1 A̱tsuma̱lima̱ a ta cina aza a na aa zuwusa wila̱ we epepen, aza a na aa ɗanasa wila̱ wi iɓongi, 2 adama a putsa alambi uge'etosu wa amayun, reve a putsa alambi a ama a̱ va̱ ni ili i na i ri za le, a̱a̱ purusa̱ nruna̱ waru aa ususa ili yi mkpa'an. 3 Nye yaa yuwan o urana wu uge'etosu, a mantsa ma na ukototosu woo uta̱ diga alanga? Ya zane yaa suma izami yi ikambi? Te yaa lyawa utsuru u ɗu? 4 Ko ili yaa buwa shi she uka̱ɗatosu a̱tsuma̱ a aza a na a̱ ri o u'wa wa ali a alanga ko a̱ riyisa̱ a̱tsuma̱ a aza a na a paɗai. Ni ili i nda suru, upan wa̱ yi u von shi, ukere wa̱ yi u buwa ta̱ wuba̱ruwu.

5 <<A̱sulazuva a damma ta̱ a̱tsuma̱lima̱ a ta cina aza a Asiriya, aaɗanga o upan a̱ va̱, aaɗanga a na a̱ ri e ekere e le upan u va̱ u ɗa! 6 N lyungu yi ta̱ u yuwan nla̱ngi na ama a na aa uwwusa wovon wa̱ A̱sula̱ shi. N zuwa yi ta̱ u riya̱a̱ ama a na aa zuwusa mu upan, u pura̱ itana waru u usa itana, reve waru wu dasa ama tsa̱ ci'in e re. 7 Agba a̱yi nda a̱yi ɗa u shi ifoɓi ya̱ yi shi, a̱yi ɗa u shi o okolo a̱ yi shi, ifoɓi ya̱ yi i ɗa u kototo, u tasa nɗa na̱ a̱bunda̱. 8 Adama a na u ta dansa, <Nan yali o uvon a̱ va̱ suru ngono n ɗa shi?> 9 <Kaluno la'a ta̱ ko'o Karkemi ucira? Ko Hamat la'a ta̱ Afa ucira? Ko Samariya la'a ta̱ Dimaska ucira? 10 Cine ukere u va̱ u cinai nɗa n na maa yuwusaan a̱ma̱li a̱ga̱nda̱, nɗa n na a̱ma̱li e le a la'ai a̱za̱ a̱ Urishelima na̱ Samariya, 11 maa yuwan na̱ Urishelima na̱ a̱ma̱li a̱ yi cine n yuwain na̱ Samariya na̱ a̱ma̱li a̱ yi shi?> >>

12 Agba na̱ Zagbain oo koto ulinga wa̱ yi suru a aci a Masasan ma̱ Sihiyona na̱ Urishelima, u ta ca mogono ma Asuriya a̱tsuma̱lima̱ adama o ugbawu wa̱ yi na̱ a̱ka̱nla̱ o uvaɗu a̱ yi. 13 Adama a na u damma ta̱, <<Nu ucira wu ukere u va̱ u ɗa n yuwain ili i nda, waru nu ugbozu u va̱, adama a na n ta̱ nu urevu n tawa ta̱ a̱tyo a nɗa, m pura̱ izuwa i le, tsu za vu ucira ne ɗa n ka̱ɗa̱toi ngono n le. 14 Cine vuma tsu zuwa ukere a yikinda, ne ɗa ukere u va̱ u rawai o utsuru wu nɗa suru. Cine vuma tsu ɓoloto okowo a na a lyawai, ne ɗa m ɓolotoi nɗa suru, agba ko evelu a lapa shi, ko a̱ kpa̱tu'wa̱ una̱ adama e geshe shi.>> 15 Aaɓau a̱ tsu 'ya̱sa̱n ta̱ aciya̱yi u la'a za na a̱a̱ vuta̱la̱sa̱ yi, ko zarto yuwan uvaɗu u la'a za na aa yuwusan ulinga na̱ a̱yi? She damma aaɗanga a̱ 'ya̱sa̱n za na 'ya̱sa̱n niyi, ko a̱a̱kpa̱mkpa̱la̱ a̱ 'ya̱sa̱n za na ri aaɗanga shi! 16 Adama o ndolo Zagbain A̱sulazuva o oɓolo a̱ a̱soja a zuva a̱ ta̱ lyunguwa̱ a̱soja a gbagbain a Asuriya na̱ mɓa̱la̱ m maramba, a̱tsuma̱ a tsugbain tsa̱ yi tsa ɗa akina a daɓa a̱ ma̱kula̱ tse elentsu a akina. 17 Ekan a Isra'ila o to o'wo akina, Za va Akiza va̱ yi to o'wo elentsu a akina. A̱tsuma̱ o urana u ta̱ u ta dala reve u kula̱to awanda a̱ yi na̱ ma̱lyo ma̱ yi. 18 Tsugbain tsa̱ a̱rumbu tsa̱ yi na̱ a̱ɗuma̱ o umili a̱ yi u to kototo le suru suru, cine vuma vu ubanakun tsu koto. 19 Akapi a ɗanga va̱ a̱rumbu va̱ yi o to o'wo wa'a, hali mawun me ke'en ma ta gura kece le.

20 O urana u ndolo aza a Isra'ila a na a pasai na̱ a̱za̱ o u'wa wa Yakubu a na a pasai, a buwa a zuwaa yi ucira shi za na a̱a̱ ga̱la̱sa̱ le, amma a ta zuwaa A̱sulazuva Za va Akiza va Isra'ila ucira suru suru. 21 Akapi a na a pasai a̱ ta̱ ka̱mba̱, akapi a Yakubu a̱ ta̱ ka̱mba̱ uba̱ta̱ wa̱ A̱sula̱ Za vu Ucira. 22 Ko na̱ shi ama a̱ wu, Isra'ila, a yuwan a̱bunda̱ tsa̱ wuyun wu nge'en m mala, akapi a na a pasai ɗa goon a̱a̱ ka̱mba̱. O foɓoo wu ta̱ ɗe ukototosu, ukototosu u na wu ntsaa nuwu na̱ mejege. 23 Adama a na Zagbain, A̱sulazuva o oɓolo a̱ a̱soja a zuva a ɗa a tarai u ta̱ ta̱wa̱ nu ukosu wi iɗa'a suru suru, cine u zuwai waa yuwan.

24 Adama o ndolo apa nda ili i na Zagbain, A̱sulazuva o oɓolo a̱ a̱soja a zuva a dammai, <<A̱ɗu ama a̱ va̱ a na i ri nden a̱tsuma̱ a̱ Sihiyona, she yu uwwa wovon wa aza a Asuriya wan, aza a na a̱a̱ ga̱la̱sa̱ ɗu na aɗanga waru a̱a̱ vuta̱la̱sa̱a̱ ɗu asuɗu e le cine aza a Masar a yuwain. 25 Aa jima shi, upan u va̱ e ekere a̱ ɗu u to koto reve upan u va̱ u puna̱ a̱ tyo ya̱'a̱ le u kototo le.>> 26 A̱sulazuva o oɓolo a̱ a̱soja a zuva a ta faba le na asuɗu, she damma mantsa ma na wu ga̱la̱i aza a Midiya a aatali a̱ Oreb. Waru u ta̱ 'ya̱sa̱n aaɗanga a̱ yi zuva mala, cine u yuwain a̱tsuma̱ a Masar. 27 O urana u ndolo n ta tawaa ɗu itana yu ume i le diga a avangaci a̱ ɗu, a̱gba̱la̱ e le waru diga a̱ yinlu i ɗu. A̱a̱gba̱la̱'a̱ u ta kuɗa adama a na i yuwain mgbain. 28 A uwa ta̱ a̱ lyuci va Ayiyat, o utula̱i Migiron, a̱vu a zuwa itana i le a Mikimash. 29 Reve a pasalai upasata, a̱vu a damma, <<Tsu ta̱ va̱la̱ a Geba na ayin.>> Aza a Rama e je'en ta̱ lipu, aza a Gibiya va Shawulu a suma ta̱. 30 Saalai, ama a Galim! Polo atsuvu Layisha! Anatot iliyali! 31 Aza a Madimena a̱ ta̱ a̱tsuma̱ e ilaɗi i na aa la'a, aza a Gebim a suma ta̱ adama a la'a. 32 O urana u nda gan a̱ ta̱ ta̱ra̱nu ne'en a Nob, a̱ ta̱ jinga̱ɗa̱ likuku le e ekere a masasan mo Usheli wa̱ Sihiyona, a aagaɗi a̱ Urishelima. 33 Uwwai nda, Zagbain A̱sulazuva o oɓolo a̱ a̱soja a zuva u to koɗo eten a gbagbain nu ucira u wovon. Ɗanga vu uga'an o to polo le, aza a na a la'ai uga'an waru o to koɗo le. 34 U to koɗo a̱a̱rumbu e iɗanga yi irumbu na aaɓau, waru Lebanon ta̱ riya̱ e ekere a̱ A̱sula̱ o Uvon.