1 A̱ shi a damma a̱vu mawun ma̱ a̱na̱wun ma̱ va̱ ma ɗa,

za na apai maani ma mma va̱!

Na̱ shi n cina wu a alanga,

n shi ta a katala wu,

agba babu za na o goro mu.

2 N shi ta a tara wu

n ta̱wa̱ na̱ a̱vu o u'wa wa mma va̱,

a̱ yi na u rito numu.

Lo ɗa maa ca wu masayan ma̱ ina̱bi

ma̱ va̱ mo uyo'o vu sowo,

masayan mo uɗanga u muwun m peme n va̱ vu sowo.

3 Ukere wu ugula̱ wa̱ yi

u ta̱ za̱la̱ va aaci a̱ va̱,

ukere u sa'ani wa̱ yi

waru ukatalu na̱ mu.

4 A̱ɗu esheli a̱ Urishelima,

kucuna numu i damma,

yaa damaton tsu shi,

mantsa ma na tsu ri a uwwusa uyo'o u tsu.

5 Zane ɗa ndeɗe a̱ ta̱wa̱ diga o ogozo,

a raɓatosu uba̱ta̱ macigata ma̱ yi?

N jisan wu ta̱ za̱la̱ vu uɗanga wa apulu,

uba̱ta̱ u na mma va̱ wu tarai a̱a̱tsuma̱ a̱ wu,

uba̱ta̱ u na mma va̱ wu matsan nuwu.

6 Vu zuwa mu tsu urotsu o okolo a̱ wu,

tsu urotsu o ukere wa̱ wu,

adama a na icigi i ta̱ nu ucira tsu ukwisa̱,

na̱ tsushu'un tsu usuɗuwu tsa aason.

U tsu dala ta̱ tsa akina,

u tsu kula̱ ta̱ tsa akina a madala nu ucira.

7 Mini ma̱ a̱bunda̱ maa gura kimusa̱ icigi shi,

ko ɗolu gura pura̱ yi shi.

Ko na̱ vuma ca utsuru wu u'wa wa̱ yi suru,

adama e icigi,

o to zo'oso yi nu ulamu.

8 Tsu ta̱ na̱ zawa'a vu usheli,

u na koto wu uta̱i agaɓa shi.

Nye tsaa yuwan adama a zawa'a tsu

na̱ vali ro damma u ciga yi ta̱?

9 Na damma a̱ yi uɓaɓu u ɗa,

tsu ta suwaa yi atsura a azurufa,

na damma a̱ yi una̱ntsu u ɗa,

tsu shi ta̱ a yuwaan yi uɓa̱ruwa̱ta̱ wa akpata a sida.

10 A̱mu uɓaɓu u ɗa,

agaɓa a̱ va̱ waru e le ɗa atsura,

mo o'wo ta̱ a̱ ta̱wusa̱a̱ macigata ma̱ va̱ na asuvu nden.

11 Sulemanu ta̱ nu uɗuma̱ u ina̱bi a Ba'al Hamon,

u lyawai ta̱ e ekere a̱za̱ e ipiri yu uɗuma̱'a̱.

Koyan ɗa ta̱ ta̱wa̱a̱ yi ni ikebe i azurufa ukpakukupa (1,000),

adama o umatsun wu uɗuma̱'a̱.

12 A̱mu n ta̱ nu uɗuma̱ u ina̱bi wa aci u va̱,

a̱vu Sulemanu n ta ca wu ikebe i azurufa ukpakukupa (1,000),

aza a na a̱a̱ ka̱lyuwusa̱a̱ wu uɗuma̱'a̱ waru n ta ca koyan ukpaku ure (200).

13 Macigata ma̱ va̱ a̱vu na vu ri nden a̱ a̱a̱rumbu,

a̱vu na n utsa̱ n va̱ maa uwwusa uyo'o wu uɗyo wa̱ wu,

lyawa a̱mu fo mu uwwa uɗyo wa̱ wu!

14 Jika̱ a̱ ta̱wa̱, macigata ma̱ va̱,

ta̱wa̱ ya̱'a̱ va̱ gogo tsa̱ mere'on,

tsa̱ mawun me meshon

a nsasan uba̱ta̱ e itana yu ucita i ma̱guru.