1 Vawun va̱, kasa'avu va̱,

a̱mu ɗa nda n uwai a̱tsuma̱ a̱a̱rumbu a̱ va̱!

Reve m ɓoloto mur ni itana i ma̱guru i va̱,

o sowuso ishiki na abaji a̱ yi,

a̱vu fo n sowo masayan ma̱ ina̱bi ma̱ va̱ na̱ maani ma̱ va̱.

A̱ɗu na i ri a n cigalai,

i lyuwa i sowo,

yoo o'wo usowu na̱ a̱bunda̱ e icigi i ɗu!

2 N lantsa ta̱ agba okolo a̱ va̱ a̱ ta̱ wuma.

Uwwai! Macigata ma̱ va̱

ma ta gugulusa una̱ntsu.

<<Kpa̱tu'wa̱a̱ mu n uwa,

vawun va̱, macigata ma̱ va̱,

muɗa ma̱ va̱, za na ri nu unusu shi.

Aaci a̱ va̱ e re'we ta̱ na a'iza,

a̱nji a̱ va̱ na̱ a̱ta̱ni a ayin.>>

3 N foɗo ta̱ ɗe itana i va̱,

cine moo otowiso le?

N sa'a ta̱ ɗe ana a̱ va̱,

cine tsa ɗa ma̱a̱ sukutisa̱ le?

4 Macigata ma̱ va̱ ma zuwa ta̱

ukere u kpa̱tu'wa̱ una̱ntsu u va̱,

a̱vu lipu va̱ suru,

reme a uwwusa maluwa ma̱ yi.

5 Reve n 'yon adama m kpa̱tu'wa̱a̱ macigata ma̱ va̱,

a̱vu ekere a̱ va̱ e reme ma̱ɗa̱wa̱ ma mani'i ma̱ mur,

akatsu a̱ va̱ waru a̱ ɗa̱wusa̱ mani'in,

a mantsa ma na n remei ukpa̱tu'wa̱ta̱ wu ukatsuwata'a.

6 M kpa̱tu'wa̱a̱ ta̱ macigata ma̱ va̱ una̱ntsu,

agba a̱ yi ɗa nda u ka̱ra̱i ɗe!

Ookolo a̱ va̱ a̱ la̱nga̱ ta̱ adama o uka̱ru wa̱ yi.

N zami yi ta̱, agba n tsura̱ yi shi,

n ɗesu ta̱ aala a̱ yi,

agba u usu mu shi.

7 A̱za̱ e ipiri a̱ lyuci'i a ga'an ta̱ na̱ mu,

a mantsa ma na a̱ ri a mabura ma̱ lyuci'i

reve a̱ ru'wa̱ mu a uwwato mu usa̱n.

Reve a usa apalutsu a̱ va̱,

e le a̱za̱ e ipiri yu ukari'i!

8 Esheli a̱ Urishelima,

kucinaa numu i damma,

nna̱ yee ene macigata ma̱ va̱,

i damma yi n ta̱ ma̱kuwa̱ mee icigi ya̱ yi.

9 A̱vu na vu la'ai ulobonu a̱tsuma̱ a̱ a̱ma̱ci,

icigi ya̱ wu i la'a ta̱ akapi a na a buwai?

Nye i zuwai vu ri e ipati i tsu,

tsu damma yi ili i na vaa uwwusa?

10 Macigata ma̱ va̱ ma̱ tu ulobonu,

waru na̱ gbaga lipu,

za na la'ai ulobonu a̱tsuma̱ o ukpakukupa kupa (10,000).

11 A̱nji a aaci a̱ yi a ta madala tsa zinariya,

a̱nji a̱ yi a̱ tu ulima̱ da̱n cine vu revei akakan.

12 Esu a̱ yi a̱ ta̱ tsa madara,

tsi imuɗa i uri

zuzu na̱ nge'en n lyusu mini.

13 Agbaguzu a̱ yi a̱ tu ulobonu

wa̱ a̱ka̱nla̱ tsa̱ a̱a̱rumbu,

a na a̱ ri tapu no ototopi e itana yu ucita.

Una̱ wa̱ yi u ta̱ tsa̱ yipa̱lu,

a̱ ɗuɗa̱wusa̱ tsa̱ mur.

14 Ekere a̱ yi a̱ ta̱ tsa aɗanga a zinariya,

na a suraa nle atali e ikebe.

Lipu va̱ yi yuwan ta̱ she damma,

anga a agiwa a na o gboroi,

wukalu na atali a safaya.

15 Ana a̱ yi a̱ ta̱ cine vu revei,

nda̱na̱ta̱ n na a yuwain na atali a onis,

reve a̱ shuwa̱ le e ikyun ya atsura a zinariya.

Iroci ya̱ yi i rotso ta̱ ulobonu wa̱ Lebanon,

tsu ɗanga sida na la'ai ulobonu.

16 Una̱ wa̱ yi u ta̱ a̱limu,

suru va̱ yi ili yi icigi i ɗa!

A̱yi nda a̱ yi ɗa macigata ma̱ va̱,

waru i'utsa̱ i va̱,

a̱ɗu esheli a̱ Urishelima!