1 <<Cana ishipa, a̱vu idari yi ka. Ɓoso ni ishipa na̱ yorori i ma̱za̱nga̱, a̱vu za na koto revei ili i na a̱ tsu ɗe limatan shi. Adama a na muwun mu ka vu ulambu u limatan, a ta yuwan a̱bunda̱ a la'a muwun mu za na ri na̱ vali,>> A̱sulazuva a ɗa a dammai ne. 2 Da̱shi washin wo oogodo a̱ wu, vu buba̱ruwa̱ umuna wo oogodo a̱ wu washin, she vu ɓana a̱ca̱pa̱ wan. Vu da̱shi ugaɗi wa amunga a̱ wu, waru vu da̱shi gbamato irumu i ma̱shuwa̱ ma̱ wu. 3 Adama a na vu to ɓoso a̱ tyo upasu wu usa'ani nu ugula̱. Waru gundo va̱ wu to o'wo na̱ nɗa, a̱ ta̱ da̱nu a nɗa n na n ri na ama shi. 4 <<She vu uwwa wovon wan, adama a na vaa uwwa wono shi. She vu uwwa wovon u na oo zo'oso wu wan, adama a na aa ca wu wono shi. Vu te icina na̱ wono wa akungu a̱ wu, waru va̱a̱ da̱shi cuwan na̱ wono wu nden n tsuruna̱ tsa̱ wu shi. 5 Adama a na Za na Yuwan nuwu a̱yi ɗa vali va̱ wu. A̱sulazuva o oɓolo a̱ a̱soja a zuva a ɗa ala a̱ yi, waru Za va Akiza va Isra'ila ɗa Za va Atsupu a̱ wu. A̱yi ɗa a̱ tsu ɗe A̱sula̱ o uvaɗi suru. 6 Adama a na A̱sulazuva e ɗe wu ta̱ vu ka̱mba̱ tsu ka na a variyi, za na a uwwusa mɓa̱la̱ o okolo a̱ yi, tsu ka na vali va̱ yi 'yuwan niyi a̱yi o usheli,>> A̱sula̱ a̱ wu a ɗa a dammai ne. 7 <<A mantsa wa'a n vari wu ta̱, amma a̱tsuma̱ e mene me iliyali ya̱ a̱bunda̱ i ɗa ma̱a̱ ka̱mba̱to wu. 8 A̱tsuma̱ o upan wa̱ a̱bunda̱ n sokowo wu ta̱ urewesu u va̱ mantsa wa'a, amma ni icigi i babu ukotu moo roco wu iliyali,>> A̱sulazuva Za va Atsupu va̱ wu ɗa a dammai. 9 <<Ya̱'a̱ va̱ a̱yi nda tsu rana va̱ Nuhu ɗa, cine n kucinai a̱a̱ da̱shi soɗu uvaɗi na̱ mini shi. Ne ɗa gogo n kucina̱i ma̱a̱ da̱shi yuwan upan na̱ a̱vu shi, waru maa ɓara wu shi. 10 Adama a na nsasan n ta gura puwa̱n waru a ta gura tawa agaɗi, amma icigi ya amayun i va̱ yaa gura kakasa na̱ a̱vu shi, waru maa tawa akucunu a̱ nden ma asuvu a̱ va̱ shi,>> A̱sulazuva za na o rocosu wu iliyali a ɗa a dammai ne. 11 <<A̱vu lyuci gbain na sowoi a̱tsuma̱lima̱, a na wunla̱ nu upepu wa̱a̱ vugula̱sa̱. Waru babu za na aa ca yi adanshi. N ta suwisa wu na atali e ikebe, ikyun ya̱ wu na̱ safaya. 12 N ta suwa uɓaɓu wa̱ wu na atali e ikebe, na̱ntsu va̱ wu waru na atali e imaɗatsu, waru ɓaɓu va̱ wu suru na atali a sa'ani. 13 Muwun ma̱ wu suru A̱sulazuva a ɗa oo rito le, waru muwun ma̱ wu n ta̱ da̱na̱ na̱ nden ma asuvu ma amayun. 14 A̱tsuma̱ a̱ a̱ɓula̱ a ɗa vee isawan, vu ta̱ da̱na̱ alanga ni iɓongi, vaa uwwa wovon wi ili i na shi. A ta tawa wu wovon alanga, wa̱a̱ ta̱wa̱ zuzu na̱ a̱vu shi. 15 Na̱ za ro 'ya̱wa̱a̱ wu na̱ nla̱ngi, a̱mu ɗa n lyungu nle shi. Suru aza a na o ɓolotoi adama a yuwan uvon na̱ a̱vu a̱ ta̱ riya̱.>> 16 <<Uwwai nda, a̱mu ɗa za na yuwain maruma za na tsu fa̱la̱sa̱ akinkina adama u dala, a̱vu u yuwan itana yu uvon adama o ulinga u le. Waru a̱mu ɗa za na yuwain za vu ulungusu adama u yuwan ulinga u mona. 17 Babu itana yu uvon i na o foɓoi adama a̱ wu i na yaa lyuwa aci, waru elentsu a na suru a̱ 'yoyin adanshi na̱ a̱vu a̱tsuma̱ o uge'etosu vu ta lyuwa aci a̱ yi. A̱yi ɗa agadu a agbashi a̱ A̱sulazuva, waru uneꞌe u ɗa u matawa mo unusu uba̱ta̱ u va̱,>> A̱sulazuva a ɗa a dammai ne.