1 Amma gogo, nda ili i na A̱sulazuva a dammai, a̱yi za na ma'an nuwu, a̱vu Yakubu, a̱yi za na yuwan nuwu, a̱vu Isra'ila, <<She vu uwwa wovon wan, adama a na n tsupaa wu ta̱, n ɗe wu ta̱ na ala, waru a̱vu za va̱ ɗa. 2 Mantsa ma na vu kurula̱i a̱ mini ma̱ a̱ru'un n ta̱ da̱na̱ oɓolo na̱ a̱vu, waru na̱ vu kuru o ɗolu a̱ pura̱ wu shi. Na̱ vu kuru e memere ma akina wa̱a̱ kula̱to wu shi, waru elentsu a̱ yi a lyuwa wu shi. 3 Adama a na a̱mu ɗa A̱sulazuva, A̱sula̱ a̱ wu, Za va Akiza va Isra'ila, Za vi Iwawi ya̱ wu. N ca ta̱ Masar o una̱ wa̱ wu, Kush na̱ Seba waru o una̱ wa̱ wu. 4 Ana wo o'woi vu ta̱ ulobonu na̱ tsugbain o urewesu u va̱, waru n ciga wu ta̱, n ca ta̱ ama o una̱ wa̱ wu no u una̱ u wuma wa̱ wu. 5 She vu uwwa wovon wan, adama a na n to oɓolo na̱ a̱vu, n to ɓoloto wu na̱ muwun ma̱ wu diga asana na̱ a̱livu. 6 N ta damma ugana, <Ka̱mbuwa̱ le.> N damma uyagi, <She vu guza̱ le wan.> Ta̱wa̱yi na̱ muwun mo olobo n va̱ diga a nɗa ma alanga, waru muwun me esheli n va̱ diga o ukosu wu uvaɗi, 7 suru za na e ɗeyi na ala a̱ va̱, za na n yuwain adama a tsugbain tsa̱ va̱, za na n ma'ain waru n yuwain.>> 8 Uta̱yi aza a na a̱ ri nrumba̱, agba a̱ ta̱ ne esu, aza a na a̱ ri agulani agba a̱ ta̱ na̱ atsuvu. 9 Nɗa suru m ɓoloto ta̱ uba̱ta̱ u ta̱, ama o ɓoloto ta̱. Zane ɗa a̱tsuma̱ e le aa gura damma ili yu usokowu i nda, waru zane ɗa aa damma tsu ili i na i ka̱ra̱i? Lyawa le a̱ ta̱wa̱ na aza a na oo o'wo esu e le o roco a̱ ta̱ mejege, waru lyawa le a uwwa reve a damma, <<Amayun a ɗa.>> 10 Reve A̱sulazuva a damma, <<A̱ɗu ɗa esu a̱ va̱ na aagbashi a̱ va̱ za na n ɗangulai, adama i reve waru i usu mu waru i reve a na a̱mu goon a̱mu ɗa A̱sula̱. Kafu a̱mu a yuwan A̱sula̱ o ro shi, waru aa yuwan za ro a̱ca̱pa̱ a̱ va̱ shi. 11 A̱mu, a̱mu ɗa A̱sulazuva, babu na̱ a̱mu za vi iwawi ro lo shi. 12 A̱mu ɗa n dammai a̱vu n wawa reve waru n cuɗuwa, waru babu mocin n ma̱sula̱ mo ro ma na ma̱ shi a̱tsuma̱ a̱ ɗu. A̱ɗu ɗa esu a̱ va̱, a na a̱mu ɗa A̱sula̱,>> A̱sulazuva a ɗa a dammai, 13 <<A̱mu ɗa A̱sula̱, ne ɗa waru n ri babu ukotu, babu za na aa wawa diga e ekere a̱ va̱. A mantsa ma na n yuwain ili i ro, zane ɗa aa gura vadala yi?>>

14 Mpa ili i na A̱sulazuva za na Tsupaa nɗu Za va Akiza a Isra'ila a dammai, <<Adama a̱ ɗu n ta lyungu a̱soja a̱ tyo Babila, waru n to lo le suru ni ilaɗi, hali na aza a Kaldiya a na a̱ ri a̱tsuma̱ a antsun a na a yuwusan ma̱za̱nga̱. 15 A̱mu ɗa A̱sulazuva, Za va Akiza a̱ ɗu, za na yuwan nuwu Isra'ila, mogono ma̱ ɗu.>> 16 Mpa ili i na A̱sulazuva a dammai, a̱yi za na yuwain ure a̱tsuma̱ a mala, ure a̱ mini mo ucira, 17 za na o utusa̱a̱ na̱ a̱soja a na a gurai uvon ni ikeke yi ido ni ido, o von ta̱, waru aa gura 'yowisa̱n shi a̱ kuwa̱ ta̱. A̱ kimusa̱ le ta̱ tso logoni. 18 <<Yi icina ni ili yu ufaru, waru she i cuwan ili i na i ka̱ra̱i wan. 19 Uwwai nda, n ta zama n yuwan ili i sa'avu i ro! Gogo u fara ta̱ ɗe, ye ene yi shi? N ta yuwan ure a̱ a̱tsumona na̱ ɗolu e iɗa yu u'yewu. 20 Inama yu una i ta ca mu tsugbain, na̱ musa̱n mu una na azamina, adama a na n ca ta̱ mini a̱ a̱tsumona na̱ ɗolu e iɗa yu u'yewu, adama n ca ama a na n ɗangulai mini mo oso, 21 ama a na n yuwain adama a aciya̱va̱ adama a cuɗuwa ica i va̱.>> 22 <<Suru na̱ ne vu ɗe a̱ tyo ya̱'a̱ va̱ shi, a̱vu Yakubu, agba m makan wu ta̱, a̱vu Isra'ila. 23 Vu ta̱wa̱a̱ mu ni ikyon adama a̱ kucci vu ukula̱tosu shi, ko vu ca mu tsugbain na̱ kucci va̱ wu shi. N damaton wu adama a̱ kucci vi ishina shi, ko n kuna̱to wu adama a furenkisen shi. 24 I tsula aturare a̱ ma̱guru adama a̱ va̱ shi, ko i cuwa̱ton mu na̱ mani'in me inama ma̱ kucci ɗu shi. Amma a̱vu i damaton mu waru i kuna̱to mu na̱ nusu ɗu.>> 25 A̱mu, A̱mu ɗaɗa za na aa tawa nusu ɗu adama a aciya̱va̱, waru ma̱a̱ da̱shi cuwan nu unusu u ɗu shi. 26 Cuwaan numu na̱ a̱ca̱pa̱, lyawa tsu yuwain mawasan oɓolo. Ɗarayi adanshi adama u roco i ri nu unusu shi. 27 Kaka ɗu vu ufaru yuwan ta̱ unusu, ama a na a yuwusan adanshi o una̱ u ɗu a yuwaan mu ta̱ unusu. 28 Adama o ndolo n ca ta̱ azagbain a̱ a̱a̱'isa̱ a̱ ɗu wono, waru n ca ta̱ Yakubu adama o ukototosu, Isra'ila waru adama o wono.