1 Uwwa numu a̱ɗu nɗa m memere ma̱ mini, poloi atsuvu a̱ɗu nɗa ma alanga. A̱sulazuva e ɗe mu ta̱ kafu a matsan mu a̱vu u ca mu aala a̱mu pe ubuwu a̱ a̱a̱tsuma̱ a mma va̱. 2 U zuwa ta̱ una̱ u va̱ wali tsa matsun me pe'eni, u soko mu ta̱ o ululu wu ukere wa̱ yi. U yuwan mu ta̱ tsu liya na o foɓoi, a̱vu u soko mu a̱tsuma̱ o ujin wa̱ yi. 3 A̱vu u damma mu, <<A̱vu aagbashi a̱ va̱ a ɗa, Isra'ila. E ekere a̱ wu a ɗa ma̱a̱ tsura̱ tsugbain.>> 4 Agba a̱vu n damma, <<N yuwan ta̱ tsugbashi tse pere, n lungusa̱ ta̱ ucira u va̱ pere waru ko ili. Agba suru na̱ ne ili i na yi ntsaa numu u te e ekere a̱ A̱sulazuva, atsupu a̱ va̱ waru a̱ ta̱ uba̱ta̱ wa̱ A̱sula̱.>> 5 Reve gba gogo A̱sulazuva a damma, a̱yi za na yuwan numu pe a̱ a̱a̱tsuma̱ moo o'wo aagbashi a̱ yi adama n ka̱mbuwa̱ Yakubu uba̱ta̱ wa̱ yi a̱vu m ɓoloto Isra'ila ya̱'a̱ yi, n tsura̱ ta̱ tsugbain e ekere a̱ A̱sulazuva waru A̱sula̱ a̱ va̱ ɗa ucira u va̱, 6 u damma ta̱, <<Ili i ke'en i ɗa vo o'wo aagbashi a̱ va̱ adama vu ka̱mbuwa̱ gundo va Yakubu waru vu ka̱mbuwa̱ aza a Isra'ila a na n geshei. Waru n ta zuwa vo o'wo ekan e ekere a nɗa, adama vu rawato iwawi i va̱ a̱ tyo o ukosu wu uvaɗi.>> 7 Apa ili i na A̱sulazuva Za va Atsupu na̱ Za va Akiza a Isra'ila a dammai, a̱ tyo ya̱'a̱ yi za na nɗa n tarai ili i ro shi waru a 'yuwan niyi, aagbashi a aza a tsugbain: <<Ngono n te ene wu a̱vu a̱ 'yon, muwun mu ngono n te ene wu a̱vu a̱ ka̱ɗa̱to, adama a̱ A̱sulazuva, za va̱ a̱ɓula̱, Za va Akiza a Isra'ila, za na ɗangwa nuwu.>>

8 Apa nda ili i na A̱sulazuva a dammai, <<A mantsa me isa'ani ma̱ va̱ n ta̱ usu wu, waru a mantsa me iwawi n ta kamba wu, n ta̱ guza̱ wu a̱vu n zuwa wu vo o'wo akucunu e ekere a ama. Vu ka̱mbuwa̱ iɗa'a waru vu ka̱mbuwisa̱a̱ ama agadu e le a na o o'woi okongo. 9 A damma aza na a̱ ri o u'wa wa ali, <Uta̱i,> aza a na waru a̱ ri a̱tsuma̱ e irumbu, <O'woi fa̱a̱n!> A ta lyuwa a̱ nge'en mu ure a̱vu a̱ tsura̱ uba̱ta̱ wa alyuna a aagaɗi a na a̱ ri nu wunlya shi. 10 Aa uwwa ambulu ko akuli shi, ko upepu wu usuɗuwu ko urana u lapa le shi. A̱yi za na e inda iliyali i le u to rono le aɗanga, a̱vu u kuru ne ele a̱ tyo e esu a̱ mini. 11 N ta̱ ka̱mba̱to nsasan n va̱ suru re, a̱vu waru n lapula re gbain va̱. 12 Uwwai nda, a̱ ta̱ ta̱wa̱ diga alanga, ozo o ro diga ugana, ozo o ro a̱livu, ozo o ro diga upasu wu uyagi wa Masar.>> 13 Canai ishipa yi ica, a̱ɗu zuva, a̱vu i za̱nga̱na̱ a̱ɗu uvaɗi, ɓosoi ni ishipa, a̱ɗu nsasan! Adama a na A̱sulazuva a ta casu ama a̱ yi asuvu nden waru u te ene iliyali ya ama a̱ yi na a̱ ri a̱tsuma̱ a̱ a̱tsuma̱lima̱. 14 Agba Sihiyona damma ta̱, <<A̱sulazuva a vari mu ta̱, Zagbain icina ta̱ na̱ a̱mu.>> 15 <<Ka ta gura icina na̱ ba̱ba̱ va̱ yi na waa casu maani na wa̱a̱ kuɗa̱ ene iliyali i mawun ma na u matsain? Ko nu u shi aa gura icina, a̱mu maa gura icina na̱ a̱ɗu shi! 16 Uwwai nda, n she'en ta̱ aala a̱ wu a aapata o ukere u va̱, ɓaɓu va̱ wu ta̱ da̱na̱ a̱ ma̱ka̱ka̱n ma̱ va̱ kuci. 17 Muwun ma̱ wu n ta̱ jika̱ a̱ ta̱wa̱, aza a na oo kototosu wu a ta kasa na̱ a̱vu. 18 'Ya̱sa̱n esu a̱ wu vu ka̱lyuwa̱ a̱ ka̱nda̱ruwa̱, muwun ma̱ wu suru m ɓoloto ta̱ a̱vu a̱ ta̱wa̱ ya̱'a̱ wu. N kucina ta̱ na̱ wuma u va̱,>> A̱sulazuva a dammai, <<vu to oto le tsi itana i tsulolobo. Vu ta̱ nla̱ le tsa kasa'avu.>> 19 <<O una̱ wo okongo a̱ wu na̱ ba̱ta̱ na a̱ lungusa̱i ni iɗa ya̱ wu i na yo o'woi ofoli, gogo vu ta̱ ka̱la̱ma̱ lon adama a̱ a̱bunda̱ a ama, waru aza a na a̱ shi o soɗu nuwu a ta yuwan alanga na̱ a̱vu. 20 Muwun n na a matsain mantsa ma̱ nden ma̱ a̱tsumola̱ngu ma̱ wu a̱ ta̱ gba a damma a atsuvu a̱ wu, <Uba̱ta̱ u nda u ka̱la̱ma̱ tsu ta̱ lon, da̱shi ntsu uba̱ta̱ wu nden.> 21 Reve vu damma a̱tsuma̱ o okolo a̱ wu, <Zane matsaan numu ele? A mantsa ma na n shi a̱ nden ma̱ a̱tsumola̱ngu idari, a̱ shi ta̱ a̱ gba̱ra̱ mu a̱ 'ya̱wa̱ ugana a̱vu a 'yuwan mu. Zane ɗa kungwaton nle? A̱ shi ta̱ a lyawa mu a̱ nde'en, agba ele nda, te ɗa o uta̱i?> >> 22 Apa nda ili i na A̱sulazuva Zagbain a dammai, <<Uwwai nda, n ta̱ 'ya̱sa̱n ukere u va e ekere a nɗa, waru n ta̱ 'ya̱sa̱n atuta a̱ va̱ iroci e ekere a ama. A̱ ta̱ gba a̱ ta̱wa̱a̱ no olobo a̱ ɗu a̱ ma̱ka̱ka̱n me le, a̱vu a tanu esheli a̱ ɗu a̱ nlungu n le. 23 Ngono n ta̱ ka̱lyuwa̱ muwun n ɗu, nan egbere a ɗa a̱a̱ guza̱ le. A̱ ta̱ ka̱ɗa̱ta̱wa̱ ɗu nu urewesu u le e iɗa. Reve e peɗe ma̱buta̱ ma ana ma̱ wu. Ɗaɗa yee reve a na a̱mu ɗa A̱sulazuva, aza a na a zuwaa numu ucira a uwwa wono shi.>> 24 A ta gura usa za na gurai uvon ili i na u pura̱i diga uba̱ta̱ wu uvon, ko a wawa aza a na e remei uba̱ta̱ wu uvon e ekere a za na ri usuɗuwu? 25 Amma apa ili i na A̱sulazuva a dammai, <<Ee aza a na e remei uba̱ta̱ wu uvon a ta usa le e ekere a za na gurai uvon. Ili i na a̱ pura̱i uba̱ta̱ wu uvon a ta wawa le e ekere a za na ri usuɗuwu. N ta yuwan nla̱ngi na aza a na a yuwusan nla̱ngi na̱ a̱vu, a̱vu n wawa muwun ma̱ wu. 26 N ta zuwa aza a na o ɓongishi wu a tama inama i lipu le. Reve o o'wo usowu na̱ mpasa n le cine ama a̱ tsu da̱na̱ usowu na̱ ma̱ra̱. Ɗaɗa vaɗilima̱ suru vee reve a na a̱mu A̱sulazuva a̱mu ɗa Iwawi ya̱ wu, za na Tsupaa nuwu na̱ Za vu Ucira va Yakubu.>>