1 A̱vu na vu la'ai ulobonu a̱tsuma̱ a̱ a̱ma̱ci,

a te ɗa macigata ma̱ wu ma̱ tyoyi?

Ure u ne u ɗa macigata ma̱ wu ma̱ kuruyi?

Tsu ta kamba wu izami ya̱ yi.

2 Macigata ma̱ va̱ ma̱ zura̱ ta̱

a̱ tyo a̱ a̱a̱rumbu a̱ yi,

uba̱ta̱ u na a̱a̱rumbu e itana yu ucita ya̱ yi i ri.

U ta̱ tsura̱sa̱ mawwa mo uyo'o a̱tsuma̱ a̱a̱rumbu a̱ yi,

o ɓolotosu yipa̱lu i na i ri ulobonu wa̱ a̱ka̱nla̱.

3 Macigata ma̱ va̱ za va̱ ɗa, a̱mu waru za va̱ yi ɗa,

u ta guɓusa oɓolo e ikyon ya̱ yi a̱tsuma̱ a̱ yipa̱lu.

4 Macigata ma̱ va̱, ma̱ tu ulobonu wa̱ a̱ka̱nla̱,

cine vu revei Tirza,

ulobonu waru cine vu revei Urishelima,

ili i maluwa i na i tsu ju'wa̱n okolo a̱ va̱,

cine vu revei oɓolo a̱ a̱soja na atuta e le.

5 Vu tawa e esu a̱ wu uba̱ta̱ u va̱,

adama a na a la'a ta̱ ucira u va̱.

A̱nji a̱ wu a̱ ta̱ cine vu revei oɓolo e mgbele

a na a̱ zurusa̱ a̱ cipa̱ a̱ tyo a Masasan ma Giliyadu.

6 Anga a̱ wu a̱ tu uri puwu,

cine vu revei oɓolo e ikyon

a na a̱ za̱'wa̱i cece.

A̱ tu ugeru suru nle,

za suru na̱ mawun ma̱ a̱na̱wun ma̱ yi,

babu za na ri nde'en.

7 Agbaguzu a̱ wu a̱ ta̱ cece

she damma ucina̱ wu umatsun

u muwun mu uɗanga m peme.

8 Ko na̱ shi a damma nan egbere kupota̱li a̱ ta̱ lo,

na̱ a̱ma̱ci a̱ nge'en kupakunla̱,

oɓolo na̱ esheli a̱bunda̱ lon,

na aa gura kece shi,

9 amma za ta̱ ɗa goon n ri e icigi,

waru u tu ulobonu tsa muɗa.

A̱yi ɗa a̱ nde'en ya mma va̱ yi,

za na mma va̱ yi la'a cigai.

Esheli e tse ene yi ta̱,

reve e ɗe yi za va aba'un,

nan egbere na̱ a̱ma̱ci a̱ nge'en a tsu ciɓalai ta̱.

10 Zane ɗa nda'a uta̱i she damma ekan o usana,

ulobonu tso woto, e ikanasa tsu urana,

cine vu revei oɓolo a̱ a̱soja na atuta e le?

11 N zura̱ ta̱ a̱ cipa̱ a̱tsuma̱ a ɗanga alumon

adama me ene ɗanga na ɓatsai o uka̱ri,

adama me ene ko ataci a̱ ina̱bi a kutsa ta̱ ɗe,

ko uɗanga u muwun m peme n yuwan ta̱ ɗe yipa̱lu.

12 Kafu n reve,

majiyan me icigi ma zuwa ta̱ me ne aciya̱va̱ nden

oɓolo na̱ mogono e ikeke yi ido ya̱ yi.

13 Ka̱mba̱, vu ka̱mba̱, usheli wa Shulam!

Vu ka̱mba̱, vu ka̱mba̱, adama tsu da̱shi ka̱lyuwa̱ wu!

Adama a̱ nye yaa zama

i ka̱lyuwa̱ usheli wa Shulam,

a mantsa ma na u ri o uje'en

e memere mo ugeru ure wa̱ a̱za̱ o uje'en?