱ga̱nda̱ a na aa yuwusaan mu wila̱ wu vaɗilima̱ u ɗa u na ama o ritoi. 14 Adama o ndolo, n ta da̱shi yuwisan ili ya asalama a aci e ili ya asalama na ama a nda. Urevu wa̱ a̱za̱ o urevu u ta̱ puwa̱n, ugbozu wa̱ a̱za̱ o ugbozu u to koto.>> 15 A̱tsuma̱lima̱ a ta cina ɗu a̱ɗu aza a na i tsu soko A̱sulazuva majiyan ma̱ ɗu a̱ru'un, aza a na aa yuwusan ulinga u le a̱tsuma̱ e irumbu, aza a na a dansaa, <<Zane ɗa e inda tsu? Zane ɗa reve ntsu?>> 16 I vadaluwa ta̱ ili suru. A ta tara za vu uma'an a̱ ka̱mba̱to yi olo'o, a na ili i na a yuwain waa damma za na yuwan niyi, <<U yuwan mu shi>>? Upondo u ta damma za na yuwan niyi, <<U reve ili shi>>? 17 A̱tsuma̱ a mantsa wa'a, a̱a̱rumbu a Lebanon aa vadaluwa wo o'wo iɗa yu umili shi, iɗa yu umili waru wo o'wo a̱a̱rumbu shi? 18 O urana u ndolo agulani a ta uwwa adanshi a aatagada, nrumba̱ waru aza a na a̱ ri nden e irumbu e te ene. 19 Waru aza a na a̱ ka̱ɗa̱toi aciyele a ta yuwan ma̱za̱nga̱ uba̱ta̱ wa̱ A̱sulazuva, waru a̱za̱ o ulambu a ta yuwan ma̱za̱nga̱ a̱tsuma̱ a Za va Akiza a Isra'ila. 20 Adama a na aza a na e tse ne iliyali shi o to koto waru a ta tawa a̱za̱ o ulamu, waru a̱za̱ e izami yi iwuya suru o to kototo le. 21 Aza a na na adanshi e ili i na e revei shi a tsu zuwa za na ri nu unusu shi wo o'wo nu unusu, aza a na a tsa azu aza a na a̱ ri na amayun uba̱ta̱ o uge'etosu. Waru na adanshi e epen a tsu putsa za na ri nu unusu shi amayun.

22 Adama o ndolo nda ili i na A̱sulazuva a dammai, za na tsupayi Ibrahim, adama o u'wa wa Yakubu, <<Yakubu a̱a̱ da̱shi uwwa wono shi, urewesu wa̱ yi wa̱a̱ da̱shi ɗa̱mba̱ shi. 23 Adama a na na̱ we ene muwun ma̱ yi, ulinga wu ukere u va̱ e memere ma̱ yi, a̱ ta̱ guza̱ ala a̱ va̱ cece. A̱ ta̱ ka̱mba̱to Za va Akiza a Yakubu cece waru a ta ca A̱sula̱ a aza a Isra'ila tsugbain. 24 Aza a na ruhu le puwa̱in ure a̱ ta̱ tsura̱ urevu, aza a na waru a tsu yuwusan adanshawuya a̱ ta̱ usu uritosu.