1 Suru na̱ ne, irumbu i to koto uba̱ta̱ wa aza a na a̱ ri nden a̱tsuma̱ a̱ a̱tsuma̱lima̱. Ɗe a̱ca̱pa̱ u ka̱ɗa̱to ta̱ iɗa ya Zebulun ni iɗa ya Nafutali, agba ɗe elime u ta ca Ga̱lili va Atakpaci tsugbain, upasu u na u remei o ure u mala'a mavada mo upasu wa̱ Urudu'u.

2 Ama a na a̱ ri a mmalu a̱tsuma̱ e irumbu e ene ta̱ ekan a gbain, aza a na a̱ ri nden a̱tsuma̱ e iɗa yi irumbu pici ekan e ikana le ta̱. 3 Vu da̱shi iɗa'a a̱bunda̱, vu da̱shi yi ma̱za̱nga̱. A ta yuwusan ma̱za̱nga̱ a̱ ma̱ka̱ka̱n ma̱ wu cine ama a tsu yuwan ma̱za̱nga̱ a mantsa mo ugasa, cine ama a tsu yuwan ma̱za̱nga̱ ne e ne'sheshen ili i na a̱ pura̱i uba̱ta̱ wu uvon. 4 Adama a na vu kuɗa ta̱ a̱a̱gba̱la̱ a̱ a̱tsuma̱lima̱ e le na aɗanga a na a̱ ri upaɗalu a avangaci e le, aɗanga a aza a na oo ɓongishi le vu kuɗa le ta̱ tso o urana wa Midiya. 5 Adama a na atan a̱ soja vu uvon suru na a a̱ ri a mmalu na̱ mesun mo uvon nu utugu u na suru u la̱nga̱i na̱ mpasa, a̱ ta̱ kula̱to yi, o to o'wo mani'in ma madaɓa ma akina. 6 Adama a na a matsaan tsu ta̱ mawun, a ca tsu ta̱ ulobo, waru tsugbain tsu ta̱ da̱na̱ o uvangaci wa̱ yi. Waru e te ɗe yi Za va̱ A̱sa̱la̱ va Asalama, A̱sula̱ o Uvon, Dada na ri nu Ukosu shi, Mogono ma̱ Nden ma Asuvu. 7 Uda̱shishi u tsugbain tsa̱ yi na̱ nden ma asuvu wa̱a̱ da̱na̱ na̱ a̱tyo shi. U ta yuwan tsugono o ootogu o tsugono tsa̱ Da̱wuda nu uba̱ta̱ u tsugono tsa̱ yi, u ta yuwan yi nu ucira na amayun na̱ a̱ɓula̱ diga a mantsa mo ndolo hali babu ukosu. Ukadu wa̱ A̱sulazuva vo oɓolo a̱ a̱soja a zuva a ɗa waa yuwan ne. 8 Zagbain lyungu ta̱ na adanshi a aci a Yakubu, reve u riya̱ e ekere a aza a Isra'ila. 9 Ama'a suru e te reve, Ifiramu na aza a na a̱ ri nden Samariya, aza a na aa dansa nu uvaɗu no okolo o ugbawu, 10 <<Usaa wo oco ta̱, agba tsu ta suwisa na atali a na e she'ein ulobonu. Ɗanga vu teɗu, o polo le ta̱, agba tsu ta̱ shuwa̱ ɗanga sida o una̱ u le.>> 11 Agba A̱sulazuva a̱ 'ya̱sa̱n ta̱ a̱za̱ a̱ nla̱ngi a̱ Rezin a aci e le, a̱vu u sato n'yuwatan n le. 12 Aza a Aram diga asana na aza a Filistiya diga a̱livu o soɗushi ta̱ Isra'ila nu uta̱. Agba ni ili i nda suru, upan wa̱ yi u von shi, ukere wa̱ yi u buwa ta̱ wuba̱ruwu. 13 Ama'a gba a̱ ka̱mba̱ uba̱ta̱ wu za na lapa nle shi, ko a zami A̱sulazuva o oɓolo a̱ a̱soja a zuva. 14 Adama o ndolo A̱sulazuva o to koɗo Isra'ila aaci na̱ wizan, na ashuwashuwa na apumpu urana u ta̱. 15 Mbara na ama a gbagbain ele ɗa aci, ama̱sula̱ a na o ritosu epen ele ɗa wiza'an. 16 Aza a na oo ronuso ama a nda aɗanga a̱ ta̱ pususa̱n le, waru aza a na oo ronuso'o a̱ ra̱pula̱ ta̱. 17 Adama o ndolo a ɗa Zagbain ri na̱ maluwa mo olobo e le shi, ko we ene iliyali yi mkpa'an na̱ nruna̱ shi. Adama a na koyan ɗa aa uwwusa wovon wa̱ A̱sula̱ shi, a yuwusan iwuya, una̱ suru a yuwusan adanshi a tsulo. Agba ni ili i nda suru, upan wa̱ yi u von shi, ukere wa̱ yi u buwa ta̱ wuba̱ruwu. 18 Adama a na iwuya i ta̱ ma̱kula̱ cine vu revei akina. U ta tamasa ma̱lyo na awanda, u ta daɓusa a̱a̱rumbu e iɗanga yi irumbu, reve mikyon m gbodolo a gawan. 19 Upan wa̱ A̱sulazuva o oɓolo a̱ a̱soja a zuva u ta̱ kula̱to iɗa'a, reve ama'a tsa mani'in ma madaɓa ma akina, ko za aa lyawa za va̱ yi shi. 20 O ukere usa'ani a ta tamashi nu uta̱, agba suru na̱ ne a ta buwa na ambulu, o ukere ugula̱ a ta tama agba a̱a̱ cuwa̱n shi. Vuma suru ta tama mawun ma̱ yi. 21 Manase ta tama Ifiramu, Ifiramu waru ta tama Manase, suru nle a ta vadala nla̱ngi na̱ Yahuda. Suru na̱ ne, upan wa̱ yi u von shi, ukere wa̱ yi u buwa ta̱ wuba̱ruwu.