1 Apa nda ikaka i na Ishaya ulobo wa Amoz u ushiyi adama a Yahuda na̱ Urishelima:

2 A̱tsuma̱ a rana vu ukosu masasan ma̱ a̱a̱'isa̱ ma̱ A̱sulazuva mo to o'wo tso mogono ma nsasan. A̱ ta̱ 'ya̱sa̱n yi u la'a agaɗi suru, nɗa suru n te yene a̱ tyo pe. 3 Nɗa ma̱ a̱bunda̱ n ta̱ ta̱wa̱ n damma, <<Ta̱wa̱i tsu gawain a̱ tyo a masasan ma̱ A̱sulazuva, a̱ tyo o u'wa wa̱ A̱sula̱ a Yakubu, adama u roco tsu ure wa̱ yi, tsa̱ra̱ tsu walai o ure wa̱ yi.>> Adama a na uritosu u to uta̱ diga Sihiyona, adanshi a̱ A̱sulazuva waru diga Urishelima. 4 U te ge'eto nɗa na̱ nɗa, reve u zuwa ama na̱ a̱bunda̱ e reme nsa̱lula̱i. A̱ ta ruma mutsun mu pe'eni n le a̱ ka̱mba̱to le a̱ba̱ri, mbata n le waru mutsun n wukoɗu we eten. Iɗa ya̱a̱ da̱shi 'ya̱sa̱n matsun me pe'eni o uvon ni iɗa i ro waru shi, ko gba waru a̱ da̱shi rito cine aa yuwan uvon shi. 5 Ugundo wa Yakubu, ta̱wa̱i tsu yuwain mmalu a̱tsuma̱ e ekan a̱ A̱sulazuva.

6 Vu vari ta̱ ama a̱ wu ugundo wa Yakubu, adama a na a̱ ri tapu ni ili yo oboci diga upasu wa asana na̱ a̱za̱ a̱ yindi tsa aza a Filistiya, waru o to ɓoluso ekere no omocin. 7 Iɗa i le i ta̱ tapu na̱ azurufa na̱ zinariya, utsuru u le u ri na̱ a̱tyo shi. Iɗa i le i ta̱ tapu ni ido, ikeke yi ido i le i ri na̱ a̱tyo shi. 8 Iɗa i le i ta̱ tapu na̱ a̱ma̱li, a̱ ta̱ ka̱ɗa̱tosa̱ ili i na a yuwain ne ekere e le, a̱ ta̱ ka̱ɗa̱tosa̱ ili i na akatsu le a yuwain. 9 Adama o ndolo a ɗa a̱a̱ ka̱ɗa̱to vuma, waru a tarai vaɗilima̱ ili shi. She vu yuwaan le gafura wan! 10 Walai a̱ tyo a̱tsuma̱ a atali, i pa'an a̱tsuma̱ a̱ ma̱buta̱ me iɗa, i pa'an upan wa̱ A̱sulazuva na̱ tsugbain tsu ucira wa̱ yi! 11 A̱ ta̱ ka̱ɗa̱to esu a za va aciyogbamu uvaɗu wa ama waru wo o'wo ili i wono. O urana u ndolo A̱sulazuva a ɗa goon za tsugbain lon. 12 Adama a na A̱sulazuva o oɓolo a̱ a̱soja a zuva a zuwa ta̱ urana adama a aza a aciyogbamu suru na̱ a̱za̱ o uvaɗu suru, na aza a na suru a̱a̱ 'ya̱susa̱n zuva a̱ ta̱ ka̱ɗa̱to le, 13 na̱ ɗanga sida va Lebanon suru, a̱za̱ o uga'an, oɓolo na̱ ɗanga oku va Bashan suru, 14 na̱ nsasan mu uga'an suru na agaɗi o uga'an suru, 15 na adama a atsura o uga'an suru na̱ ɓaɓu vu ucira suru, 16 na adama a antsun a gbagbain a Tarshishi na antsu a sa'ani a gbagbain suru. 17 A̱ ta̱ ka̱ɗa̱to aciyogbamu a vuma, nu uvaɗu wa ama waru. O urana u ndolo A̱sulazuva a ɗa goon za tsugbain lon, 18 a̱ma̱li gba a̱ ta̱ puwa̱n suru suru. 19 Ama a ta uwa a̱ a̱ba̱nu a atali na̱ a̱ a̱nci e iɗa adama o wovon wa̱ A̱sulazuva nu ucira u tsugbain tsa̱ yi, a mantsa ma na u 'yoyin adama u ca uvaɗi wovon. 20 O urana u ndolo vaɗilima̱ ta variyaa a̱ga̱ɗa̱ no ogyon a̱ma̱li a azurufa na aza a zinariya e le, a̱ma̱li a na a yuwayin aciyele adama a̱ a̱ga̱nda̱. 21 A ta uwa a̱ a̱ba̱nu a atali nu upa'atan wa aatali adama o wovon wa̱ A̱sulazuva nu ucira u tsugbain tsa̱ yi, a mantsa ma na u 'yoyin adama u ca uvaɗi wovon. 22 Lyawai a zuwusaa vaɗilima̱ ucira u ɗu, za na wivuwun wa̱ yi wa'a ɗa. Nye i ɗa a̱ ri?