1 Ruhu va̱ A̱sulazuva Zagbain to oɓolo na̱ a̱mu, adama a na A̱sulazuva a tawa mu ta̱ adama n yuwaan a̱za̱ a̱ iliyali adanshi a alabari a sa'ani. U lyungu mu ta̱ adama n ka̱mba̱to aza a na o uta̱i okolo gbaga. Waru adama n yuwan adanshi a na aa lyawa aza a na a̱ ri a tsugbashi fa̱a̱n waru a̱ ba̱ɗa̱ aza na a̱ ri a̱tsuma̱ o u'wa wa ali diga a̱tsuma̱ e irumbu, 2 n yuwan adanshi a aa'wan e isa'ani a̱ A̱sulazuva nu urana wa atsupu a̱ A̱sula̱ a̱ tsu. Reve n ca aza a na a̱ ri na̱ ma̱ a̱tsumola̱ngu adanshi. 3 Reve waru n ca aza a na a̱ ri a̱tsumola̱ngu a̱tsuma̱ a Sihiyona, n ca le okokolo a sa'ani o una̱ wo ogbondo, na̱ mani'in ma̱ ma̱za̱nga̱ o una̱ wa̱ a̱tsumola̱ngu, nu utugu u gbain wi ica o una̱ u ruhu u makuɗa mo okolo. E te ɗe le ɗanga oku gbagbain va̱ a̱ɓula̱, ca̱'a̱n va̱ A̱sulazuva adama a ca yi tsugbain. 4 A ta suwisa akuci a̱ ba̱ta̱ na o ocoi, a̱vu a̱ 'ya̱sa̱n ba̱ta̱ na vo o'woi okongo. A ta lapula ilyuci i na a̱ shi a̱ rukutsa̱i, ba̱ta̱ na a̱ rukutsa̱i ɗe mantsa nu ujumu. 5 Omoci a ta guɓa oɓolo e ikyon i ɗu, omocin a ɗa aa cimba a̱ɗuma̱ a̱ ɗu reve a lapula ataci a ina̱bi a̱ ɗu. 6 E te ɗe ɗu nan ganu va̱ A̱sulazuva, a̱vu a ca ɗu ala a̱za̱ a̱ a̱ga̱nda̱ a̱ A̱sula̱ a̱ tsu. I ta lyuwa utsuru wu nɗa, reve i yuwan uvaɗu nu utsuru u le. 7 O una̱ u wono a̱ ta̱ tsura̱ akunda ure, waru o una̱ u na aa tara le ili i ro shi, a ta yuwan ma̱za̱nga̱ ni ili i na i ri za le, adama o ndolo a̱tsuma̱ e iɗa i le a̱ ta̱ tsura̱ akunda ure, waru o to o'wo na̱ ma̱za̱nga̱ babu ukotu. 8 <<Adama a na a̱mu A̱sulazuva n ciga ta̱ ili i na i ri mejege, n 'yuwan ta̱ a'usa ni iwuya. A̱tsuma̱ a̱ a̱ɓula̱ a̱ va̱ n ta ca le iliyinkapa, reve n yuwan akucunu a na a̱ ri n koto shi ne ele. 9 E te reve nu ugundo u le a̱tsuma̱ a nɗa waru e te reve na̱ muwun n le e memere ma ama. Za na suru e ene nle, u te reve ne ele a na ele ɗa ama a na A̱sulazuva a zuwayi aba'un.>> 10 N ta yuwan ma̱za̱nga̱ lon na̱ A̱sulazuva, okolo a̱ va̱ a ta yuwan mere na̱ A̱sula̱ a̱ va̱, adama a na wo oto mu ta̱ a̱tugu e iwawi. Reve wu pala mu nu utugu wu uga'an wa̱ a̱ɓula̱, cine vali vu kasa'avu tsu yuwaan aciya̱yi tsulolobo tsa ganu, waru cine kasa'avu tsu yuwan tsusheli ni iyeɗi ya̱ yi. 11 Adama a na cine ma̱bula̱ ma̱ tsu uta̱a̱ no ototopi, waru cine a̱a̱rumbu a tsu zuwa ili i na a̱ cu'wa̱in pe wu uta̱, ne ɗa A̱sulazuva Zagbain aa zuwa a̱ɓula̱ ni ica yu uta̱ uba̱ta̱ suru a̱tsuma̱ a nɗa.