1 <<Mpa nda ili i na A̱sulazuva a dammai Sayiru Mogono ma na u tsuwa̱yin mani'in. Za na m ɓanai ukere u sa'ani wa̱ yi reve n ca yi ucira u na waa lyuwa nɗa n na n ri a̱ ma̱ka̱ka̱n ma̱ yi waru u ba̱ɗa̱ gbakala vu ngono. Waru adama a̱ kpa̱tu'wa̱ na̱ntsu a̱ ma̱ka̱ka̱n ma̱ yi tsa̱ra̱ a̱ ɓa̱ru na̱ntsu'u wan. 2 N ta̱ ka̱ra̱ elime a̱ wu n vala nsasan, n ta kuɗa na̱ntsu vu rumushili waru mu kuɗa aɗanga e irumu'u. 3 N ta ca wu utsuru u na u ri e irumbu, utsuru u na a zuwai usokowu, adama vu reve a na a̱mu ɗa A̱sulazuva, A̱sula̱ a Isra'ila, za na ɗe nuwu na aala. 4 Adama a aagbashi a̱ va̱ Yakubu, Isra'ila za na n ɗangulai, n ɗe wu ta̱ na aala a̱ wu, n ca wu ta̱ aala a tsugbain, ko na wo o'woi vu reve mu shi. 5 A̱mu ɗa A̱sulazuva, waru babu za ro, babu na̱ a̱mu A̱sula̱ o ro o lo shi. N ta casu wu ucira ko na vu reve numu shi, 6 adama ama e reve a na diga asana a̱ tyo alivu babu A̱sula̱ o ro a̱ca̱pa̱ a̱ va̱. A̱mu ɗa A̱sulazuva, waru babu za ro. 7 N yuwan ta̱ ekan, a̱vu waru n yuwan irumbu. N tsu ta̱wa̱ ta̱ na̱ nden mu uyo'o, a̱vu waru n zuwa a̱tsuma̱lima̱. A̱mu ɗa A̱sulazuva za na yuwain ili i nda suru.>> 8 <<A̱ɗu zuva na ri zuva, ro'oi a̱ɓula̱ diga zuva, lyawa eleshe o oco yi. Lyawa iɗa i kpa̱tu'wa̱ ulobonu a na iwawi na̱ a̱ɓula̱ yaa matsan muwun. Lyawa iɗa i zuwa le o uta̱. A̱mu A̱sulazuva, a̱mu ɗa n yuwan niyi.>> 9 <<A̱tsuma̱lima̱ a ta cina za na aa yuwusan mawasan na̱ za na yuwan niyi, upondo a̱tsuma̱ o pondo vo olo'o! Olo'o a ta damma za na yuwan niyi, <Nye i ɗa vaa yuwusan?> Ko, <Ekere a̱ wu e reve ulinga u le shi?> 10 A̱tsuma̱lima̱ a ta cina za na dammai dada, <Nye vu matsain tsunda?> ko u damma mma, <Nye i ɗa vu matsain?> >> 11 Mpa ili i na A̱sulazuva a dammai, Za va Akiza a Isra'ila, za na yuwan niyi, <<Vu te ece mu adama e ili i na maa yuwaan muwun n va̱, ko vu damma mu ili i na maa yuwan adama o ulinga we ekere a̱ va̱? 12 A̱mu ɗa za na yuwain uvaɗi reve n yuwan vuma a̱tsuma̱ a̱ yi. Ekere a̱ va̱ a ɗa a̱ ba̱ruwa̱i zuva, waru n ta yuwusan tsugbain tsi ili i na i ri zuva suru. 13 N ta 'ya̱sa̱n Sayiru a̱tsuma̱ a̱ a̱ɓula̱ a̱ va̱, waru n ta̱ ka̱mbuwa̱ suru re va̱ yi mejege. U ta suwisa lyuci gbain va̱, waru u wawa agbashi a̱ va̱ pere, babu atsupu ko iliyinkapa, A̱sulazuva o oɓolo a̱ a̱soja a zuva a ɗa a dammai.>>

14 Mpa ili i na A̱sulazuva a dammai: <<Utsuru wa Masar na̱ za va Kush, na ama o ugaɗi aza a Seba waru o to o'wo agbashi a̱ ɗu, o to toni ɗu ele wunlu na akani. A̱ ta̱ kingyo a̱ ma̱ka̱ka̱n ma̱ ɗu reve a pati ɗu, a dansa, <Amayun A̱sula̱ o to oɓolo na̱ a̱ɗu, waru babu za ro, babu ma̱sula̱ mo ro.> >> 15 Amayun a̱vu A̱sula̱ a ɗa za na tsu soko aciya̱yi, A̱sula̱ a Isra'ila Zamawawa. 16 Suru aza a na aa yuwusan a̱ma̱li a ta uwwa wono ni ili yi izo'oshi, suru nle a ta uwwa wono. 17 Amma Isra'ila ta̱ tsura̱ iwawi diga uba̱ta̱ wa̱ A̱sulazuva ni iwawi i babu ukotu. Yaa uwwa wono shi ko yo o'wo ili yi izo'oshi shi, babu ukotu. 18 Adama a na apa ili i na A̱sulazuva a dammai, za na yuwain zuva. A̱yi ɗa A̱sula̱, a̱yi ɗa za na ma'ain uvaɗi waru u yuwan niyi. U yuwan uvaɗi u da̱na̱ lya̱nga̱ shi. U yuwan yi ta̱ adama a̱ da̱nu a̱tsuma̱ a̱ yi. U damma ta̱, <<A̱mu ɗa A̱sulazuva, waru babu za ro. 19 N yuwan adanshi usokowu a̱tsuma̱ e iɗa yi irumbu shi. N damma ugundo wa Yakubu <Zami numu pere shi.> A̱mu A̱sulazuva n tsu damma ta̱ amayun, n ta dansa ili i na i ri mejege.>> 20 <<Ɓolotoi uba̱ta̱ u ta̱ reve i ta̱wa̱, i rawa zuzu oɓolo, a̱ɗu aza a na a la'ai a nɗa. A̱ ri nu urevu shi, aza a na a̱ ri utanuwu na̱ a̱ma̱li a ɗanga, aza a na a yuwusan avasa a̱ tyo uba̱ta̱ u musula̱ n na n tsu wawa shi. 21 Dammai waru i ta̱wa̱ na adanshi a̱ ɗu, i ɓoloto a̱vu i sa̱la̱la̱i ili i na yaa damma. Zane ɗa dammai ne nu ujumu? Zane dammai ne ɗe a̱ca̱pa̱? A̱mu A̱sulazuva a ɗa shi? Waru babu A̱sula̱ o ro a̱ca̱pa̱ a̱ va̱, A̱sula̱ a̱ a̱ɓula̱ na̱ Zamawawa. Babu za ro she a̱mu.>> 22 <<Vadalai ya̱'a̱ va̱ adama i tsura̱ iwawi, suru a̱ɗu ama o kosu vu uvaɗi, adama a na a̱mu ɗa A̱sula̱, waru babu za ro. 23 N kucina ta̱ na aciya̱va̱, adanshi o uta̱ ta̱ ɗe diga o una̱ u va̱ a̱tsuma̱ a̱ a̱ɓula̱, adanshi a na aa vadala shi. A̱lu suru a̱ ta̱ kingyo a̱ ma̱ka̱ka̱n ma̱ va̱, elentsu suru a taraa mu akucunu. 24 A ta damma adama a̱ va̱, <Uba̱ta̱ wa̱ A̱sulazuva a ɗa goon a̱a̱ tsura̱ a̱ɓula̱ nu ucira.> >> Aza a na a yuwain upan na̱ a̱yi a̱ ta̱ ta̱wa̱ ya̱'a̱ yi waru a ta uwwa wono. 25 Uba̱ta̱ wa̱ A̱sulazuva a ɗa gundo va Isra'ila suru va̱a̱ tsura̱ uge'etosu wa amayun no ogoɗiyo.