1 Vu cuwan na̱ za na yuwan nuwu,

a rana tsulolobo tsa̱ a̱ wu,

babu na rana vi iwuya ta̱wa̱i,

waru aa'wan a̱ ta̱ ta̱wusa̱ zuzu a na va damma,

<<Maa uwusa uyo'o u le shi.>>

2 Babu na ekan o urana, ne ekan o woto

na̱ italyo'o yo o'wo irumbu,

eleshe waru e bete'we

a mantsa ma na o kotoi iro'i.

3 A mantsa mo ndolo ma ɗa ekere a̱ wu

a na aa yuwusan ipiri i lipu va̱ wu,

a uwa meje'en,

ana a̱ wu waru o to o'wo babu ucira

anga a̱ wu na a tsu ira ilyalya

o to o'wo ke'en, babu ulinga,

esu a̱ wu na vaa yuwusaan a̱ka̱nla̱

a̱ ta̱ rumba̱na̱.

4 A mantsa'a va uwwa ilama o ure shi,

ilama i yira fo, va uwwa yi lon shi,

uɗyo wi ishipa fo, ili yu usa̱n i ɗa na va uwwa le.

Amma mesun ma manunu

ma ta gura 'ya̱sa̱n wu a̱tsuma̱ a nlavu.

5 Na amayun vu ta uwwa wovon

wi ili i na i ri uga'an,

mmalu a̱tsuma̱ o ure u ta̱ ta̱wa̱ wu na̱ wovon.

Tsa̱ yipa̱lu yu uɗanga wa almon

a̱nji aaci a̱ wu a ta yuwan yono.

Tsa apapari a na a kutsai,

vu ta̱ rono ana adama a mmalu,

Cu'un maluwa ma̱ lipu biti

ma̱ ta̱ koto.

Diga lo she a̱ tyo o u'wa u na u ri hali hali,

aza na a̱ ri a̱ mesun a̱ ta̱ da̱na̱ a̱ 'ya̱wusa̱ na̱ a̱ ka̱mbi a̱tsuma̱ a̱ re.

6 Vu cuwan na̱ za na yuwan nuwu

babu na amunga a azurufa aa taɓa,

ko aakwanu a zinariya oo ɓoso,

ko medele mo ɓoso o una̱ u lyusu mini,

ko amunga o morono ma̱ mini ma taɓa

o una̱ wo oko'o.

7 Ma̱buta̱ waru ma̱ ka̱mba̱ ma̱bula̱ cine u shi nu ufaru,

wuma waru u ka̱mba̱ uba̱ta̱ wa̱ A̱sula̱ za na yuwan niyi.

8 <<Ili ya̱ pere i ɗa! Ili suru Ili ya̱ pere i ɗa!>>

O udammu wu za va alajiya,

<<Ili suru ili ya̱ pere i ɗa!>>

9 Adama a na za va alajiya da̱na̱i za vu ugbozu, a̱vu u roco ama urevu. U petelyuwe ta̱, a̱vu fo u bunga̱, reve u foɓo udammu wa adanshi na̱ a̱bunda̱. 10 Za va alajiya'a u zami ta̱ adanshi a na a̱ ri uyo'o u mawwa, a̱vu u ɗana adanshi amayun mejege. 11 Adanshi a ama a na a̱ ri nu ugbozu a̱ ta̱ tsa aɗanga a aguɓa, adanshi'i a̱ ta̱ da̱na̱ cine ikusa i tsu da̱na̱ wu sapu a aaɗanga a aguɓa. Adanshi a nda'a za va aguɓa a̱ ta̱ a ɗa oɓoloto n le.

12 Vu yuwan ugbozu, ulobo u va̱, adama a na ulinga u maɗana ma atagada ma̱ ri nu ukosu shi, waru a̱bunda̱ a̱ ɗewu nu una̱ a̱ tsu kuna̱to ta̱ vuma.

13 Ana a uwwai ili yo ndolo suru,

apa ukosu wa adanshi'i,

vu uwwa wovon wa̱ A̱sula̱, vu yuwan tsutoni nu udammu wa̱ yi,

adama a na a̱ yi nda goon a̱yi ɗa ulinga u vuma.

14 Adama a na A̱sula̱ a̱ ta̱ ge'eto cu'un vu ulinga suru,

ko usokowu ɗa a yuwan niyi,

ko za sa'ani ɗa, ko iwuya ɗa.