1 A̱yi nda a̱yi ɗa adanshi adama a Taya, yuwain yorori ya̱ a̱tsumola̱ngu, a̱ɗu a̱za̱ o uluwu wa antsun a Tarshishi, adama a na o kototo ta̱ Taya waru a lyawa le ta̱ babu 'wa ko uzuwata wa wantsun. Udammu u ta̱wa̱ le ta̱ diga e iɗa ya Sipurus. 2 Rungwa̱i, a̱ɗu aza atsulu na awina a Sidon, a̱ɗu aza a na a̱ ri na̱ nden e memere ma mala, aza a awina na aatsulu a̱ɗu a pasa ta̱ mavada ma mala a̱ ka̱mba̱tosu lyuci ɗu nu utsuru. 3 Waru diga a mala ma ɗa a̱ ta̱wa̱yi ni ishina diga Shiho nu ugasa wi ili i na i kungwai zuzu na̱ Nilu. Waru vo o'wo ta̱ uba̱ta̱ wa awina na atsulu a nɗa. 4 Wono a aci a Sidon, adama a na mala ma yuwan ta̱ adanshi, uba̱ta̱ o ucira u mala'a adansa, <<Koto n reve mɓa̱la̱ n limatan ko gba m matsan shi, waru koto n kungwato olobo ko esheli shi.>> 5 Mantsa ma na udammu u rawai Masar, a ta yuwan a̱tsumola̱ngu adama a alabari a Taya. 6 Pasai mavada a̱ tyo Tarshishi na̱ yorori, a̱ɗu a̱za̱ a̱ nden m memere ma̱ mini. 7 Lyuci gbain ma̱za̱nga̱ ma̱ ɗu ɗaɗa nda'a za na ri lo diga mantsa mo ufaru ɗe nu ujumu, za na ana a̱ yi a tara niyi a̱ tyo ɗe alanga adama a yuwan ɗe tsugbain? 8 Zane ɗa foɓoi ili i nda a aci a Taya, za na tsu ca tsugono, za na aza a awina na atsulu a̱ yi muwun mu ngono n ɗa, waru azagbain o uvaɗi a ɗa? 9 A̱sulazuva o oɓolo a̱ a̱soja a zuva a ɗa o foɓo niyi, adama u ca suru a̱za̱ o uvaɗu u tsugbain wono, adama u ka̱ɗa̱to aza a na suru a cayi tsugbain o uvaɗi. 10 Pasai mavada me iɗa ma̱ ɗu tsu uɗolu wa̱ Nilu, a̱vu lyuci va Tarshishi, adama a na vu buwa nu ugeshete shi. 11 A̱sulazuva a canana ta̱ ukere wa̱ yi zuva mala, reve u zuwa tsugono tsa̱ jinga̱ɗa̱. U yuwan ta̱ adanshi a aci a Ka'ana a na o kototo ba̱ta̱ a cira le. 12 Reve u damma, <<Va̱a̱ da̱shi yuwan ma̱za̱nga̱ shi, Usheli wa̱ Sidon u na koto u revei vali shi a̱vu gba ɓongiyi! 'Yon vu pasa mavada ma Sipurus, ko ɗe fo va̱a̱ tsura̱ wivuwun shi.>> 13 Uwwai nda, iɗa ya Babila, ama a ɗa a na a̱ shi e revei ne ele amma o lo shi. Aza a Asuriya a̱ ka̱mbuwa̱ yi ta̱ wo o'wo uba̱ta̱ wu nden wi inama yu una. A yuwan abura a makumba adama o uvon u le, reve o ɓuɓoso kobu va̱ yi, reve a̱ ka̱mbuwa̱ yi okongo. 14 Oruwoi, a̱ɗu antsun a Tarshishi, adama a na o kototo ba̱ta̱ a cira ɗu.

15 A mantsa mo ndolo e te icina na̱ Taya hali a'wan kupocindere, a̱bunda̱ a a'wan a na mogono ma tsu yuwan. Amma o ukosu wa a'wan kupocindere'e, u ta fara na̱ Taya cine u ri e ishipa ya aashakala'a.

16 <<Tara kumburu, vu utula̱i na̱ lyuci gbain, aashakala a na e icinai. Vu wa'a kumburu'u ulobonu, vu cana ishipa a̱bunda̱, adama a cuwisan na̱ a̱vu.>>

17 O ukosu wa a'wan kupocindere'e, A̱sulazuva a̱ ta̱ bura Taya. Waru u ta ka̱mba̱ a tsushakala tsa̱ yi tso u'ushishi wi ikebe na̱ nɗa mu uvaɗi suru. 18 Waru ili i na yaa uwusa ni ikebe i na u tsura̱i a ta tawaa A̱sulazuva, waru aa zuwa le shi. Ili i na yaa uwusa yi u ta̱ 'ya̱wa̱ uba̱ta̱ wa aza a na a̱ ri nden a̱ ma̱ka̱ka̱n ma̱ A̱sulazuva adama a̱ tsura̱ ilyalya pere na̱ a̱tugu a sa'ani lon.