1 Ototopi a̱ ta̱ uta̱ diga a̱ a̱a̱gunli a̱ Yese, diga a aralu a̱ yi eten a ta matsan mawun. 2 Ruhu va̱ A̱sulazuva ta̱ cipa̱a̱ yi, Ruhu vu ugbozu na̱ Ruhu vu urevu, Ruhu va̱ a̱sa̱la̱ nu ucira, Ruhu vu uguru na̱ za vu urevu wa̱ A̱sulazuva, 3 waru u ta̱ da̱na̱ na̱ ma̱za̱nga̱ o wovon wa̱ A̱sulazuva. Wee ge'eto na̱ yindi ye esu shi waru waa paɗa ugana ni ili i na atsuvu a̱ yi a uwwai shi. 4 Amma na̱ a̱ɓula̱ a ɗa wee ge'eto alambi, na amayun a ɗa waru wee geshe ili ya aza a na a̱ ri nu ucira shi e iɗa'a. Na adanshi o usuɗuwu o una̱ wa̱ yi a ɗa wa̱a̱ ga̱la̱ iɗa, na̱ wivuwun wu una̱ wa̱ yi u ɗa woo una a̱za̱ e iwuya. 5 A̱ɓula̱ na amayun a̱ yi o o o'wo tsa gbakala uka̱nda̱ruwu e ikyun ya̱ yi. 6 Mekerenkesu ma̱ ta̱ da̱na̱ oɓolo na̱ mokyokyon, uta̱su waru u to von oɓolo na̱ megbele, ma̱dindim ma̱ ta̱ da̱na̱ oɓolo na̱ kamu na̱ ma̱dindim ma̱ lipu, reve mawun ma guɓa le. 7 Nan na̱ biya* a ta yuwan alyuna uba̱ta̱ u ta̱, waru muwun n le n to von uba̱ta̱ u ta̱. A̱vu kamu tama anlya tsu nan. 8 Mereɓu ma ta yuwan uro zuzu na̱ wa̱cin wu ruku, mawun ma ta zuwa ukere wa̱ yi a̱ wa̱cin wa aagbaji. 9 Babu ili i wuma i na yaa ca nanza a̱tsuma̱lima̱ ko u kototo nanza a masasan ma akiza ma̱ va̱, adama a na uvaɗi u ta̱ da̱na̱ tapu nu urevu wa̱ A̱sulazuva, cine vu revei mini mo tsu shiton mala.

10 O urana u ndolo Aaralu e Yese e te isawan tsa atuta zuva iroci yu uɓolotosu wa ama. Nɗa n to ɓoloto a̱ ma̱ka̱ka̱n ma̱ yi, uba̱ta̱ wu nden ma̱ yi waru u ta̱ da̱na̱ ulobonu a̱bunda̱ lon. 11 O urana u ndolo Zagbain ta canana ukere wa̱ yi mantsa me ire u zami aza a na a buwai a̱tsuma̱ a ama a̱ yi diga Asiriya, diga Masar, na̱ diga Paturo, na̱ diga Kush, na̱ diga Elam, na̱ diga Shina, na̱ diga Hamat, na̱ diga a nɗa m memere ma̱ mini. 12 U ta̱ 'ya̱sa̱n atuta iroci yu uɓolotosu wa ama, u to ɓoloto aza a Isra'ila a na o loyi. A̱vu u ɓoloto ama a Yahuda a na a bete'wei suru diga a pasu na̱shi vu uvaɗi. 13 Tsushu'un tsa na tsa̱ ri a̱tsuma̱ a aza a Ifiramu oɓolo na aza a Yahuda u to koto. A̱a̱ da̱shi yuwan waru nla̱ngi va̱ni shi. 14 O to ɓolo aci a̱ riya̱a̱ aza a Filistiya a̱ tyo a̱ a̱livu, a̱ ta̱ pura̱ ama a asana oɓolo. A ta uwaa aza a Edom na aza a̱ Mowa nu uvon, a̱vu aza a Amon o o'wo za̱la̱ le. 15 A̱sulazuva o to kototo aɓacina a mala ma Masar, waru u ta̱ 'ya̱sa̱n ukere wa̱ yi zuva vu Uɗolu wa̱ Yufireti, nu upepu wu usuɗuwu wa̱ yi. Waru u ta ɓatsa yi yene cindere adama ama a gura pasa wotowu na atan. 16 Tsundolo tsa ɗa aa yuwan ure u gbain u sa'ani diga e iɗa ya Asuriya adama a ama a̱ yi a na a buwai, cine a yuwayin aza a Isra'ila a mantsa ma na a gawain diga e iɗa ya Masar.