1 Adama a̱ Sihiyona ma̱a̱ rungwa̱ kpen shi, adama a̱ Urishelima ma̱a̱ da̱na̱ kpen shi, hali she na̱ a̱ɓula̱ a̱ yi e ikana o uta̱ tse ekan, iwawi ya̱ yi tsa aakata a akina a madala. 2 Nɗa n te ene a̱ɓula̱ a̱ wu, waru ngono suru me ene tsugbain tsa̱ wu, a̱vu e ɗe wu na aala a sa'avu a na una̱ wa̱ A̱sulazuva waa ca. 3 A̱sulazuva a̱ ta̱ ɓa̱na̱ wu o ukere wa̱ yi tso ookokolo o ulobonu, tso ookokolo o tsugono e ekere a̱ A̱sula̱ a̱ wu. 4 Aa buwa a̱ da̱shi ɗe wu Alyawi shi iɗa ya̱ wu Ofoli shi. Amma e te ɗe wu Hefiziba*, iɗa ya̱ wu waru Bewula*, adama a na A̱sulazuva a ta uwwa uyo'o wa̱ wu, waru u ta zuwa iɗa ya̱ wu. 5 Cine ulobo u tsu zuwa usheli, ne ɗa olobo a̱ wu a zuwa wu. Waru cine vali vu kasa'avu tsu za̱nga̱na̱a̱ kasa'avu va̱ yi, ne ɗa A̱sula̱ a̱ wu a̱ za̱nga̱na̱a̱ wu. 6 A ɓaɓu va̱ wu, Urishelima, n zuwa ta̱ a̱za̱ e ipiri, urana na ayin suru a̱ da̱na̱ kuci shi. A̱ɗu na yaa cuwusan na̱ A̱sulazuva she i bula̱ wan. 7 Waru she i ca yi wivuwun wan hali she nu u shuwa̱ Urishelima, a̱vu wo o'woto yi ili yi ica o uvaɗi. 8 A̱sulazuva a kucina ta̱ nu ukere u sa'ani wa̱ yi nu ukere wu ucira wa̱ yi waru: <<Ma̱a̱ da̱shi ca n'yuwatan ma wu ishina ya̱ wu wo o'wo le ilyalya shi. Omocin a̱a̱ da̱shi sowo masayan ma̱ sa'avu ma̱ wu na vu sowoi a̱tsuma̱lima̱ o ulinga wa̱ yi shi. 9 Amma aza a na a gasai ishina a ta lyuwa a̱vu a cuwa A̱sulazuva. Aza a na waru o ɓolotoi ina̱bi adama a masayan o to sowo yi o ukowo wa̱ A̱a̱'isa̱ a̱ va̱.>> 10 Utula̱i, utula̱i na̱ na̱ntsu! Lapulai ure adama a ama. Yuwain, yuwain ure! Tatawai atali. 'Ya̱sa̱in atuta adama a ama. 11 Uwwai nda, A̱sulazuva a damma ta̱ a̱ tyo o ukosu wu uvaɗi, <<Damma Usheli Sihiyona, <Uwwa nda, Za vi iwawi va̱ wu ta̱ lo a̱ ta̱wa̱! Uwwai nda, gba iliyinkapa ya̱ yi i to oɓolo na̱ a̱yi, atsupu a̱ yi oɓolo na̱ a̱yi.> >> 12 E te ɗe le, Ama a Akiza, aza a na A̱sulazuva a Tsupayi. Waru e te ɗe ɗu Aza a na a̱ Zamiyi, Lyuci na a Lyawai shi.