1 A̱tsuma̱lima̱ a ta cina wu, a̱vu za vu ukototosu, agba o kototo wu shi! A̱tsuma̱lima̱ a ta cina wu a̱vu za yipalishi a̱vu gba koto a pala wu shi! A mantsa ma na vu lyawai ukototosu, o to kototo wu, na̱ vu lyawa yipalishi, a ta pala wu. 2 A̱sulazuva, roco tsu isa'ani, tsu ta zuwusa okolo ya̱'a̱ wu. Vo o'wo ucira u tsu usana suru, iwawi i tsu a mantsa ma addama. 3 Na̱ mawwa mo uɗyo u gbain wa̱ wu, ama a suma ta̱, ana vu rocoi tsugbain tsa̱ wu nɗa m bete'we ta̱. 4 Reve o ɓoloto ili i na vu lungusa̱i cine muwun ma apapari n tsu ɓoloto. Cine apapari a̱ tsu riya̱a̱ ili, ne ɗa ama a̱ riya̱a̱ niyi. 5 A̱sulazuva a̱ ta̱ na̱ tsugbain, adama a na u ta̱ nden zuva, u to shiton Sihiyona na amayun na̱ a̱ɓula̱. 6 A̱yi ɗa ikyun i mantsa ma̱ ɗu, iwawi ya amayun nu ugbozu nu urevu, wovon wa̱ A̱sulazuva a̱yi ɗa utsuru wa̱ Sihiyona. 7 Uwwai nda, a̱soja o okolo ugbamu e le e mesun e re, nlingata ma̱ nden ma asuvu a sali lon. 8 Re gbain suru ko za lo shi, babu aza a mmalu e re. A kuɗa ta̱ nzuwulai a tara adanshi a aza a na aa yuwusan adanshi o una̱ wa̱ yi ili i ro shi. Ko za a ca tsugbain shi. 9 Iɗa'a i yuwan ta̱ a̱tsumola̱ngu a̱vu u 'yewe, Lebanon uwwa ta̱ wono a̱vu u kpanla, Sharon o'wo ta̱ a̱tsumona, reve Bashan na̱ Kame o oco a̱vu'un e le. 10 <<Gogo n ta̱ 'yon,>> ne ɗa A̱sulazuva a dammai. <<Gogo a ta ca mu tsugbain, gogo a̱ ta̱ 'ya̱sa̱n mu zuva. 11 I yuwan ta̱ a̱a̱tsuma̱ o owopo, a̱vu i matsan tsu'yuwa̱, wivuwun u ɗu akina a ɗa a na oo soɗu ɗu. 12 A̱ ta̱ zun ama a̱ ɗu suru suru, tsa awanda a na o koɗoi ne ɗa a̱a̱ kula̱to le na akina.>> 13 A̱ɗu aza a na i ri alanga uwwai ili i na n yuwain, a̱ɗu aza a na i ri zuzu, i reve nu ucira u va̱! 14 A̱za̱ o unusu a̱tsuma̱ a̱ Sihiyona a uwwa ta̱ wovon, meje'en ma̱ lipu me reme ta̱ aza a na e revei A̱sula̱ shi: <<Zane a̱tsuma̱ a̱ tsu aa gura da̱nu na akina o ukototosu? Zane a̱tsuma̱ a̱ tsu aa gura da̱nu na̱ ma̱kula̱ ma na moo koto shi?>> 15 She za na ri a mmalu a̱tsuma̱ a̱ a̱ɓula̱ waru waa dansa ili i na i ri mejege. Za na aa 'yuwusan ili i na yaa uwa yi i na i ka̱ra̱la̱i, za na tsu 'yasan ekere a̱ yi nu ushishi wu utowusu wu una̱, za na tsu putsa atsuvu a̱ yi na̱ mawwa ma adanshi ma na oo una vuma, waru u tsu ɓa̱ru ese a̱ yi adama ee ene ili i wuya wan. 16 A̱yi nda a̱yi ɗa cu'un vuma na a̱a̱ da̱nu gbaga, za na upa'atan wa̱ yi atali o ucira a ɗa. A̱ ta̱ da̱na̱ a casu yi ilyalya ya̱ yi, mini ma̱ yi waru ma̱ ta̱ da̱na̱ lo kuci. 17 Esu a̱ wu e te ene mogono a̱tsuma̱ a tsugbain tsa̱ yi, e te ene iɗa i washin alanga. 18 Okolo a̱ wu a̱ ta̱ da̱na̱ a cuwusan ni ili i wovon ya̱ a̱ca̱pa̱: <<Te ɗa za mekece? Te ɗa za na tsu ushishi utafa? Te ɗa za na tsu keceshe atsura?>> 19 Vu buwa ee ene ama a aciyogbamu o ndolo shi, aza a na a tsu yuwan adanshi ne elentsu a na vee reve shi, aza a na tsu yuwan adanshi tsi iberenu a na vaa gura reve shi. 20 Uwwai nda, Sihiyona, lyuci gbain tsu na tsaa yuwusan a̱buki a na a zuwai. Esu a̱ wu e te ene Urishelima, uba̱ta̱ a̱ nden gbaga, oogodo a na a̱a̱ mula̱ shi, za na a̱a̱ mula̱ irumu i na a̱ shuwa̱a̱ niyi shi, waru aa taɓa ko amunga a̱ ta̱ a̱ yi shi. 21 Ɗe ɗa A̱sulazuva oo o'wo Za vu Ucira u tsu. U to o'wo tsa mala na̱ ɗolu washin, uba̱ta̱ u na n'yuwatan maa gura kuru shi, uba̱ta̱ u na ko wantsun wu n'yuwatan maa gura wala shi. 22 Adama a na A̱sulazuva a ɗa za vu uge'etosu u tsu, A̱sulazuva a ɗa za na aa casu tsu wila̱, A̱sulazuva a̱yi ɗa mogono ma̱ tsu, a̱yi ɗa waa wawa tsu. 23 Amunga a̱ wu a̱ ba̱ɗa̱ ta̱, aa gura guza̱ aɗanga a̱ wu shi, aa gura buba̱ruwa̱ umuna'a shi, wantsun waa gura wala shi. E te ne'eshen itana i na a̱ pura̱i uba̱ta̱ wu uvon, hali na̱ a̱kutsuma̱ fo a̱ ta̱ pura̱ itana. 24 Babu ko vuma na ri nden Sihiyona na waa damma, <<N tu ubanakun>>, a ta yuwaan aza a na a̱ ri nden ɗe gafura vu unusu u le.