1 A mantsa mo ndolo Merodaka baldan ulobo wa Baladan, mogono ma Babila, ma̱ lyungu ta̱ ajiya na̱ mpepelime nu une'e reve a ca Hezekiya, adama a na wu uwwa ta̱ ɗe a na u da̱na̱i ubanakun reve u ka̱mba̱ gbaga. 2 A̱vu Hezekiya raba le na̱ ma̱za̱nga̱. A̱vu u roco le ili i sa'ani i na i ri pe a̱tsuma̱ o u'wa wu uzuwa wa azurufa na̱ zinariya, ni itana i ma̱guru, oɓolo na̱ mani'in ma sa'ani oɓolo ni itana yu uvon ya̱ yi suru, ni ili i na a̱ tsura̱i pe a̱tsuma̱ a 'wa vu uzuwa va̱ yi suru. Babu ili i na i ri pe a̱tsuma̱ o u'wa wa̱ yi ko uba̱ta̱ u tsugono tsa̱ yi suru a na Hezekiya roco nle shi.

3 Reve Ishaya vumava̱sula̱ ta̱wa̱ uba̱ta̱ u mogono Hezekiya, a̱vu we ece yi, <<Ili i ne i ɗa ama a nda a dammai? Waru te ɗe o uta̱i a̱ ta̱wa̱i uba̱ta̱ wa̱ wu?>> A̱vu Hezekiya usu, <<A̱ ta̱wa̱ ta̱ ya̱'a̱ va̱ diga e iɗa ya alanga, diga Babila.>>

4 Reve Ishaya damma, <<Nye i ɗa e enei o u'wa wa̱ wu?>> A̱vu Hezekiya usu, <<E ene ta̱ ili i na i ri pe a̱tsuma̱ o u'wa u va̱ suru. Babu ili i na i ri a 'wa vu uzuwa va̱ i na n roco nle shi.>>

5 A̱vu Ishaya damma Hezekiya, <<Uwwa adanshi a̱ A̱sulazuva o oɓolo a̱ a̱soja a zuva: 6 Uwwai nda, rana ta̱ lo a̱ ta̱wa̱, ana ili i na i ri pe o u'wa wa̱ wu suru, ni ili i na nkaya ma̱ wu n zuwai hali ana'an, a ta tara le a̱ tyo Babila. Ko ili i ta̱ aa lyawa shi, ne ɗa A̱sulazuva a dammai. 7 Waru a̱tsuma̱ o ugundo wa̱ wu, aza a na oo uta̱ ya̱'a̱ wu, aza a na vu matsain, a ta tara le a̱ ka̱ra̱, o to o'wo oɓosoto* o ukobu u mogono ma Babila.>>

8 Ɗaɗa Hezekiya dammai Ishaya, <<Adanshi a̱ A̱sulazuva a na vu dammai u lobono ta̱.>> Adama a na u jiyan ta̱, <<A̱ ta̱ tsura̱ nden ma asuvu na̱ nden n lafiya a rana va̱.>>