1 Ishipa ya̱ Sulemanu i na i la'ai uyo'o.

2 Lyawa vu co'omo mu nu una̱ wa̱ wu,

adama a na icigi ya̱ wu i la'a ta̱ masayan ma inabi uyo'o.

3 Mani'in ma na vu putalai a̱ lipu va̱ wu u ta̱ na̱ ma̱guru lon,

aala a̱ wu a̱ ta̱ ma̱guru tsa aturare.

Ili yi lo shi a̱ yi ɗa i zuwai esheli a̱ ri e icigi ya̱ wu!

4 Tara mu a̱ tyo ya̱'a̱ wu, lyawa tsu suma!

Mogono ma̱ va̱, a̱ tyo a̱tsuma̱ a aasula a̱ wu.

Lyawa n yuwan ma̱za̱nga̱ lon a̱tsuma̱ e icigi ya̱ wu,

ma uwwa mo uyo'o ma na icigi ya̱ wu i ca numu

u la'a ta̱ za masayan ma̱ inabi.

Ee, ili i ro yi lo shi a̱ yi ɗa i zuwai

esheli a̱ ri e icigi ya̱ wu!

5 A̱ɗu esheli a̱ Urishelima,

ulima̱ u ɗa n ri, agba ili yi icigi!

A̱ɗu esheli a̱ Urishelima,

ulima̱ u ɗa n ri tso ogodo a Keda,

tsa amuna a̱ Sulemanu.

6 She i yuwan mu a̱ka̱nla̱ e pere wan

o una̱ u na n ri ulima̱,

adama a na urana u ɗa u lima̱na̱to numu.

Muwun mo olobo ma mma va̱ a yuwan ta̱ upan na̱ a̱mu,

reve a zuwa mu za vu cimba vu uɗuma̱ u inabi,

agba n tsura̱ mantsa ma na maa lapula lipu va̱ shi.

7 Damma mu, macigata ma̱ va̱

te ɗa vaa tara oɓolo e ikyon ya̱ wu a̱ 'ya̱wa̱ alyuna,

te ɗa vaa zuwa le o von e ivuwan nu urana usuɗuwa?

Adama a̱ nye mo o'wo ka vi igaru e izami ya̱ wu

a̱tsuma̱ e iliyamunga yi n'utsa̱ ma̱ wu?

8 A̱vu na vu la'ai ulobonu a̱tsuma̱ a̱ma̱ci,

na̱ vu reve shi, to,

vu kuru uzuɓa̱ wi ikyon

vu yuwan aguɓa a̱ mugbgbele ma̱ wu

zuzu no ogodo a aza a aguɓa.

9 Macigata ma̱ va̱,

ulobonu wa̱ wu u pura̱ ta̱ ugbozu u va̱

tsu ulobonu yi ikeke yi ido yu uvon wa̱ Firi'awuna.

10 Iliyatsuvu i da̱shi ta̱ agbaguzu a̱ wu ulobonu,

yinlu ya̱ wu i ta̱ ni iliyinlu yi ikebe.

11 Tsu ta yuwaan wu iliyinlu i zinariya

wukalu na̱ azurufa.

12 A mantsa ma na mogono ma̱ ri a apada a̱ yi,

aturare a̱ va̱ a̱ tsu kpoto yi ta̱ na̱ ma̱guru.

13 Ana macigata ma̱ va̱ mo voyin a̱ ma̱ka̱ka̱n ma̱ va̱

u yuwan ta̱ tsa̱ ma̱buhu ma̱ mur ma̱ ma̱guru

e memere ma agaɓa a̱ va̱.

14 Macigata ma̱ va̱ ma̱ ta̱ tsa̱ a̱kutsu a̱ yipa̱lu e ekere a̱ va̱,

tsa̱ yipa̱lu i ma̱guru a̱tsuma̱ o uɗuma̱ u inabi a̱tsuma̱ En Gedi.

15 Vu tu ulobonu macigata ma̱ va̱,

amayun vu tu ulobonu!

Esu a̱ wu a̱ ta̱ rocosu ugbozu wa̱ wu tsa aza a muɗa.

16 Vu tu ulobonu lon macigata ma̱ va̱,

amayun vu tu ulobonu!

Uba̱ta̱ wu nven n tsu

u ta̱ tsa anlya o uta̱nu.

17 Atsura o u'wa u tsu akpata a ɗanga sida a ɗa,

usatsa u tsu waru akpata a ɗanga fir ɗa.