1 Ikaka adama a̱ a̱tsumona a na a̱ ri e ikyun i mala, cine lipa̱ na tsu lapa diga upasu wu uyagi wi iɗa'a, u tsu uta̱ ta̱ diga a̱tsumona e iɗa i wovon. 2 Me ene ta̱ alavu alavu e ili i wovon, me ene ta̱ za vi ikpa'a a yuwusan ikpa'a za mona waru a̱ mona. A̱vu Elam 'ya̱wa̱a̱ nu uvon, a̱vu Midiya vu ka̱nda̱ruwa̱ lyuci gbain. Suru a̱tsuma̱lima̱ a na u ta̱wa̱yi n ta tawa yi. 3 Adama e ili i ndolo u zuwa mu ta̱ a̱tsuma̱lima̱ a̱ mɓa̱la̱ cine a̱a̱tsuma̱ a̱ tsu ɓa̱li ka mantsa ma̱ teri. N ta̱ka̱lyuwa̱ ta̱ adama e ili i na mu uwwai, mu uwwa ta̱ wovon adama e ili i na me enei. 4 Ookolo a̱ va̱ a kuɗa ta̱, mu da'wan ta̱ adama o wovon, ayin a na n da̱na̱i a pura, u ta̱wa̱ ta̱ wo o'wo mu ili i wovon. 5 O foɓo ta̱ apada no o polusoi avalu reve a̱ da̱na̱ a lyusa no o sowi! 'Yoyin a̱ɗu azagbain, i sukuma a̱ra̱ga̱ a̱ ɗu mani'in!

6 Mpa nda ili i na Zagbain damma numu, <<'Ya̱wa̱ vu zuwa za vi ipiri, u damma ili i na we enei. 7 Na̱ we ene ikeke yi ido ni ido ejere re, akumbi o nloli na̱ akumbi a arakumi, reve u polo atsuvu, wu uwwa ulobonu lon.>> 8 Reve za vi ipiri'i wo oruwo u damma, <<Zagbain va̱, urana suru n tsi isawan ta̱ zuva va aburu, waru ayin suru n tsi isawan ta̱ uba̱ta̱ u na a zuwa numu. 9 Ka̱lyuwa̱, nda kumbi keke vi ido a̱ ta̱wa̱ ni ido ejere re.>> A̱vu u usu, <<Babila riya̱ ta̱, u riya̱! Suru a̱ma̱li a na a yuwusaan a̱ga̱nda̱ o ɓoso le ta̱ hali a̱ tyo e iɗa!>> 10 A̱ɗu ama a̱ va̱, aza a na o soroi o osoroto, n damma ɗu ta̱ ili i na mu uwwai diga uba̱ta̱ wa̱ A̱sulazuva o oɓolo a̱ a̱soja a zuva, A̱sula̱ a aza a Isra'ila.

11 Ikaka adama a Duma, za ro ɗe mu ta̱ diga Seyi, <<Za vi ipiri, mantsa ma̱ ne ma ɗa ayin oo koto? Mantsa ma̱ ne ma ɗa ayin oo koto?>> 12 Reve za vi ipiri usu u damma, <<Usana u ta̱ lo a̱ ta̱wa̱, waru ne ɗa ayin. Na̱ vu ciga vu yuwan yeci gogo she vu yuwan yeci, reve vu da̱shi ka̱mbisa̱ vu yuwan yeci.>>

13 Nda ikaka adama a Araba. A̱ɗu oɓolo a aza a mmalu a Dedan, aza a na a̱ va̱la̱i a̱ a̱pa̱mu a̱ a̱tsumona a Araba, 14 i ta̱wa̱a̱ aza a na aa uwwusa akuli mini, a̱ɗu aza a na a̱ ri na̱ nden a̱tsuma̱ a̱ lyuci va Tema, i ta̱wa̱a̱ aza a na a pa'ain ilyalya. 15 Adama a na a sumaa ta̱ matsun me pe'eni, matsun me pe'eni ma na a talai e ibici, diga uba̱ta̱ o utan u na a̱ nyu'wa̱in, na̱ diga uba̱ta̱ o uvon wu usuɗuwu.

16 Nda ili i na Zagbain damma numu, <<A̱tsuma̱ a aa'wan a̱ ta̱, e mekece ma a'wan vu za zamalinga, tsugbain tsa̱ Keda tsu to koto. 17 Aza a na aa la'a aza a na a gurai aya, aza a Keda, ke'en ɗa aa buwa.>> Adama a na A̱sulazuva A̱sula̱ a aza Isra'ila a ɗa dammai ne.