1 Zane ɗa nda'a zane ri a̱ ta̱wa̱ diga Edom, zane ri a̱ ta̱wa̱ na̱ a̱tugu a̱ shili diga Bozura? Zane ri nu utugu wu ulobonu zane ri a mmalu a̱tsuma̱ a tsugbain tsu ucira tsa̱ yi? <<A̱mu ɗa n ri a adanshi a̱tsuma̱ a̱ a̱ɓula̱, za na ri nu ucira u na waa gura wawa.>> 2 Nye i zuwai itana ya̱ wu i ri ushili, a̱tugu a̱ wu tsu za na aa dasasa umatsun u ina̱bi? 3 <<Mu dasa ta̱ uba̱ta̱ u mokpoko u ina̱bi a̱mu a̱ nde'en, agba a̱tsuma̱ a̱ ama ko za shi oɓolo na̱ a̱mu shi. Mu dasa le ta̱ a̱tsuma̱ o upan u va̱, a̱vu mu kpoko le a̱tsuma̱ o upan wu usuɗuwu u va̱. Mpasa n le n lakata ta̱ a̱tugu a̱ va̱, reve n lakata itana i va̱. 4 Adama a na urana wa atsupu u to o okolo a̱ va̱, waru aa'wan a atsupu a̱ va̱ a rawa ta̱. 5 N ka̱lyuwa̱ ta̱ agba ko za lo na aa kamba shi. Reve n yuwan asalama a na ko za ri lo na waa kamba shi, ɗaɗa ukere u va̱ u ta̱wa̱a̱ numu ni iwawi, a̱vu upan u va̱ u guza̱ mu. 6 Mu dasa ta̱ ama a̱tsuma̱ o upan u va̱. N zuwa le ta̱ o o'wo usowu a̱tsuma̱ o upan wu usuɗuwu u va̱, a̱vu mo oco mpasa n le e iɗa.>> 7 N ta yuwan adanshi e icigi ya̱ A̱sulazuva i na i tsu vadala shi, ica ya̱ A̱sulazuva, o una̱ wi ili i na suru A̱sulazuva a yuwaan ntsu. Isa'ani ya̱ a̱bunda̱ i na u yuwayin u'wa wa Isra'ila i na u yuwaan nle a̱tsuma̱ a̱ a̱bunda̱ e isa'ani ni icigi ya̱ yi i na i tsu vadala shi. 8 U damma ta̱, <<Amayun ele ama a̱ va̱ a ɗa, muwun n na maa yuwaan mu epen shi.>> Reve gba wo o'wo Za vi Iwawi i le. 9 A̱tsuma̱ a̱ a̱tsuma̱lima̱ e le suru a̱yi fo wu uwwa ta̱ a̱tsuma̱lima̱, reve malingata ma̱ yi ma wawa le. A̱tsuma̱ e icigi ya̱ yi ni isa'ani ya̱ yi u tsupaa le ta̱. U 'ya̱sa̱n le ta̱ a̱vu u tanu le suru diga ɗe o ufaru. 10 Agba a̱vu a̱ 'ya̱sa̱a̱n yi aci a̱vu a̱ lungusa̱ Ruhu va Akiza va̱ yi a̱tsuma̱. Ɗaɗa gba u vadalai wo o'woi ma'yuwatan me le, reve a̱yi na aciya̱yi u yuwan uvon ne ele. 11 Reve ama a̱ yi a cuwan nu ufaru, mantsa ma Musa na ama a̱ yi. Reve a saala, <<Te ɗa za na utula̱i ne ele a̱tsuma̱ a mala'a, na̱ za va aguɓa vo oɓolo a̱ yi? Te ɗa za na zuwai Ruhu va Akiza va̱ yi e memere me le? 12 Te ɗa za na zuwai ukere wu ucira wa̱ yi u da̱na̱ o ukere u sa'ani wa Musa, za na ɓatsalai mini elime e le, adama u yuwaan aciya̱yi ala a na a̱ ri nu ukosu shi? 13 Te ɗa za na kuruyi ne ele a̱tsuma̱ a̱ a̱ru'un? Tso do a̱tsumona, a̱ ta̱ɗatsa̱ shi. 14 Tse inan i na i tsu wala a agalaci, ne ɗa Ruhu va̱ A̱sulazuva ca nle wivuwun. Ne ɗa vu kuruyi na ama a̱ wu, adama vu yuwaan aciya̱wu ala a tsugbain.>> 15 Ka̱lyuwa̱ diga zuva ve ene diga a̱ nda̱na̱ta̱ ma akiza n sa'ani ma̱ wu. Te ɗa uzuwu wo okolo a̱ wu nu ucira wa̱ wu? Icigi yo okolo a̱ wu na̱ yeni yi iliyali ya̱ wu vu tawa le ta̱ uba̱ta̱ u tsu. 16 Agba a̱vu ɗa dada tsu ko na wo o'woi Ibrahim reve tsu shi, waru Isra'ila reve na̱ a̱tsu shi. A̱vu A̱sulazuva dada tsu ɗa, Za va Atsupu a̱ tsu a ɗa diga ɗe o ufaru. 17 A̱sulazuva, adama a̱ nye vu zuwa ntsu agara diga o ure wa̱ wu reve vu gbawato okolo a̱ tsu, hali tsu kuɗa̱i a uwwa wovon wa̱ wu? Ka̱mba̱ adama a agbashi a̱ wu, gundo na ri agadu a̱ wu. 18 Ama a akiza a̱ wu o o'wo ta̱ nu uba̱ta̱ wa akiza wa̱ wu a mamantsa, a̱vu gba n'yuwatan n tsu mu dasa A̱a̱'isa̱ a̱ wu. 19 Tso o'wo ta̱ she damma aza a na vu shi vu yuwain tsugbain tse ele shi, she damma aza a na e ɗesuyi na ala a̱ wu shi.