1 <<Poloo numu atsuvu, a̱ɗu aza na a zama a̱ɓula̱ waru a zama A̱sulazuva: Yuwain majiyan ma aatali uba̱ta̱ u na yu uta̱i, na̱ a̱a̱ka̱ri a aatali a na a̱ ka̱pa̱ nɗu. 2 Yuwain majiyan Ibrahim akaya a̱ ɗu, na̱ Saratu za na matsan nɗu. Adama a na a mantsa ma na n ɗe niyi a̱yi ɗa u da̱na̱i a̱ nde'en, reve n zuwaa yi aba'un reve n zuwa yi u bala. 3 Adama a na A̱sulazuva a ta ca Sihiyona adanshi, u te ene iliyali yo okongo a̱ yi suru. Waru u ta̱ ka̱mbuwa̱ a̱tsumona a̱ yi tsa Adini, iɗa yu u'yewu ya̱ yi tsa̱ a̱a̱rumbu a̱ A̱sulazuva. A̱ ta̱ tsura̱ ma̱za̱nga̱ na̱ mere a̱tsuma̱ a̱ yi, ugodyusho nu uɗyo wi ishipa.>> 4 <<Poloo numu atsuvu, ama a̱ va̱, yu uwwa mu a̱vu iɗa i va̱, adama a na wila̱ u ta̱ o uta̱ diga̱ ya̱'a̱ va̱, waru amayun a̱ va̱ o to o'wo ekan uba̱ta̱ wa ama. 5 A̱ɓula̱ a̱ va̱ a ta rawa zuzu ni ilaɗi, iwawi i va̱ i ta̱ lo a̱ ta̱wa̱, waru ukere u va̱ u ta yuwaan ama uge'etosu. Nɗa m memere ma̱ mini n ta puro ya̱'a̱ va̱ waru o to puro n yuwan uge'etosu nu ukere wu ucira a̱ va̱. 6 'Ya̱sa̱in esu a̱ ɗu zuva, waru i ka̱lyuwa̱ iɗa za̱la̱, zuva ta̱ puwa̱n tsa̱ mikyon, waru iɗa i to kporo tsu utugu, waru aza a na a̱ ri pe na̱ nden a̱ ta̱ kuwa̱ ne. Amma iwawi i va̱ i ta̱ da̱na̱ lo babu ukotu, waru a̱ɓula̱ a̱ va̱ a̱a̱ kuɗa̱ shi.>> 7 <<Poloo numu atsuvu, a̱ɗu aza a na e revei a̱ɓula̱, a̱ɗu ama a na a ɓanai wila̱ u va̱ o okolo, she yu uwwa wovon wu ucasu u wono wu vaɗilima̱ wan ko yi da'wan adama a wisulusa u le wan. 8 Adama a na nfirikici n ta tama le tsu utugu, waru aran a ta tama le cine a tsu tama itana i na a yuwain na̱ tsikilu. Amma a̱ɓula̱ a̱ va̱ a̱ ta̱ da̱na̱ lo babu ukotu, waru iwawi i va̱ mantsa suru.>> 9 Jiwan jiwan! Vu roco ucira wa̱ wu adama vu wawa tsu, A̱sulazuva. Jiwan, tsa rana na ka̱ra̱i, tsa mantsa ma na ma̱ ka̱ra̱i. A̱vu ɗa za na kukoɗoi Rahapu mukoɗi mukoɗi shi, za na kukoɗoi ididi'i a̱ mini mukoɗi mukoɗi shi? 10 A̱vu ɗa za na 'yewotoi mala shi, mini ma̱ a̱ru'un lon, za na ka̱mbuwa̱i mala ure adama aza a na vu tsupayi a pasa shi? 11 Aza a na A̱sulazuva a tsupayi a̱ ta̱ ka̱mba̱. A ta uwa Sihiyona ni ishipa, o to o'wo na̱ ma̱za̱nga̱ ma babu ukoto. A̱ ta̱ tsura̱ ma̱za̱nga̱ na̱ mere, mɓa̱la̱ na̱ a̱tsumola̱ngu o to koto. 12 <<A̱mu ɗa za na a̱a̱ ta̱na̱to wu asuvu. Nye i zuwai vaa uwwusa wovon wu vaɗilima̱ na a̱a̱ kuwa̱, mawun ma vuma za na a yuwain tsa wunlya, 13 waru vi icinai na̱ A̱sulazuva za na yuwan nuwu, za na buba̱ruwa̱i zuva waru u yuwain ikyun yu uvaɗi. Waru vaa uwwusa wovon urana suru adama o upan wu za vi iɓongi, mantsa ma na u foɓoi aciya̱yi adama o ukotosu? Waru te ɗa upan wu za vi iɓongi? 14 Aza a na a̱ ri uka̱ɗa̱ta̱wu aa jima shi a ta lyawa le. Waru a̱a̱ kuwa̱ a̱tsuma̱ a̱ a̱ka̱ri u'wa wa ali shi, ko a lamba ilyalya i na a cigai shi. 15 A̱mu ɗa A̱sulazuva A̱sula̱ a̱ wu, za na 'ya̱sa̱in mala hali ikeɗu i mini i yuwan ilama lon, A̱sulazuva o oɓolo a̱ a̱soja a zuva a ɗa ala a̱ yi. 16 Waru n zuwa ta̱ adanshi a̱ va̱ o una̱ wa̱ wu, waru m pala wu ta̱ nu ululu wu ukere u va̱. A̱mu za na buba̱ruwa̱i zuva waru n varai ikyun yu uvaɗi, a dansa Sihiyona, <A̱ɗu ɗa ama a̱ va̱.> >>

17 Jiwan, Jiwan, vu 'yon mishin, a̱vu Urishelima. A̱vu na vu sowoi diga o ukere wa̱ A̱sulazuva mokkoto mo upan wa̱ yi, vu sowo niyi suru reve u zuwa wu vo o'wo a takalyuwusa. 18 Babu za na oo roco yi ure a̱tsuma̱ o olobo a na u matsain suru, a̱tsuma̱ o olobo a na u kungwatoi suru babu za na aa ɓana ukere wa̱ yi. 19 Ili i re i nda a cina wu ta̱, zane ɗa aa ca wu adanshi? Ulungusu ko ukototosu ko ambulu ko uvon, zane ɗa aa ca wu adanshi? 20 Olobo a̱ wu a̱ lima̱ ta̱, o von ta̱ o ukosu wu ure suru tsa̱ nre'on n na igolo i remei. A̱sulazuva a̱ tsuwa̱n le ta̱ upan wa̱ yi na̱ tsuɓari tsa̱ A̱sula̱ a̱ wu. 21 Adama o ndolo uwwai ili i nda, a̱ɗu aza a na oo sowuso a̱tsuma̱lima̱, a̱ɗu na i sowoi, agba na̱ masayan ma ɗa shi. 22 Apa ili i na A̱sulazuva Zagbain A̱sula̱ a̱ wu, za na ee gesheshe ama a̱ yi a dammai: <<Uwwai nda, n ushiyi mokkoto mo utakalyusa diga o ukere wa̱ wu, va̱a̱ da̱shi sowo o mokkoto mo upan ma̱ va̱ shi. 23 N ta zuwa yi e ekere a aza a na aa casu ɗu a̱tsuma̱lima̱, aza a na a damma nuwu, <Von ma̱kpa̱ɓa̱ adama tsu wala zuva va̱ wu.> Waru vu ka̱mbuwa̱ ta̱ ucina̱ wa̱ wu tsi iɗa, tsu ure u na aa yuwan mmalu.>>