1 Apa ikaka i na Ishaya mawun ma Amoz me enei adama a Babila. 2 I 'ya̱sa̱n atuta a aagaɗi a na a̱ ri lya̱nga̱, i saala le nu uɗyo zuva, i 'ya̱sa̱a̱n le ekere a uwa a̱ na̱ntsu va azagbain. 3 A̱mu A̱sulazuva, n zuwa ta̱ aza a akiza a̱ va̱, m ɓoloto ta̱ aza a na a gurai uvon o shiton upan u va̱ aza a na a yuwusan ma̱za̱nga̱ na̱ tsugbain tsa̱ va̱ lon. 4 Yu uwwa ilama a nsasan, cine vu revei a̱ba̱jini e iɓolo ya ama! I zuwa atsuvu, yisaali a̱tsuma̱ o tsugono tsa̱ a̱bunda̱, tsa̱ nɗa o ɓolotosu uba̱ta̱ u ta̱! A̱sulazuva o oɓolo a̱ a̱soja a zuva a ɗa oo ɓolotosu a̱soja adama o uvon. 5 O uta̱ ta̱ a nɗa ma alanga, diga o ukosu wa zuva, A̱sulazuva ni itana yu uvon yu upan ya̱ yi, u kototo uvaɗi ma̱ɓula̱. 6 Yoo oruwo adama a na urana wa̱ A̱sulazuva u yuwan ta̱ zuzu, urana u na Mogono me Ili Suru ma̱a̱ lyungu nu ulungusu! 7 Adama a nda ekere suru a̱ ta̱ kuwa̱, okolo a vuma suru waru a̱ te jeruwe. 8 Wovon u te reme le, mɓa̱la̱ na̱ a̱tsuma̱lima̱ e te reme le. A ta gaga anga cine ka tsu da̱nu teri. A̱ ta̱ ka̱lyuwula̱i na̱ wovon, urewesu u le ta̱ da̱na̱ a madala. 9 Uwwai nda, urana wa̱ A̱sulazuva u ta̱ lo a̱ ta̱wa̱, urana u babu uyo'o wu upan wa̱ a̱bunda̱ ana wa̱a̱ ka̱mba̱to iɗa babu vuma reve u kototo a̱za̱ o unusu a na a̱ ri pe. 10 Italyo'o ya zuva no oɓolo e italyo'o a̱a̱ da̱shi ca ekan e le shi. Nu urana u ɓa̱tsa̱ u to o'wo irumbu woto waru waa ca ekan shi. 11 N ta ca uvaɗi oforo adama e iwuya ya̱ yi, a̱za̱ e iwuya waru adama o unusu u le. N ta tawa ugbawu wa aza aciyogbamu, a̱vu n ka̱ɗa̱to a̱za̱ e iɓongishi. 12 N ta zuwa ama a la'a o'wo usa̱n u ma̱tsura̱ na̱ zinariya can, vaɗilima̱ waru na̱ zinariya na la'ai ulobonu*. 13 Adama o ndolo n ta zuwa zuva je'en, a̱vu waru uvaɗi u jinga̱ɗa̱ diga uba̱ta̱ u na u ri adama o upan wa̱ A̱sulazuva o oɓolo a̱ a̱soja a zuva, o urana wu upan wa̱ a̱bunda̱ wa̱ yi. 14 Cine vu revei mere'on ma tsu suma no o lo yi a̱tsuma̱ o ugenge, ko ikyon i na i ri na̱ za va aguɓa shi, za suru ta̱ ka̱mba̱ uba̱ta̱ wa ama a̱ yi, za suru ta suma a̱ tyo iɗa i na a matsan niyi. 15 Za na a cinai suru a ta sapa yi u kuwa̱. Za na e remei suru, a̱ ta̱ una yi na̱ matsun me pe'eni. 16 A ta jara nreɓu n le a̱ ma̱ka̱ka̱n me le, a̱ ta̱ pura̱ itana yu 'wa le waru o to von na̱ a̱ma̱ci e le babu ele ucigu. 17 Uwwai nda, n ta zuwa aza a Midiya a̱ riya̱a̱ le, aza a na a tarai azurufa ili shi waru a̱a̱ luluma̱ le na̱ zinariya shi. 18 Aya e le a ta sapa olobo, a̱a̱ ka̱lyuwa̱ nreɓu ni isa'ani shi waru ee ene iliyali i muwun shi. 19 Babila, za na la'a tsura̱i tsugbain a̱tsuma̱ o tsugono, ili i sa'ani ni ili yu uvaɗu wa aza a Kaldiya, u to o'wo tso Sodom na̱ Gomora a mantsa ma na A̱sula̱ o kototo nle. 20 Vuma buwa a̱ da̱nu a̱tsuma̱ a̱ yi shi, ko a̱ da̱nu pe diga mantsa a̱ tyo mantsa shi. Babu za va Arabiya na a̱a̱ shuwa̱ oogodo a̱ yi pe, babu za va aguɓa na aa lyawa ikyon ya̱ yi i von pe. 21 Amma inama yu una i ɗa yoo von ɗe, waru musa̱n mu una n ɗa maa shiwan o u'wa'a. Muwun ma azamina n ɗa ma̱a̱ da̱nu pe uba̱ta̱'a̱, mgbele mu una n ta yuwan pe tsu'yan. 22 Nkunzu n ta saala a ɓaɓu vu ucira va̱ yi, musa̱n mu una waru n ta saala o kobu tsugono mawwa mo uyo'o. Ukosu wa Babila u yuwan ta̱ zuzu, a̱a̱ da̱shi yi rana shi.